സൗരയൂഥത്തിന് വെളിയിലായി, മറ്റ് നക്ഷത്രങ്ങളെ ഭ്രമണം ചെയ്യുന്ന നിരവധി ഗ്രഹങ്ങൾ ഉണ്ടെന്ന് അറിയാമല്ലോ. അത്തരം ഗ്രഹങ്ങളെ എക്സോപ്ലാനറ്റുകൾ എന്നാണ് വിളിക്കുന്നത്. കണ്ടാൽ ഭൂമിയെ പോലെ ഇരിക്കുന്ന ഒരു എക്സോപ്ലാനറ്റ് ആണ് TRAPPIST-1 b. എം ടൈപ്പ് നക്ഷത്രത്തെയാണ് ഈ ഗ്രഹം ഭ്രമണം ചെയ്യുന്നത്. TRAPPIST-1 എന്ന, ഭൂമിയെ പോലുള്ള, പാറകൾ നിറഞ്ഞ ഉപരിതലമുള്ള, വാസയോഗ്യമായിരിക്കാൻ സാധ്യതയുള്ള ഏഴ് ഗ്രഹങ്ങളുടെ ഗണത്തിലാണ് TRAPPIST-1 bയും ഉൾപ്പെടുന്നത്. എന്നാൽ TRAPPIST-1 b വാസയോഗ്യമായിരിക്കില്ല എന്ന സൂചനയാണ് ജെയിംസ് വെബ് ടെലസ്കോപ്പ് നൽകുന്നത്.
ഈ ഗ്രഹത്തിൽ അന്തരീക്ഷം ഇല്ലെന്നാണ് ജെയിംസ് വെബ് ടെലസ്കോപ്പ് കണ്ടെത്തിയിരിക്കുന്നത്. TRAPPIST-1 bയിലെ താപനില അളക്കാനും ജെയിംസ് വെബ് ടെലസ്കോപ്പ് ശ്രമം നടത്തി. പകൽസമയത്ത് അഞ്ഞൂറ് കെൽവിനാണ് ഈ ഗ്രഹത്തിലെ താപനിലയെന്നാണ് ജ്യോതിശാസ്ത്രജ്ഞർ കണ്ടെത്തിയത്. അതായത് ഏതാണ്ട് 232 ഡിഗ്രി സെൽഷ്യസിനടുത്ത്.
ടെലസ്കോപ്പിലെ മിഡ് ഇൻഫ്രാറെഡ് ഇൻസ്ട്രുമെന്റ് അഥവാ മിരി ഉപയോഗിച്ചാണ് ജ്യോതിശാസ്ത്രജ്ഞർ ഇൻഫ്രാറെഡ് ലൈറ്റിന്റെ രൂപത്തിൽ ഈ ഗ്രഹത്തിൽ നിന്നും പുറന്തള്ളപ്പെടുന്ന താപോർജ്ജം അളക്കാൻ ശ്രമിച്ചത്. ഒരു എക്സോപ്ലാനറ്റിൽ നിന്നുള്ള ഏതെങ്കിലും തരത്തിലുള്ള പ്രകാശം ടെലസ്കോപ്പ് ഉപയോഗിച്ച് കണ്ടെത്തുന്നത് ഇതാദ്യമാണ്. മാത്രമല്ല, TRAPPIST-1 പോലെ ചെറിയ, സജീവ നക്ഷത്രങ്ങളെ ഭ്രമണം ചെയ്യുന്ന ഗ്രഹങ്ങളിൽ ജീവനെ പിന്താങ്ങുന്നതിനാവശ്യമായ അന്തരീക്ഷം ഉണ്ടോ എന്ന് കണ്ടെത്തുന്നതിൽ ഈ കണ്ടുപിടിത്തം ഒരു നാഴികക്കല്ലാണ്. ഈ എക്സോപ്ലാനറ്റിൽ അന്തരീക്ഷം ഇല്ല എന്നാൽ അവിടെ വെള്ളവും കോസ്മിക് കിരണങ്ങളിൽ നിന്ന് ജീവജാലങ്ങൾക്ക് സംരക്ഷണം നൽകുന്നതിനാവശ്യമായ സംവിധാനങ്ങളും ഇല്ലെന്ന് വേണം അനുമാനിക്കാൻ.
ഏതാണ്ട് ഭൂമിയുടെ വലുപ്പമുള്ള ഏഴ് ഗ്രഹങ്ങളാണ് ട്രാപ്പിസ്റ്റ് സൗരയൂഥത്തിൽ ഉള്ളത്. ഇതിൽ അതിന്റെ നക്ഷത്രത്തോട് ഏറ്റവും അടുത്തുള്ള ഗ്രഹമാണ് TRAPPIST-1 b. അതുകൊണ്ട് തന്നെ കടുത്ത സൗരവികിരണവും ഈ ഗ്രഹത്തിന് നേരിടേണ്ടി വരും. അതായത് ഏതാണ്ട് ഭൂമിയുടേതിനേക്കാൾ നാല് മടങ്ങ് അധികം. ഇതുകൊണ്ടായിരിക്കും ഈ ഗ്രഹത്തിൽ അന്തരീക്ഷം ഇല്ലാത്തതെന്ന് ശാസ്ത്രജ്ഞർ അനുമാനിക്കുന്നു.
