ഇടുക്കി: വിനോദ സഞ്ചാര കേന്ദ്രത്തിലെത്തിയ കുടുംബത്തിനെ ആക്രമിച്ച് സാമൂഹ്യവിരുദ്ധർ. സംഭവത്തിൽ 14 അംഗ സംഘത്തെ പോലീസ് അറസ്റ്റ് ചെയ്തു. . വണ്ടന്മേട് മാലി സ്വദേശികളായ പ്രശാന്ത്, ശബരി, പ്രശാന്ത്, അജിത് കുമാർ, വിവിഷൻ, മനോജ്, സുധീഷ്, അരുൺ, വിജയ്, സതീഷ്, സൂര്യ, രഘു, അജിത് കുമാർ എന്നിവരാണ് അറസ്റ്റിലായിട്ടുള്ളത്. സംഘത്തിലുണ്ടായിരുന്നതിൽ ഒരാൾ പ്രായപൂർത്തിയാകാത്ത ആളാണ്.
ഇടുക്കിയിലെ അഞ്ചുരുളി വിനോദസഞ്ചാര കേന്ദ്രത്തിൽ ഇന്നലെ ഉച്ചയോടെ ആയിരുന്നു സംഭവം.നാലഅംഗ കുടുംബത്തിലെ യുവതിയോട് അശ്ലീല ചുവയോടെ സംസാരിക്കുകയും അശ്ലീല ചേഷ്ടകൾ കാണിക്കുകയും ചെയ്തത് ഭർത്താവ് ചോദ്യം ചെയ്തതിനെ തുടർന്നായിരുന്നു ആക്രമണം.പെരുമ്പാവൂർ സ്വദേശി രാജിത്ത് രാജു, ഭാര്യ കവിത, രണ്ടു മക്കൾ എന്നിവരെയാണ് സംഘം ആക്രമിച്ചത്.
വിനോദ സഞ്ചാര കേന്ദ്രത്തിൽ നിന്ന് തിരിച്ച് പോകാനിറങ്ങിയപ്പോഴാണ് യുവാക്കൾ യുവതിയോട് അശ്ലീല ചുവയോടെ സംസാരിക്കുകയും അശ്ലീല ചേഷ്ടകൾ കാണിക്കുകയും ചെയ്തത്. ഇത് കണ്ട ഭർത്താവ് ചോദ്യം ചെയ്യുകയായിരുന്നു. എന്നാൽ ഇതോടെ പ്രകോപിതരായ യുവാക്കൾ രാജിത്ത് രാജുവിനെ ആക്രമിക്കുകയായിരുന്നു. ഭർത്താവിനെ രക്ഷിക്കാൻ ശ്രമിച്ച കവിതയെയും ഇവർ ആക്രമിച്ചു.
ദമ്പതികളെ രക്ഷിക്കാൻ എത്തിയ വ്യാപാരികൾ അടക്കമുള്ളവരെയും സംഘം ആക്രമിച്ചു. പിന്നീട് രണ്ട് വാഹനങ്ങളിലായി പ്രദേശത്ത് നിന്ന് സംഘം രക്ഷപെടുകയായിരുന്നു. തുടർന്ന് നാട്ടുകാർ വിവരമറിയിച്ചതിനെ തുടർന്ന് പോലീസെത്തി പ്രതികളെ പിന്തുടർന്ന് പിടികൂടുകയായിരുന്നു.
Discussion about this post