വീർ ബാൽ ദിവസ് വിശ്വാസത്തിന്റെ അമരമാതൃക

സിഖ് മതത്തിലെ പത്താമത്തെയും അവസാനത്തെയും ഗുരുവായിരുന്ന ഗുരു ഗോവിന്ദ് സിംഗ് സിഖ് ചരിത്രത്തിലെ ഏറ്റവും പ്രധാനപ്പെട്ട വ്യക്തികളിൽ ഒരാളാണ്. ഗുരു ഗോബിന്ദ് സിംഗിന്റെ അമ്മയുടെയും പുത്രന്മാരായ അജിത് സിംഗ് (17) ജുജാർ സിംഗ് (13) സാഹിബ്സാദ ഫത്തേ സിംഗ് സാഹിബ്സാദ സോറാവർ സിംഗ് എന്നിവരുടെയും രക്തസാക്ഷിത്വം ഇന്ത്യൻ ചരിത്രത്തിലെ ഏറ്റവും ഹൃദയസ്പർശിയായ സംഭവങ്ങളിലൊന്നാണ്.

സ്വന്തം വിശ്വാസത്തിനും ധർമ്മത്തിനും വേണ്ടി ജീവൻ ത്യജിച്ച നാല് കുമാരന്മാരുടെയും ഗുരു ഗോബിന്ദ് സിംഗിന്റെ അമ്മയുടെയും കഥ ഇന്നും ലോകത്തിന് പ്രചോദനമായി നിലകൊള്ളുന്നു.ഈ മഹത്തായ ത്യാഗത്തെ അനുസ്മരിക്കാനും വരും തലമുറകൾക്ക് പകർന്നു നൽകാനുമായി 2022 ജനുവരി 9-ന് പ്രധാനമന്ത്രി നരേന്ദ്ര മോദി ഒരു ചരിത്ര പ്രധാനമായ പ്രഖ്യാപനം നടത്തി – ഡിസംബർ 26 ‘വീർ ബാൽ ദിവസ്’ ആയി ആചരിക്കുമെന്ന പ്രഖ്യാപനം.

സാഹിബ്‌സാദാ സൊറാവർ സിംഗും , സാഹിബ്‌സാദാ ഫത്തേ സിംഗും ജീവനോടെ ചുവരിൽ കുഴിച്ചു മൂടപ്പെട്ട ദിവസമായ ഡിസംബർ 26 ആണ് വീർ ബാൽ ദിവസ് ആഘോഷിക്കാൻ വേണ്ടി നരേന്ദ്ര മോദി തിരഞ്ഞെടുത്തത് എന്നത് ശ്രദ്ധേയമാണ്. നരേന്ദ്ര മോദിയുടെ പ്രഖ്യാപനത്തെ തുടർന്ന് ഗുരു ഗോബിന്ദ് സിംഗിന്റെ അമ്മയുടെയും അദ്ദേഹത്തിന്റെ നാല് ആൺമക്കളുടെയും ത്യാഗം 2022 ഡിസംബർ 26-ന് ഡൽഹിയിലെ മേജർ ധ്യാൻ ചന്ദ് മെമ്മോറിയൽ നാഷണൽ സ്റ്റേഡിയത്തിൽ ആദ്യമായി വീർ ബാൽ ദിവസ് എന്ന പേരിൽ ആചരിക്കുകയുണ്ടായി .

വീർ ബാൽ ദിവസിന്റെ ആചരണത്തോട് കൂടി മുഗൾ ഭരണാധികാരികളുടെ മതപരിവർത്തന നയങ്ങൾക്കെതിരെയുള്ള ശക്തമായ ചെറുത്തു നിൽപ്പ് നടത്തിയ സാഹിബ്സാദേകളുടെ ത്യാഗം ലോകം മുഴുവൻ കൊണ്ടാടപ്പെട്ടു .

17-ാം നൂറ്റാണ്ടിന്റെ അവസാന കാലഘട്ടത്തിൽ, മുഗൾ സാമ്രാജ്യത്തിന്റെ ഭരണം ഔറംഗസേബിന്റെ കൈകളിലായിരുന്നു. കടുത്ത മതപരിവർത്തന നയങ്ങളും മറ്റു മതസ്ഥരോടുള്ള അസഹിഷ്ണുതയും അദ്ദേഹത്തിന്റെ ഭരണകാലത്തെ സവിശേഷതകളായിരുന്നു.
ഇക്കാലത്താണ് ഒൻപതാമത്തെ സിഖ് ഗുരുവായ ഗുരു തേഗ് ബഹദൂറിനെ ഇസ്ലാം മതം സ്വീകരിക്കാൻ വിസമ്മതിച്ചതിന് ഔറംഗസേബ് വധിക്കുന്നത്. പിതാവിന്റെ രക്തസാക്ഷിത്വത്തിനു ശേഷം പത്താമത്തെ സിഖ് ഗുരുവായി ചുമതലയേറ്റ ഗോബിന്ദ് സിംഗ്, മുഗൾ ഭരണാധികാരികളുടെ അനീതിക്കെതിരെ പ്രതികരിച്ചു.

മുഗൾ ഭരണാധികാരികളുടെ മതപരിവർത്തന നയങ്ങൾക്കെതിരെ പ്രതികരിച്ച ഗുരു ഗോബിന്ദ് സിംഗ് 1699-ൽസ്വന്തം വിശ്വാസത്തെയും ധർമ്മത്തെയും സംരക്ഷിക്കുന്നതിനും മുഗളർക്കെതിരെ പോരാടാനുമായി ‘ഖാൽസ’ എന്ന സിഖ് യോദ്ധാക്കളുടെ സംഘടന രൂപീകരിച്ചു. സിഖ് സമുദായത്തെ സംരക്ഷിക്കാനും സ്വാതന്ത്ര്യത്തിനായി പോരാടാനുമായി രൂപീകരിച്ച ഈ സംഘടന മുഗളന്മാർക്ക് വലിയ വെല്ലുവിളിയായി മാറി. തുടർന്നുള്ള കാലത്ത് മുഗൾ സൈന്യവുമായി നിരവധി ഏറ്റുമുട്ടലുകൾ നടന്നു.

1704-ൽ മുഗൾ സൈന്യത്തിന്റെയും അവരുടെ സഖ്യകക്ഷികളുടെയും നിരന്തരമായ ആക്രമണങ്ങൾ മൂലം ഗുരു ഗോബിന്ദ് സിംഗും കുടുംബവും പഞ്ചാബിലെ ആനന്ദ്പുർ സാഹിബിൽ നിന്ന് പലായനം ചെയ്യേണ്ടി വന്നു.

ചാർ സാഹിബ്സാദേ എന്നറിയപ്പെടുന്ന നാല് പുത്രന്മാരുണ്ടായിരുന്ന ഗുരുവിന്റെ കുടുംബം ഈ പലായനത്തിനിടെ വേർപിരിയുകയായിരുന്നു. ഏറ്റവും ഇളയ രണ്ട് പുത്രന്മാരായ സാഹിബ്സാദ ഫത്തേ സിംഗും സാഹിബ്സാദ സോറാവർ സിംഗും അവരുടെ അമ്മൂമ്മയായ മാതാ ഗുജരിയും കുടുംബത്തിൽ നിന്ന് ഒറ്റപ്പെട്ടു പോയി.

പഴയ ആശ്രിതനായ ഗംഗു എന്നയാളുടെ കുടിലിൽ അവർ അഭയം തേടി. എന്നാൽ ഗംഗു അവരെ, ചതിച്ച് മുഗൾ സൈന്യത്തെ വിവരം അറിയിക്കുകയായിരുന്നു. മുഗൾ സൈന്യം അവരെ പിടികൂടി സിർഹിന്ദിലെ ഠണ്ഡാ ബുർജിൽ തടവിലാക്കി. അതേസമയം, ഗുരു ഗോബിന്ദ് സിംഗിനെ പിന്തുടർന്ന മുഗൾ സൈന്യം ചംകൗറിൽ വെച്ച് അദ്ദേഹത്തിന്റെ 40 സൈനികരെ ആക്രമിച്ചു. ഈ യുദ്ധത്തിൽ മൂത്ത പുത്രന്മാരായ സാഹിബ്സാദ അജിത് സിംഗ് (17) ജുജാർ സിംഗ് (13) എന്നിവർ വീരമൃത്യു വരിച്ചു.

സിർഹിന്ദിലെ മുഗൾ ഗവർണറായ വസീർ ഖാൻ, തടവിലായിരുന്ന ഇളയ കുട്ടികൾക്ക് ഒരു വാഗ്ദാനം നൽകി – ഇസ്ലാം മതം സ്വീകരിച്ചാൽ സുരക്ഷിതമായി പോകാം എന്ന വാഗ്ദാനം . എന്നാൽ കഠിനമായ പീഡനങ്ങൾക്കും ഭീഷണികൾക്കും വിധേയരായിട്ടും വെറും ഒൻപതും അഞ്ചും വയസ്സും മാത്രം പ്രായമുണ്ടായിരുന്ന സാഹിബ്സാദ ഫത്തേ സിംഗും സാഹിബ്സാദ സോറാവർ സിംഗും തങ്ങളുടെ വിശ്വാസം ഉപേക്ഷിക്കാൻ തയ്യാറായില്ല. “ഞങ്ങൾ ഞങ്ങളുടെ പിതാവിന്റെ മക്കളാണ്, ഞങ്ങളുടെ പിതാമഹന്റെ പേരക്കുട്ടികളാണ്. അവരുടെ പാതയിൽ നിന്ന് ഞങ്ങൾ പിന്മാറില്ല” എന്നായിരുന്നു അവരുടെ ധീരമായ മറുപടി

അവരുടെ ധീരതയും വിശ്വാസദാർഢ്യവും കണ്ട് ക്രുദ്ധനായ വസീർ ഖാൻ അവരെ ജീവനോടെ മതിൽ കെട്ടാൻ ഉത്തരവിട്ടു. മതിൽ കെട്ടി മുട്ടുവരെ എത്തിയപ്പോൾ ഇസ്ലാം മതം സ്വീകരിച്ചാൽ വെറുതെ വിടാം എന്ന് വീണ്ടും അവരെ അറിയിച്ചെങ്കിലും അവർ വിസമ്മതിച്ചു. ചെറിയ പ്രായത്തിലും അസാധാരണമായ ധൈര്യവും വിശ്വാസദാർഢ്യവും പ്രകടിപ്പിച്ച കുട്ടികൾ അവസാനം വരെ തങ്ങളുടെ ധർമ്മത്തിൽ ഉറച്ചു നിന്നു. ജീവനോടെ മതിൽ കെട്ടപ്പെട്ട അവർ ശ്വാസം മുട്ടി എങ്കിലും തങ്ങളുടെ വിശ്വാസം വെടിയാൻ തയ്യാറായില്ല. പെട്ടെന്നാണ് മതിൽ പൊളിഞ്ഞു വീണത്. തുടർന്ന് വളരെ ക്രൂരമായി അവരുടെ കഴുത്ത് അറുക്കപ്പെട്ടു.

തന്റെ കൊച്ചു മക്കളുടെ മരണ വാർത്ത കേട്ട അമ്മൂമ്മ മാതാ ഗുജരിയും അല്പസമയത്തിനകം ഹൃദയം പൊട്ടി മരിച്ചു.

ബാബ സോറാവർ സിംഗിനെയും ബാബ ഫത്തേ സിംഗിനെയും കുഴിച്ചിട്ട ചുവര് ഇന്നും പഞ്ചാബിലെ സിർഹിന്ദിൽ നിലനിൽക്കുന്നുണ്ട് .

വസീർ ഖാന്റെ പ്രലോഭനങ്ങൾക്ക് വഴങ്ങാതെ മരണത്തെ പുൽകിയ സാഹിബ്സാദ ഫത്തേ സിംഗിന്റെയും സാഹിബ്സാദ സോറാവർ സിംഗിന്റെയും രക്തസാക്ഷിത്വം അവരുടെ വിശ്വാസത്തോടുള്ള അചഞ്ചലമായ പ്രതിബദ്ധതയുടെ തെളിവാണ്. കഠിനമായ പീഡനങ്ങൾക്കും സമ്മർദ്ദങ്ങൾക്കും വിധേയരായിട്ടും, അവർ തങ്ങളുടെ വിശ്വാസം ഉപേക്ഷിക്കാൻ തയ്യാറായില്ല.പകരം ധീരതയോടെ മരണത്തെ പുൽകി എന്നത് എന്നത് അവരുടെ ധീരതയെയും നിശ്ചയദാർഢ്യത്തെയും സൂചിപ്പിക്കുന്നു.
അവരുടെ രക്തസാക്ഷിത്വം അചഞ്ചലമായ വിശ്വാസത്തിന്റെയും ത്യാഗത്തിന്റെയും ജീവിക്കുന്ന സാക്ഷ്യമാണ് . അതുകൊണ്ടു തന്നെയാണ് ഈ സംഭവം നടന്ന ഡിസംബർ 26 വീർ ബാൽ ദിവസായി തിരഞ്ഞെടുക്കപ്പെട്ടത്.

സാഹിബ്സാദേകളുടെ ത്യാഗം ഇന്ത്യൻ സ്വാതന്ത്ര്യ സമരത്തിന്റെ മുന്നോടിയായും കണക്കാക്കപ്പെടുന്നു. മുഗൾ ഭരണാധികാരികളുടെ മതപരിവർത്തന നയങ്ങൾക്കെതിരെയുള്ള അവരുടെ പ്രതിരോധം, പിൽക്കാലത്ത് ബ്രിട്ടീഷ് അധിനിവേശത്തിനെതിരെ പോരാടിയ സ്വാതന്ത്ര്യ സമര സേനാനികൾക്ക് പ്രചോദനമായി. സ്വന്തം വിശ്വാസത്തിനും സ്വാതന്ത്ര്യത്തിനും വേണ്ടി ജീവൻ ത്യജിക്കാൻ തയ്യാറായ അവരുടെ ധീരത, ഇന്ത്യയുടെ സ്വാതന്ത്ര്യ സമരത്തിന് പ്രചോദനമായി.

സാഹിബ്സാദേകളുടെ രക്തസാക്ഷിത്വം വെറും ഒരു ചരിത്ര സംഭവം മാത്രമല്ല, വിശ്വാസത്തിനും ധർമ്മത്തിനും വേണ്ടിയുള്ള ത്യാഗത്തിന്റെ ചിരസ്ഥായിയായ മാതൃകയാണ്. അവരുടെ കഥ നമ്മെ പഠിപ്പിക്കുന്നത് വിശ്വാസത്തിന്റെ ശക്തിയെയും, ധർമ്മത്തിനു വേണ്ടി നിലകൊള്ളുന്നതിന്റെ പ്രാധാന്യത്തെയും കുറിച്ചാണ്. എത്ര ചെറിയ പ്രായത്തിലായാലും നമ്മുടെ മൂല്യങ്ങൾക്കും വിശ്വാസങ്ങൾക്കും വേണ്ടി ഉറച്ചു നിൽക്കാനുള്ള കരുത്ത് നമുക്കുണ്ടാകണമെന്ന സന്ദേശമാണ് അവരുടെ ജീവിതം നൽകുന്നത്.

ഇന്നത്തെ കാലഘട്ടത്തിൽ, സ്വന്തം താൽപര്യങ്ങൾക്കു വേണ്ടി മാത്രം ജീവിക്കുന്ന മനുഷ്യർക്ക് ഈ കഥ ഒരു വെല്ലുവിളിയാണ്. സമൂഹത്തിനും രാജ്യത്തിനും വേണ്ടി ത്യാഗം സഹിക്കാൻ തയ്യാറാകണമെന്ന സന്ദേശം ഈ കഥ നൽകുന്നു.
ഡിസംബർ 26-ന് വീർ ബാൽ ദിവസ് ആചരിക്കുമ്പോൾ, നാം ആദരിക്കുന്നത് ചെറിയ വയസ്സിലും അസാധാരണമായ ധൈര്യവും വിശ്വാസദാർഢ്യവും പ്രകടിപ്പിച്ച സാഹിബ്സാദേകളുടെ ഈ ത്യാഗത്തെയാണ്.

പ്രധാനമന്ത്രി നരേന്ദ്ര മോദിയുടെ വാക്കുകളിൽ, “സാഹിബ്സാദേകളുടെ ധീരതയും ത്യാഗവും നമ്മുടെ രാജ്യത്തിന്റെ ധാർമ്മിക അടിത്തറയെ ശക്തിപ്പെടുത്തുന്നു. അവരുടെ ജീവിതം നമ്മുടെ യുവതലമുറയ്ക്ക് പ്രചോദനമാകണം.” ഈ വാക്കുകൾ തന്നെ വ്യക്തമാക്കുന്നത് സാഹിബ്സാദേകളുടെ ത്യാഗത്തിന്റെ പ്രസക്തി ഇന്നും നിലനിൽക്കുന്നു എന്നതാണ്.

ഗുരു ഗോബിന്ദ് സിംഗിന്റെ പുത്രന്മാരുടെ രക്തസാക്ഷിത്വം നമുക്ക് പല പാഠങ്ങൾ നൽകുന്നു. സ്വന്തം വിശ്വാസത്തിനും ധർമ്മത്തിനും വേണ്ടി എന്തു ത്യാഗവും സഹിക്കാനുള്ള മനോധൈര്യം, പ്രായഭേദമന്യേ ധർമ്മത്തിനു വേണ്ടി പോരാടാനുള്ള ആത്മവീര്യം, അനീതിക്കെതിരെ പ്രതികരിക്കാനുള്ള ധീരത തുടങ്ങിയവ നമ്മെ പഠിപ്പിക്കുന്നു

സിഖ് സമുദായത്തിന് മാത്രമല്ല, മുഴുവൻ ഇന്ത്യൻ ജനതയ്ക്കും അഭിമാനകരമാണ് സാഹിബ്സാദേകളുടെ രക്തസാക്ഷിത്വം. മതപരമായ വിശ്വാസങ്ങൾക്കും സ്വാതന്ത്ര്യത്തിനും വേണ്ടി പോരാടിയ അവരുടെ ചരിത്രം, നമ്മുടെ രാജ്യത്തിന്റെ മതേതര-ജനാധിപത്യ മൂല്യങ്ങളുടെ അടിത്തറയാണ്. ഇന്ത്യയുടെ വൈവിധ്യമാർന്ന സംസ്കാരത്തെയും പാരമ്പര്യത്തെയും സംരക്ഷിക്കാനുള്ള പ്രതിജ്ഞാബദ്ധതയുടെ പ്രതീകമായി അവരുടെ ത്യാഗം നിലകൊള്ളുന്നു.

സാഹിബ്സാദേകളുടെ രക്തസാക്ഷിത്വം നമ്മെ ഓർമ്മിപ്പിക്കുന്നത് വിശ്വാസത്തിന്റെയും ധർമ്മത്തിന്റെയും കാര്യത്തിൽ വിട്ടുവീഴ്ചയില്ലാത്ത നിലപാട് സ്വീകരിക്കേണ്ടതിന്റെ പ്രാധാന്യമാണ്. ഡിസംബർ 26-ന് വീർ ബാൽ ദിവസായി ആചരിക്കുമ്പോൾ, നാം ആദരിക്കുന്നത് വെറും ഒരു ചരിത്ര സംഭവത്തെ മാത്രമല്ല, മറിച്ച് നമ്മുടെ രാജ്യത്തിന്റെ മൂല്യങ്ങളെയും പാരമ്പര്യത്തെയും കൂടിയാണ്. അത് കൊണ്ട് തന്നെ വീർ ബാൽ ദിവസ് ആചരണം കേവലം ഒരു ചടങ്ങ് മാത്രമല്ല. അത് നമ്മുടെ യുവതലമുറയ്ക്ക് ധാർമ്മിക മൂല്യങ്ങളുടെയും ധീരതയുടെയും പാഠങ്ങൾ പകർന്നു നൽകുന്ന മഹത്തായ ശിക്ഷണം കൂടിയാണ് .

സ്വന്തം താൽപര്യങ്ങൾക്കും സൗകര്യങ്ങൾക്കും വേണ്ടി മൂല്യങ്ങളെ വിട്ടുവീഴ്ച ചെയ്യുന്ന ഈ കാലഘട്ടത്തിൽ, സാഹിബ്സാദേകളുടെ ജീവിതം നമുക്ക് വഴികാട്ടിയാണ്. വീർ ബാൽ ദിവസ് ആചരണം പുതിയ തലമുറയ്ക്ക് ഈ മഹത്തായ ചരിത്രം പകർന്നു നൽകാനുള്ള അവസരമാണ്. സിഖ് സമുദായത്തിന് മാത്രമല്ല, മുഴുവൻ ഇന്ത്യൻ ജനതയ്ക്കും അഭിമാനകരമാണ് സാഹിബ്സാദേകളുടെ രക്തസാക്ഷിത്വം. മതപരമായ വിശ്വാസങ്ങൾക്കും സ്വാതന്ത്ര്യത്തിനും വേണ്ടി പോരാടിയ അവരുടെ ചരിത്രം, നമ്മുടെ രാജ്യത്തിന്റെ മതേതര-ജനാധിപത്യ മൂല്യങ്ങളുടെ അടിത്തറയാണ്. അവരുടെ ത്യാഗം എന്നും നമുക്ക് പ്രചോദനമായി തുടരും.
അവരുടെ ത്യാഗം സിഖ് ചരിത്രത്തിൽ എന്നെന്നും കൊത്തിവെക്കപ്പെടുക മാത്രമല്ല , വരും തലമുറകൾക്ക് ഒരു പ്രചോദനമായി തുടരുകയും ചെയ്യും .

എസ്. ജയശങ്കർ
ബിജെപി
ഐ ടി -സോഷ്യൽ മീഡിയ
സംസ്ഥാന കൺവീനർ