ഓവൻ വേണ്ട,മുട്ടയും മൈദയും വേണ്ട…വീട്ടിലുണ്ടാക്കാം പഞ്ഞിപോലത്തെ വായിലിട്ടാൽ അലിയുന്ന കേക്ക്

ക്രിസ്തുമസും ന്യൂയറും തുടങ്ങി ആഘോഷങ്ങളുടെ പെരുമ്പറയാണ് ഇനി വരാൻ ഇരിക്കുന്നത്. ആഘോഷവേളകളിൽ വീട്ടിൽ തന്നെ ഉണ്ടാക്കിയ മധുരം പങ്കിട്ട് കളറാക്കിയാലോ? ആഘോഷവേളകളിലും അല്ലാതെയും ഉണ്ടാക്കി കഴിക്കാവുന്ന കേക്കുകളുടെ റെസിപ്പികൾ നോക്കാം.

ഗോതമ്പ് പൊടി,കൊക്കോ പൗഡർ,ബട്ടർ(വെണ്ണ),ശർക്കര,തൈര്,പാൽ,ഉപ്പ്,ബേക്കിംഗ് സോഡ,ബോക്കിംഗ് പൗഡർ,വാനില എസൻസ്,ചോക്കോ ചിപ്‌സ് എന്നിവയാണ് ഇതിന് ആവശ്യം. തയ്യാറാക്കുന്ന വിധം- ഒരു ബൗളിലേക്ക് കാൽകപ്പ് ബട്ടർ ഉരുക്കിയത്,രണ്ട് കപ്പ് ശർക്കര പൊടിച്ചത് കാൽകപ്പ് പുളിയില്ലാത്ത കട്ടി തൈര് എന്നിവ ചേർത്ത് ഇളക്കുക. ഇതിലേക്ക് അര കപ്പ് തണുപ്പിക്കാത്ത പാലും ചേർത്ത് ഇളക്കുക. മൂന്ന് ടേബിൾസ്പൂൺ കൊക്കോ പൗഡർ,ഒരു കപ്പ് ഗോതമ്പ് പൊടി,കാൽടീസ്പൂൺ ബേക്കിംഗ് സോഡ,ഒരു ടീസ്പൂൺ ബേക്കിംഗ് പൗഡർ,ഒരു ടീസ്പൂൺ വാനില എസൻസ്, കാൽ ടീസ്പൂൺ ഉപ്പ് എന്നിവ ചേർത്ത് ഇളക്കുക. ബട്ടർ പേപ്പർ വച്ച പാത്രത്തിലേക്ക് ഇതൊഴിക്കുക. മുകളിലായി ചോക്കോ ചിപ്‌സ് കൂടി ചേർക്കുക,10 മിനിറ്റ് പ്രീഹീറ്റ് ചെയ്ത് ഒരു പാത്രത്തിലേക്ക് ഇറക്കിവച്ച് കുറഞ്ഞ തീയിൽ മുക്കാൽ മണിക്കൂർ വേവിക്കുക. തണുത്തതിന് ശേഷം പാത്രത്തിൽ നിന്ന് മാറ്റുക. രുചികരമായ ചോക്ലേറ്റ് കേക്ക് തയ്യാർ.

ഇനി ക്രിസ്തുമസ്,ന്യൂയർ ആഘോഷങ്ങളിലെ പ്രധാനചേരുവയായ പ്ലംകേക്ക് എളുപ്പത്തിൽ ഉണ്ടാക്കുന്ന രീതി നോക്കാം. ആവശ്യമായ ചേരുവകൾ.

മൈദ- 1 1/2 കപ്പ്
ബേക്കിങ് പൗഡർ- 1 ടേബിൾസ്പൂൺ
ബേക്കിങ് സോഡ- 1/2 ടേബിൾസ്പൂൺ
ഡ്രൈ ഫ്രൂട്ട്‌സ്- 1/2 കപ്പ്
ഓറഞ്ച് ജ്യൂസ്- 1/4 കപ്പ്
പഞ്ചസാര പൊടിച്ചത്- 6 ടേബിൾ സ്പൂൺ
ജാതിക്ക പൊടിച്ചത്- 1/2 ടീസ്പൂൺ
കറുവാപ്പട്ട പൊടിച്ചത്- 1/4 ടീസ്പൂൺ
വെജിറ്റബിൾ ഓയിൽ- ആവശ്യത്തിന്
വാനില എസൻസ്- 1 ടേബിൾസ്പൂൺ
പാൽ- 1/2 കപ്പ്

തയ്യാറാക്കുന്ന വിധം-

ഉണക്കമുന്തിരി,കശുവണ്ടി എന്നിവയിലേക്ക് കാൽ കപ്പ് ഓറഞ്ച് ജ്യൂസ് ചേർത്ത് ഒരു മണിക്കൂർ മാറ്റി വയ്ക്കാം. ഒരു സ്പൂൺ പഞ്ചസാരയിൽ ഒരു സ്പൂൺ വെള്ളം ഒഴിച്ച് അലിയിക്കുക, പഞ്ചസാര അലിഞ്ഞതിന് ശേഷം അതിലേക്ക് കാൽകപ്പ് വെള്ളം കൂടി ഒഴിക്കാം, ഇത് തിളച്ചു വരുമ്പോൾ അടുപ്പിൽ നിന്നും മാറ്റാം. കുതിർത്തുവച്ച ഡ്രൈ ഫ്രൂട്ട്‌സിൽ ഒരു ടേബിൾ സ്്പൂൺ മൈദപ്പൊടി ചേർത്തിളക്കാം. അര കപ്പ് പാൽ തിളപ്പിച്ചടുക്കാം. ഇതിലേക്ക് കാൽ ഗ്ലാസ് വെജിറ്റബിൾ എണ്ണ കൂടി ചേർക്കാം. ബാക്കി വന്ന മൈദപ്പൊടിയും അര ടേബിൾസ്പൂൺ ബേക്കിങ് സോഡയും ഒരു ടേബിൾസ്പൂൺ ബേക്കിങ് പൗഡറും, ഒരു നുള്ള് ജാതിക്ക പൊടിച്ചതും, കാൽ ടീസ്പൂൺ കറുവാപ്പട്ട പൊടിച്ചതും അരിച്ചെടുത്ത് പാലിലേക്ക് ചേർക്കാം. പാലിലേക്ക് ഡ്രൈ ഫ്രൂട്‌സും പഞ്ചസാര അലിയിച്ചു വച്ചതും ചേർത്തിളക്കി യോജിപ്പിക്കാം. കുക്കറെടുത്ത് ഉള്ളിൽ വെണ്ണ നന്നായി പുരട്ടുക.അതിലേക്ക് ഒരു ബട്ടർ പേപ്പർ വയ്ക്കുക.തയ്യാറാക്കിയ മാവ് അതിലേക്ക് മാറ്റാം. കുറച്ച് ഉണക്കമുന്തിരിയും കശുവണ്ടിയും മുകളിലായി ചേർക്കാം. ഒരു പാൻ അടുപ്പിൽ വച്ച് അതിലേക്ക് കുക്കർ വയ്ക്കാം. വാഷർ മാറ്റിയതിനു ശേഷം കുക്കർ അടയ്ക്കാം. കുറഞ്ഞ തീയിൽ 20 മിനിറ്റ് വേവിക്കാം. തുടർന്ന് ചൂട് തണഞ്ഞതിന് ശേഷം മാത്രം പാത്രത്തിൽ നിന്നും മാറ്റുക.