കോട്ടയം: പുതുപ്പള്ളി നിയമസഭാ മണ്ഡലത്തിലുണ്ടായ കനത്ത തോൽവിയിൽ വിശദീകരണവുമായി മണ്ഡലത്തിലെ തിരഞ്ഞെടുപ്പ് പ്രചാരണങ്ങൾക്ക് ചുക്കാൻപിടിച്ച മന്ത്രി വിഎൻ വാസവൻ. തോൽവിയിൽ ഞെട്ടലില്ലെന്നും ഇതിനേക്കാൾ വലിയ തോൽവി ഉണ്ടായിട്ടുണ്ടെന്നും അദ്ദേഹം പറഞ്ഞു. അടിയന്തരാവസ്ഥയ്ക്ക് ശേഷം നടന്ന തിരഞ്ഞെടുപ്പിലും 2019 ലെ ലോക്സഭാ തിരഞ്ഞെടുപ്പിലും ഇടതുപക്ഷത്തിന് തോൽവി ഉണ്ടായിട്ടുണ്ടെന്ന് മന്ത്രി പറഞ്ഞ. സിപിഎം വോട്ട് എവിടെയും ചോർന്നിട്ടില്ലെന്നും മന്ത്രി കൂട്ടിച്ചേർത്തു.
ഇത് പ്രത്യോക സാഹചര്യത്തിൽ നടന്ന തിരഞ്ഞെടുപ്പാണ്. അന്ത്യകർമ്മങ്ങൾ പൂർത്തീകരിക്കുന്നതിന് മുൻപ് ഒരു തിരഞ്ഞെടുപ്പ് പ്രഖ്യാപിച്ചത് രാഷ്ട്രീയ കേരളത്തിൽ ഇതിന് മുൻപ് ഉണ്ടായിട്ടില്ല. അതിനെ സംശയിക്കേണ്ടി ഇരിക്കുന്നുവെന്ന് തിരഞ്ഞെടുപ്പ് പ്രഖ്യാപന സമയത്തേ ഇടതുപക്ഷം പറഞ്ഞതാണെന്ന് മന്ത്രി ചൂണ്ടിക്കാട്ടി. തിരഞ്ഞെടുപ്പ് കമ്മീഷന്റെ തീരുമാനത്തെ ചോദ്യം ചെയ്യുന്നില്ലെന്നും പക്ഷേ അതിലേക്ക് പ്രേരിപ്പിച്ച എന്തെങ്കിലും ഘടകങ്ങളുണ്ടോ എന്നോ അതിൽ കോൺഗ്രസും ബിജെപിയും തമ്മിൽ എന്തെങ്കിലും ബന്ധം കാണുമോ എന്നും സംശയമുണ്ടെന്ന് അദ്ദേഹം പറഞ്ഞു.
സഹതാപതരംഗം ജനങ്ങളിൽ ഉണ്ടായി. അതിന്റെ പ്രകടനമാണ് തോൽവിയ്ക്ക് കാരണം. അല്ലാതെ മറ്റ് ഘടകങ്ങളല്ലെന്നും രാഷ്ട്രീയമായ ക്ഷീണമോ അല്ലെന്നും ബിജെപിയുടെ വോട്ട് കച്ചവടവുമാണ് കാരണമെന്ന് മന്ത്രി വ്യക്തമാക്കി. സർക്കാർ വിരുദ്ധ വികാരമില്ലെന്നും, അങ്ങനെ ഉണ്ടായിരുന്നുവെങ്കിൽ വോട്ട് അടിത്തറ തന്നെ നഷ്ടപ്പെടുമായിരുന്നുവെന്നും അദ്ദേഹം ചൂണ്ടിക്കാട്ടി.
Discussion about this post