തിരുവനന്തപുരം: ബ്രഹ്മപുരം മാലിന്യ സംസ്കരണ പ്ലാന്റിലെ തീ പൂർണമായും അണഞ്ഞെന്ന് മുഖ്യമന്ത്രി പിണറായി വിജയൻ. ബ്രഹ്മപുരത്തെ തീ മാർച്ച് 13ന് പൂർണമായും അണച്ചു. മാലിന്യം ഇളക്കി മറിച്ച് നനച്ച് തീ അണയ്ക്കേണ്ടി വന്നുവെന്നും മുഖ്യമന്ത്രി പറഞ്ഞു.
ബ്രഹ്മപുരം തീപിടുത്തത്തിൽ പോലീസ് അന്വേഷണം, വിജിലൻസ് അന്വേഷണം, വിദഗ്ധ സമിതിയുടെ പരിശോധന എന്നിവ നടക്കുമെന്നും നിയമസഭയിൽ ചട്ടം 300 പ്രകാരം നടത്തിയ പ്രസ്താവനയിൽ മുഖ്യമന്ത്രി പറഞ്ഞു.
ഭാവിയിൽ ഇത്തരം സംഭവങ്ങൾ ഉണ്ടാകാതിരിക്കാനുള്ള നടപടികൾ നിർദേശിക്കുന്നതിന് വിദഗ്ധ സമിതിയെ നിയോഗിക്കും. തീ അണയ്ക്കാൻ കൃത്രിമ മഴ ഉൾപ്പെടെയുള്ള കാര്യങ്ങൾ ആലോചിച്ചുവെങ്കിലും പ്രായോഗികമല്ലെന്ന അഭിപ്രായമാണ് ഉയർന്നതെന്നും മുഖ്യമന്ത്രി പറഞ്ഞു.
ബ്രഹ്മപുരം തീപിടുത്തവുമായി ബന്ധപ്പെട്ട് രജിസ്റ്റർ ചെയ്ത ക്രിമിനൽ കേസ് പോലീസിന്റെ പ്രത്യേക അന്വേഷണ സംഘം അന്വേഷിക്കും. ബ്രഹ്മപുരത്തിന്റെ പശ്ചാത്തലത്തിൽ മാലിന്യ സംസ്കരണത്തിന് അന്താരാഷ്ട്ര തലത്തിലുള്ള വൈദഗ്ധ്യം ലഭ്യമാക്കാനുള്ള നടപടികൾക്ക് സർക്കാർ തുടക്കം കുറിക്കും. ലോക ബാങ്ക് ഇതിനുള്ള സന്നദ്ധത അറിയിച്ചിട്ടുണ്ട്. മാർച്ച് 21, 23 തീയതികളിലായി ഇതിനായി ലോകബാങ്ക് പ്രതിനിധി സംഘവുമായി ചർച്ചകൾ നടത്തുമെന്നും മുഖ്യമന്ത്രി പറഞ്ഞു.
ഫയർ ആന്ഡ് റെസ്ക്യൂ സര്വീസിന്റെ നേതൃത്വത്തില് വിവിധ ഏജന്സികള്, സ്ഥാപനങ്ങള് എന്നിവയുടെ സംവിധാനം കൂടി പ്രയോജനപ്പെടുത്തി ഏകോപിതമായ പ്രവര്ത്തനമാണ് നടത്തിയത്. ഈ ഓപ്പറേഷനില് ഇന്ത്യന് നേവിയുടെ ഹെലികോപ്റ്ററുകള്, എയര്ഫോഴ്സ്, ബി പി സി എല്, എച്ച് പി സി എല്, സിയാല്, കൊച്ചിന് പോര്ട്ട് ട്രസ്റ്റ്, ഫാക്ട് എന്നീ സ്ഥാപനങ്ങളുടെ സംവിധാനങ്ങളും സിവില് ഡിഫന്സ് വാളണ്ടിയര്മാരും അണിചേര്ന്നു. ഇരുന്നൂറ്റി അന്പതോളം ഫയര് ആന്ഡ് റെസ്ക്യൂ ജീവനക്കാര് രണ്ട് ഷിഫ്റ്റുകളിലായി രാപ്പകല് ഭേദമില്ലാതെ പ്രവര്ത്തിച്ചു. 32 ഫയര് യൂണിറ്റുകള്, നിരവധി ഹിറ്റാച്ചികള്, ഉയര്ന്ന ശേഷിയുള്ള മോട്ടോര് പമ്പുകള് എന്നിവ ഇതിനായി ഉപയോഗിച്ചു. 2000 അഗ്നിശമനസേനാ പ്രവര്ത്തകരും 500 സിവില് ഡിഫന്സ് വാളണ്ടിയര്മാരും പ്രവര്ത്തനങ്ങളില് പങ്കാളികളായി. വളരെ ചിട്ടയോടെ നടത്തിയ കൂട്ടായ ശ്രമത്തിന്റെ ഭാഗമായാണ് തീ അണയ്ക്കാന് കഴിഞ്ഞത്. മുഖ്യമന്ത്രി ഈ പ്രവര്ത്തനത്തില് പങ്കാളികളായ ഫയര് ആന്ഡ് റെസ്ക്യൂ സര്വീസ്, ആരോഗ്യ വകുപ്പ്, സിവില് ഡിഫന്സ്, പൊലീസ്, കൊച്ചി കോര്പറേഷന് എന്നിവയിലെ ജീവനക്കാര് തുടങ്ങി എല്ലാവരെയും അദ്ദേഹം അഭിനന്ദിച്ചു.
തീപിടുത്തമുണ്ടായത് മുതല് സര്ക്കാര്, ജില്ലാ ഭരണസംവിധാനം, കൊച്ചി കോര്പറേഷന് എന്നിവരുടെ നേതൃത്വത്തില് യുദ്ധകാലാടിസ്ഥാനത്തിലുള്ള നടപടികള് സ്വീകരിച്ചിട്ടുണ്ട്. മാര്ച്ച് മൂന്നിന് തന്നെ കലക്ടറേറ്റില് കണ്ട്രോള് റൂം സജ്ജീകരിച്ചു. മാര്ച്ച് നാലിന് മുഖ്യമന്ത്രിയുടെ നിര്ദ്ദേശമനുസരിച്ച് ചീഫ് സെക്രട്ടറിയുടെ അധ്യക്ഷതയില് യോഗം നടത്തുകയും സ്ഥിഗതികള് വിലയിരുത്തുകയും അടിയന്തിര നടപടികള് നിര്ദേശിക്കുകയും ചെയ്തു. മാര്ച്ച് അഞ്ചിന് വ്യവസായ, ആരോഗ്യ, തദ്ദേശ സ്വയംഭരണ വകുപ്പ് മന്ത്രിമാര് കൊച്ചിയില് ഉന്നതതല യോഗം ചേര്ന്ന് തീയണക്കുന്നതിനും ജനങ്ങളുടെ ആരോഗ്യസുരക്ഷ ഉറപ്പുവരുത്തുന്നതിനുമുള്ള നടപടികള്ക്ക് വേഗം കൂട്ടി. തുടര്പ്രവര്ത്തനങ്ങള് മന്ത്രിതലത്തില് ഏകോപിപ്പിച്ചു. മാര്ച്ച് ഏഴിന് ദുരന്തനിവാരണ നിയമത്തിലെ വ്യവസ്ഥകള് ഉപയോഗിച്ച് അഗ്നിശമന പ്രവര്ത്തനങ്ങള് ത്വരിതപ്പെടുത്തി. വ്യോമസേനയെയും വിന്യസിച്ചതായും മുഖ്യമന്ത്രി വിശദീകരിച്ചു.
ബ്രഹ്മപുരത്ത് വേര്തിരിക്കാതെ നിരവധി വര്ഷങ്ങളായി നിക്ഷേപിച്ചിട്ടുള്ള മാലിന്യത്തിനാണ് തീപിടിച്ചത്. മാലിന്യം പല അടുക്കുകളായി ഉണ്ടായിരുന്നതും, തീ ആറ് മീറ്ററോളം ആഴത്തില് കത്തിയതും അഗ്നിശമന പ്രവര്ത്തനങ്ങള്ക്ക് വലിയ വെല്ലുവിളി ഉയര്ത്തി. തീയണക്കാനുള്ള വാഹനങ്ങള്ക്കും യന്ത്രസാമഗ്രികള്ക്കും മാലിന്യകൂമ്പാരത്തിനിടയിലൂടെ കടന്നുപോകാന് ആദ്യ ഘട്ടത്തിലുണ്ടായ പ്രയാസം മറ്റൊരു വെല്ലുവിളിയായിരുന്നു. എന്നാല് അത് പെട്ടെന്ന് തന്നെ പരിഹരിക്കാനായെന്ന് അദ്ദേഹം പറഞ്ഞു.
തീപിടുത്തമുണ്ടാവുകയും പുക പടരുകയും ചെയ്തതു മുതല് ഏതൊരു അടിയന്തിര സാഹചര്യത്തെയും നേരിടാനുള്ള മുന്കരുതലും തയാറെടുപ്പും ആരോഗ്യ വകുപ്പ് സ്വീകരിക്കുകയുണ്ടായി. എറണാകുളം മെഡിക്കല് കോളേജിലും രണ്ട് താലൂക്ക് ആശുപത്രികളിലും പ്രത്യേക വാര്ഡുകള്, ജില്ലാ ആശുപത്രിയില് 100 ഓക്സിജന് ബെഡുകള്, കളമശേരി ആശുപത്രിയില് സ്മോക്ക് കാഷ്വാലിറ്റി എന്നിവയും അതിനു പുറമെ മൊബൈല് മെഡിക്കല് യൂണിറ്റുകളും പ്രവര്ത്തനക്ഷമമാക്കി. സ്വകാര്യ ആശുപത്രികളും ആരോഗ്യ രക്ഷാപ്രവര്ത്തങ്ങളില് നന്നായി സഹകരിച്ചു. പ്രവര്ത്തനങ്ങള് ഏകോപിപ്പിക്കാന് രണ്ട് കണ്ട്രോള് റൂമുകളും സജ്ജീകരിച്ചു.
നാലാം തീയതി മുതല് അന്തരീക്ഷ വായുവിന്റെ ഗുണനിലവാരം നിരന്തരം നിരീക്ഷിക്കുന്നതിനുള്ള സംവിധാനം ഏര്പ്പെടുത്തി. ഗര്ഭിണികള്, കുട്ടികള്, വയോധികര് എന്നിവര്ക്ക് പ്രത്യേകം ആരോഗ്യ സംരക്ഷണം സംബന്ധിച്ച മാര്ഗ നിര്ദേശങ്ങളും പുറത്തിറങ്ങുന്നവര് നിര്ബന്ധമായും മാസ്ക് ധരിക്കണമെന്നുമുള്ള നിര്ദേശവും നല്കി. പ്രത്യേക മെഡിക്കല് ക്യാമ്പുകളും സംഘടിപ്പിക്കുകയുണ്ടായി. ലഭ്യമായ കണക്കനുസരിച്ച് 1,335 പേരാണ് സര്ക്കാര്, സ്വകാര്യ ആശുപത്രികളില് വൈദ്യസഹായം തേടിയത്. 128 പേര് 10 വയസ്സില് താഴെയുള്ള കുട്ടികളും 262 പേര് 60 വയസ്സിനു മുകളിലുള്ളവരുമാണ്. 21 പേര്ക്കാണ് കിടത്തി ചികിത്സ ആവശ്യമായിവന്നത്. ഗുരുതരമായ ആരോഗ്യ പ്രശ്നങ്ങള് ആര്ക്കുമുണ്ടായില്ലെന്നും മുഖ്യമന്ത്രി നിയമസഭയിൽ വ്യക്തമാക്കി.
Discussion about this post