തിരുവനന്തപുരം: കേരളത്തിൽ അടുത്ത 48 മണിക്കൂറിനുള്ളിൽ കാലവർഷം എത്തുമെന്ന് കാലാവസ്ഥാ നിരീക്ഷണ കേന്ദ്രം. മിനിക്കോയ് തീരത്തായുള്ള കാലവർഷം നിലവിൽ ദുർബലമാണെങ്കിലും കേരളാ തീരത്തേക്ക് എത്താൻ അനുകൂല സാഹചര്യം ഉണ്ടെന്നാണ് കാലാവസ്ഥാ നിരീക്ഷണ കേന്ദ്രം അറിയിച്ചിരിക്കുന്നത്. സംസ്ഥാനത്തിന്റെ വിവിധ ഭാഗങ്ങളിൽ ഇന്ന് പരക്കെ മഴ പെയ്യുമെന്നും മുന്നറിയിപ്പുണ്ട്.
തെക്കൻ, മധ്യ കേരളത്തിൽ വരും മണിക്കൂറുകളിൽ മഴ ശക്തമാകും. വൈകിട്ടോടെ വടക്കൻ കേരളത്തിലേക്കും മഴ എത്തും. തിരുവനന്തപുരം, കൊല്ലം, പത്തനംതിട്ട, ആലപ്പുഴ ജില്ലകളിൽ യെല്ലോ അലർട്ട് പ്രഖ്യാപിച്ചിട്ടുണ്ട്. ഉയർന്ന തിരമാലകൾക്കും കാറ്റിനും സാധ്യതയുള്ളതിനാൽ കേരള, കർണാടക ലക്ഷദ്വീപ് തീരങ്ങളിൽ മത്സ്യബന്ധനത്തിനും കടലിൽ പോകുന്നതിനും വിലക്കുണ്ട്.
അറബിക്കടലിലുള്ള തീവ്ര ചുഴലിക്കാറ്റ് അടുത്ത 12 മണിക്കൂറിനുള്ളിൽ അതിതീവ്രമാകും. മഴയ്‌ക്കൊപ്പം ശക്തമായ ഇടിമിന്നലിനും 40 കി.മീ വരെ വേഗതയിൽ വീശിയടിച്ചേക്കാവുന്ന ശക്തമായ കാറ്റിനും സാധ്യതയുണ്ടെന്നും കേന്ദ്ര കാലാവസ്ഥ വകുപ്പ് അറിയിച്ചു.
Discussion about this post