72 ദിവസങ്ങൾ ….. ദിവസങ്ങളോളം അർജുന്റെ തിരിച്ചു വരവിനായി പ്രതീക്ഷയോടെ കാത്തിരിക്കാത്ത മലയാളികൾ ഉണ്ടാവില്ല. ആരുമല്ലായിരുന്ന അർജുനെ കാണാതായത് മുതൽ എല്ലാവരുടെയും പ്രിയപ്പെട്ടവനായി.. ഒന്ന് തിരിച്ച് വരാൻ കുറെ യധികം പ്രതീക്ഷിച്ചു .. ഒടുവിൽ ഗംഗാവലിപുഴയുടെ അടിത്തട്ടിൽ തന്റെ പ്രിയപ്പെട്ട ലോറിക്കുള്ളിൽ അർജുനെ കണ്ടെത്തിയിരിക്കുകയാണ്.
‘മരിച്ചുവെന്ന് വേദനിക്കാനെങ്കിലും തിരികെക്കിട്ടിയല്ലോ. ഒരു പിടി ചാരമാകാനെങ്കിലും ഒരോർമ. പ്രിയപ്പെട്ട അർജുൻ, ഇനി നിങ്ങൾ മലയാളികളുടെ മനസ്സിൽ ജീവിക്കും,’ എന്നാണ് ഈ വാർത്തയോട് പ്രതികരിച്ച് മഞ്ജു വാര്യർ ഫേസ്ബുക്കിൽ കുറിച്ചത്.
രണ്ടുമാസത്തിലേറെയായി പലഘട്ടങ്ങളിലായി നടത്തിയ തിരച്ചിലിനൊടുവിലാണ് അർജുന്റെ ലോറി കണ്ടെത്തിയത്. ജൂലൈ 16ന് രാവിലെ 8:45നുണ്ടായ മണ്ണിടിച്ചിലിലാണ് അർജുൻ ഉൾപ്പെടെ മൂന്നുപേരെ കാണാതായത്. അർജുന്റെ ലോറിക്കു പുറമേ മറ്റൊരു ടാങ്കറും കാണാതായിരുന്നു. ഗോവയിൽനിന്ന് ഡ്രഡ്ജർ എത്തിച്ചതോടെ ശനിയാഴ്ച രാവിലെയാണ് കാണാതായ അർജുനടക്കം മൂന്നുപേർക്കായുള്ള തിരച്ചിൽ ഗംഗാവലി പുഴയിൽ പുനരാരംഭിച്ചത്. കാണാതായ രണ്ട് പേർക്കുള്ള തിരച്ചിൽ തുടരുമെന്ന് അധികൃതർ അറിയിച്ചു.
