“ഇന്നത്തെ കാലത്ത് കുട്ടികൾക്ക് എന്താ ദേഷ്യം, പണ്ട് ഇതുപോലെ ഒന്നും അല്ല, അച്ഛനും അമ്മയും കണ്ണുരുട്ടിയാൽ തന്നെ കുട്ടികൾ പേടിച്ച് ഓടുമായിരുന്നു”, ഈ ഡയലോഗ് കുട്ടികളുള്ള വീടുകളിലെ അച്ഛനമ്മമാരുടെയും മുത്തശ്ശീമുത്തച്ഛന്മാരുടെയും അയൽപക്കക്കാരുടെയുമെല്ലാം പതിവ് ഡയലോഗുകളിൽ ഒന്നായിരിക്കും. അവർ പറയുന്നത് ശരിയാണ്. പണ്ടത്തെ കാലത്തെ കുട്ടികളിൽ നിന്നും ഏറെ വ്യത്യസ്തരാണ് ഇന്നത്തെ കാലത്തെ കുട്ടികൾ. അവർ വളരെ വേഗം കോപാകുലരാകുകയും അക്രമാസക്തരാകുകയുമൊക്കെ ചെയ്യുന്നു. പണ്ടുകാലത്തെ പോലെ കണ്ണുരുട്ടിയും വടിയെടുത്ത് പേടിപ്പിച്ചും അവരെ ശാന്തരാക്കുക പ്രയാസമാണ്. ഇപ്പറയുന്ന അച്ഛനമ്മമാരും മുത്തശ്ശീമുത്തച്ഛന്മാരും കുട്ടികളായിരിക്കുമ്പോൾ ഉണ്ടായിരുന്നു സാമൂഹിക പശ്ചാത്തലമല്ല ഇന്നുള്ളതെന്ന് മനസിലാക്കി വേണം ഇത്തരം പ്രശ്നങ്ങളെ സമീപിക്കാൻ.
കുട്ടികളിലെ അക്രമവാസന വളരെ സങ്കീർണ്ണമായ ഒരു വിഷയമാണ്. അതിന് പിന്നിൽ പല കാരണങ്ങളും ഉണ്ടാകാം. അതുകൊണ്ടുതന്നെ അക്രമാസക്തനായി നിൽക്കുന്ന കുട്ടികളെ ശാന്തരാക്കുക എങ്ങനെയെന്നത് അപ്പോഴുള്ള സാഹചര്യങ്ങളെ അനുസരിച്ചിരിക്കും. എങ്കിലും പൊതുവേ, അക്രമാസക്തരായി നിൽക്കുന്ന കുട്ടികളെ സമാധാനപ്പെടുത്തുന്നതിന് മുമ്പായി ഇക്കാര്യങ്ങൾ ഓർത്തുവെക്കുന്നത് നല്ലതാണ്.
ശാന്തത കൈവിടാതിരിക്കുക: ദേഷ്യം കൊണ്ട് കുട്ടികൾ ഓരോന്ന് കാട്ടിക്കൂട്ടുമ്പോൾ മാതാപിതാക്കളും അതിനനുസരിച്ച് അവരോട് ദേഷ്യം കാണിച്ചാൽ രംഗം വഷളാകുകയേയൂള്ളു. അക്രമസാക്തനായി നിൽക്കുന്ന ഒരു കുട്ടിയോട് ഇടപെടുമ്പോൾ ശാന്തത കൈവിടാതിരിക്കുകയെന്നത് വളരെ പ്രധാനമാണ്. അച്ഛനോ അമ്മയോ ബന്ധുക്കളോ ആരുമായിക്കൊള്ളട്ടെ തങ്ങളോട് ദേഷ്യപ്പെടാതെ, സമാധാനിപ്പിക്കാൻ വരുന്നത് കാണുമ്പോൾ കുട്ടികളും ഒന്നടങ്ങും.
അവരുടെ വികാരങ്ങളെ കൂടി പരിഗണിക്കുക: ദേഷ്യം, അവർ വിചാരിച്ച കാര്യങ്ങൾ നടക്കാത്തത് കൊണ്ടുള്ള നിരാശ, മറ്റെന്തെങ്കിലും നെഗറ്റീവ് വികാരങ്ങൾ എന്നിവ കൊണ്ടായിരിക്കും കുട്ടികൾ പൊടുന്നനെ അക്രമാസക്തരാകുന്നത്. ഇവിടെ കുട്ടികളുടെ ഭാഗത്ത് നിന്ന് ചിന്തിക്കാൻ ശ്രമിക്കുക. അവരുടെ വശം മനസിലാക്കുക. അവരുടെ വികാരങ്ങൾ കൂടി പരിഗണിക്കുക. അതുകാണുമ്പോൾ കുട്ടികൾ ശാന്തരാകും.
അൽപ്പനേരം അവരെ അവരുടെ വഴിക്ക് വിടുക: ഒരു കുട്ടി വികാരാധീനനാകുകയോ അസ്വസ്ഥനാകുകയോ ചെയ്യുമ്പോൾ സമാധാനപ്പെടാനുള്ള അവസരം അവർക്ക് വേണ്ടി ഒരുക്കുകയെന്നത് പ്രധാനമാണ്. അതായത്, അവരെ കുറച്ചുനേരം അവരുടെ വഴിക്ക് വിടുക. പിറകേ പോയി വഴക്ക് പറയുകയും അടിക്കുകയും ഒക്കെ ചെയ്യുമ്പോൾ അവർ കൂടുതൽ കോപാകുലരാകുകയോ ഉള്ളൂ. മറിച്ച്, അവരെ തനിയെ വിട്ടാൽ ദേഷ്യമെല്ലാം മാറി സമാധാനത്തോടെ തിരികെ വരുന്നത് കാണാം.
ശ്രദ്ധതിരിച്ചുവിടുക: ചിലപ്പോഴൊക്കെ അവരെ പ്രകോപിതരാക്കിയ സാഹചര്യത്തിൽ നിന്നും വിഷയത്തിൽ നിന്നും ശ്രദ്ധ തിരിച്ചുവിടുന്നത് രംഗം ശാന്തമാക്കാൻ സഹായിക്കും. മറ്റെന്തെങ്കിലും അവർക്കിഷ്ടപ്പെട്ട കാര്യങ്ങളോ ആക്ടിവിറ്റികളോ അവതരിപ്പിക്കുക. അല്ലെങ്കിൽ ഡീപ് ബ്രീത്തിംഗ് പോലുള്ള ശ്വസനവ്യായാമങ്ങൾ ചെയ്യിക്കുക.
ആവശ്യമെങ്കിൽ വിദഗ്ധരുടെ സേവനം തേടുക: കുട്ടികൾ സ്ഥിരമായി അക്രമാസക്തരാകുകയും അത് വളരെ മോശം സാഹചര്യങ്ങളിലേക്ക് പോകുകയും ചെയ്യുകയാണെങ്കിൽ വിദഗ്ധരുടെ സേവനം തേടുകയാണ് ഉചിതം. കുട്ടികൾക്കുള്ള സൈക്കോളജിസ്റ്റുകൾ അല്ലെങ്കിൽ തെറാപ്പിസ്റ്റുകൾ എന്നിവർക്ക് വളരെ പെട്ടെന്ന് കുട്ടികളുടെ മനസ് മനസിലാക്കാൻ കഴിയും. അക്രമവാസനയ്ക്ക് പിന്നിലെ കാരണങ്ങൾ വേരോടെ പിഴുത് കളഞ്ഞാലേ കുട്ടികൾ വീണ്ടും അക്രമാസക്തരാകാതിരിക്കൂ.
