സ്‌കൂൾ തുറന്നു, ഇനി പഠനത്തിന്റെ നാളുകളാണ്. മാതാപിതാക്കളെ സംബന്ധിച്ചിടത്തോളം തലവേദന ഇരട്ടിയാകും എന്ന് ചുരുക്കം. കാരണമുണ്ട്, ഇത്രനാൾ അവധിയുടെ പേരിൽ കളിച്ചും ഉല്ലസിച്ചും ടിവി കണ്ടും കമ്പ്യൂട്ടറിൽ കളിച്ചുമൊക്കെ നടന്നു. പെട്ടന്ന് ഇനി പഠനം മാത്രം മതി, പുസ്തകമെടുത്തോ എന്ന് പറഞ്ഞാൽ കുട്ടികൾ കേൾക്കുമോ? ഇല്ലേയില്ല!. എന്ന് കരുതി പുസ്തകം വായിച്ചാൽ മാത്രമേ അറിവുണ്ടാകൂ എന്ന് കരുതരുത്. അങ്ങനെ ചിന്തിക്കുന്നവർ വിഷ്വൽ ലേണിംഗ്, ഓഡിറ്ററി ലേണിംഗ് എന്നിവ എന്താണെന്നു അറിഞ്ഞിരിക്കണം.
ഓരോ കുട്ടിക്കും വ്യത്യസ്‌തമായ പഠനരീതിയുണ്ട്. കുട്ടിയുടെ പഠന രീതി വിശകലനം ചെയ്യുകയും മനസ്സിലാക്കുകയും ചെയ്യുക എന്നത് ഏറെ പ്രധാനമാണ്. പഠിക്കുമ്പോൾ കഴിയുന്നത്ര അഞ്ച് ഇന്ദ്രിയങ്ങൾ ഉപയോഗിക്കുന്നത് നിങ്ങളുടെ തലച്ചോറിന്റെ കൂടുതൽ ഭാഗങ്ങൾ ഉപയോഗിക്കാനും വിവരങ്ങൾ നന്നായി നിലനിർത്താനും സഹായിക്കുന്നു.എല്ലാ ഇന്ദ്രിയങ്ങളിലും തുല്യ ശക്തിയുണ്ട്. പഠനത്തിനായി നമ്മുടെ പ്രബലമായ ഇന്ദ്രിയങ്ങൾ ഉപയോഗിക്കുന്നത് എളുപ്പത്തിലുള്ള പഠനത്തിന് സഹായകമാകും.
എല്ലാകുട്ടികൾക്കും ഒരേ ഗ്രഹണ ശക്തിയല്ല ഉണ്ടാകുക. ചിലർക്ക് കാര്യങ്ങൾ കണ്ടും കേട്ടും മനസിലാക്കാനുള്ള കഴിവുണ്ട്. പഠനം ആരംഭിക്കും മുൻപായി നിങ്ങളുടെ കുട്ടി ഏത് തരം പഠനമാണ് ഇഷ്ടപ്പെടുന്നത് എന്ന് മനസിലാക്കണം. അതിനായി വിഷ്വൽ ലേണിംഗ്, ഓഡിറ്ററി ലേണിംഗ് എന്നീ ആശയങ്ങൾ അടുത്തറിയാം.
വിഷ്വൽ ലേണിംഗ്
കുട്ടികൾക്ക് മുന്നിൽ കാണുന്ന കാര്യങ്ങൾ മനസിലാക്കാനും പഠിക്കാനും കഴിയുമെന്നാണ് ഇതുകൊണ്ടു അർത്ഥമാക്കുന്നത്. അത്തരം കുട്ടികൾക്കായി പഠന പ്രക്രിയയിൽ ദൃശ്യങ്ങൾ ഉൾപ്പെടുത്തുന്നത് സഹായകരമാണ്. മുന്നിൽ കാണുന്ന കാഴ്ചകളിലൂടെ ഇവർ കാര്യങ്ങൾ മനസിലാക്കുന്നു. അത് ഒരു പക്ഷെ ഒരു ഡയഗ്രമോ ടിവി ദൃശ്യമോ എന്തും ആകാം. അവരുടെ മസ്തിഷ്കത്തിന്റെ വിഷ്വൽ പ്രോസസിങ് വളരെ ശക്തമാണ്.
ഓഡിറ്ററി ലേണിംഗ്
ഇത്തരം പഠനം ഇഷ്ടപ്പെടുന്ന കുട്ടികളിൽ തലച്ചോറിലെ ഓഡിറ്ററി അസോസിയേഷൻ ഭാഗങ്ങൾ വളരെ ശക്തമാണ്. ഈ കുട്ടികൾ ക്ലാസ്സിൽ വളരെ ശ്രദ്ധയുള്ളവരും ടീച്ചർ പറയുന്നത് ശ്രദ്ധാപൂർവം ശ്രദ്ധിക്കുന്നവരുമാണ്. ടെക്സ്റ്റ് ബുക്ക് പഠനത്തേക്കാൾ അവരെ സ്വാധീനിക്കുക അധ്യാപകർ പറയുന്നതും വിവരിക്കുന്നതുമായ കാര്യങ്ങളായിരിക്കും. മറ്റ് കുട്ടികൾ ഉറക്കെ വായിക്കുന്നത് കേൾക്കാനും കാര്യങ്ങൾ നന്നായി മനസ്സിലാക്കാനും അവർക്ക് കഴിയും. ഇത്തരത്തിൽ ഉച്ചത്തിൽ വായിച്ച് പഠിക്കാൻ കഴിയുന്ന കുട്ടികൾക്ക് ഓഡിയോബുക്കുകൾ വളരെ ഫലപ്രദവും സഹായകരവുമാണ്.അതിനാൽ കൂടുതൽ സമയം ടിവി കാണുന്നു, ലാപ്ടോപ്പ് നോക്കുന്നു എന്നൊക്കെ പറഞ്ഞു വിലക്കും മുൻപായി കുട്ടികൾ ഏത് തരം പഠനം ആഗ്രഹിക്കുന്നവരാണ് എന്നറിയുക.
Discussion about this post