ന്യൂഡൽഹി : പ്രശസ്ത സംവിധായകൻ എസ് എസ് രാജമൗലിയെ പ്രശംസിച്ച് ബോളിവുഡ് നടനും സംവിധായകനുമായ അനുരാഗ് കശ്യപ്. വളരെയധികം കഴിവുള്ള വ്യക്തിയാണ് രാജമൗലിയെന്നും അദ്ദേഹത്തെ ഇന്ത്യൻ സിനിമയിൽ നിന്ന് തട്ടിയെടുക്കാനുള്ള സാധ്യതകൾ ഏറെയാണെന്നും അനുരാഗ് കശ്യപ് പറഞ്ഞു.
ഡിസി അല്ലെങ്കിൽ മാർവെൽ പോലുള്ള സിനിമകൾ ചെയ്യാൻ സാധിക്കുന്ന സംവിധായകനാണ് രാജമൗലി. രാജമൗലിയുമൊന്നിച്ച് പ്രവർത്തിക്കാനാണ് ഇപ്പോൾ പാശ്ചാത്യ രാജ്യങ്ങളിലെ സിനിമാ സംവിധായകർ ആഗ്രഹിക്കുന്നത്. അദ്ദേഹത്തെപ്പോലെ കഴിവുള്ള ഒരു വ്യക്തിയെ ഹോളിവുഡ് തട്ടിയെടുക്കുമോ എന്ന് തനിക്ക് ഭയമുണ്ടെന്നും അനുരാഗ് കശ്യപ് പറയുന്നു.
12 ദിവസമെടുത്ത് യുക്രെയ്‌നിൽ വെച്ചാണ് നാട്ടു നാട്ടു എന്ന ഗാനം ചിത്രീകരിച്ചത്. രാജമൗലിയ്ക്ക് മാത്രമേ അത്തരത്തിലൊരു ഗാനം ചിത്രീകരിക്കാൻ ധൈര്യമുണ്ടാവുകയുള്ളൂ. താനാണ് അത് ചെയ്യുന്നതെങ്കിൽ പകുതിക്ക് വെച്ച് നിർത്തിയേനെ എന്നും അനുരാഗ് കശ്യപ് കൂട്ടിച്ചേർത്തു.
2023 ലെ ഗോൾഡൻ ഗ്ലോബ്സിൽ ”നാട്ടു നാട്ടു” മികച്ച ഒറിജിനൽ ഗാനത്തിനുള്ള അവാർഡ് നേടിയിരുന്നു. തുടർന്ന് ക്രിട്ടിക്‌സ് ചോയ്സ് അവാർഡിൽ മികച്ച ഗാനത്തിനുള്ള പുരസ്‌കാരവും നേടി. നിലവിൽ ഓസ്‌കാറിന് വേണ്ടി നാമനിർദ്ദേശം ചെയ്യപ്പെട്ടിരിക്കുകയാണ്.
