മുൻ ഇന്ത്യൻ ക്രിക്കറ്റ് ടീം നായകൻ ക്രിസ് ശ്രീകാന്ത് സഞ്ജു സാംസണ് പിന്തുണയുമായി രംഗത്ത്. ബാറ്റിംഗ് സ്ഥാനത്ത് സ്ഥിരമായി മാറ്റങ്ങൾ വരുത്തുന്നതിനാൽ തന്നെ സഞ്ജുവിനോട് കാണിക്കുന്നത് ക്രൂരത ആണെന്ന് അദ്ദേഹം പറഞ്ഞു. ഓപ്പണറായി സാംസൺ മികച്ച പ്രകടനം കാഴ്ചവച്ചിട്ടുണ്ടെങ്കിലും, ശുഭ്മാൻ ഗിൽ വന്നതോടെ അഭിഷേക് ശർമ്മയ്ക്കൊപ്പം ഇന്നിംഗ്സ് ഓപ്പൺ ചെയ്യേണ്ട ഉത്തരവാദിത്വം അയാളുടേതായി.
ഇതോടെ സഞ്ജുവിന്റെ സ്ഥാനം മധ്യനിരയിലായി. 2025 ഏഷ്യാ കപ്പിൽ, സാംസൺ മൂന്ന് തവണ അഞ്ചാം സ്ഥാനത്തും ഒരു തവണ മൂന്നാം സ്ഥാനത്തും ബാറ്റ് ചെയ്തു. ബംഗ്ലാദേശിനെതിരെ, എട്ടാം നമ്പറിൽ ആയിരുന്നു താരത്തിന്റെ സ്ഥാനം. അന്ന് പിന്നെ ബാറ്റ് ചെയ്യേണ്ടതായി വന്നില്ല എന്ന് മാത്രം. മോശം അവസ്ഥ ആണെങ്കിലും സാംസൺ മിണ്ടാതിരിക്കാൻ നിർബന്ധിതനാണെന്ന് ശ്രീകാന്ത് പറഞ്ഞു. ഇനി ടീം മാനേജ്മെന്റ് അദ്ദേഹത്തെ 11ാം സ്ഥാനത്ത് ബാറ്റ് ചെയ്യാൻ അയച്ചേക്കാമെന്ന് അദ്ദേഹം തമാശ പറഞ്ഞു.
“ഏറ്റവും നിർഭാഗ്യവാനായ വ്യക്തി സഞ്ജു സാംസൺ ആണ്. ഓപ്പണർ എന്ന നിലയിൽ അദ്ദേഹം സെഞ്ച്വറികൾ നേടിയിരുന്നു. എന്നാൽ ഇപ്പോൾ അവർ അദ്ദേഹത്തെ 3 മുതൽ 8 വരെ എല്ലായിടത്തും അയയ്ക്കുന്നു. അവസരം ലഭിച്ചാൽ, അവർ അദ്ദേഹത്തെ 11-ാം സ്ഥാനത്തും അയച്ചേക്കാം. അതിനാൽ സഞ്ജുവിനെപ്പോലുള്ള ഒരാൾക്ക് ടോപ് ഓർഡറിൽ മികച്ച പ്രകടനം കാഴ്ചവച്ചതിൽ വിഷമം തോന്നും. പക്ഷേ, മിണ്ടാതിരിക്കുകയും ടീം ആവശ്യപ്പെടുന്നിടത്ത് ബാറ്റ് ചെയ്യുകയും ചെയ്യുകയല്ലാതെ അദ്ദേഹത്തിന് മറ്റ് മാർഗമില്ല.” ശ്രീകാന്ത് പറഞ്ഞു.
“ഏഷ്യാ കപ്പിൽ അഞ്ചാം സ്ഥാനത്ത് അദ്ദേഹം മികച്ച പ്രകടനം കാഴ്ചവച്ചു എന്നതാണ് നല്ല കാര്യം. ഇത് അദ്ദേഹത്തിന് ഒരു നല്ല സൂചനയാണ്, കാരണം ഇപ്പോൾ ടി20 ലോകകപ്പിനുള്ള ആദ്യ വിക്കറ്റ് കീപ്പറായി സഞ്ജു തിരഞ്ഞെടുക്കപ്പെട്ടിരിക്കുന്നു. അഞ്ചാം സ്ഥാനത്ത് അദ്ദേഹം ബാറ്റ് ചെയ്യുമെന്ന് ഉറപ്പാണ്.”
ഓസ്ട്രേലിയയ്ക്കെതിരായ ആദ്യ ടി20 മത്സരത്തിൽ പങ്കെടുത്ത പ്ലെയിംഗ് ഇലവൻ തന്നെയായിരിക്കും 2026 ലെ ടി20 ലോകകപ്പിൽ കളിക്കുകയെന്ന് ശ്രീകാന്ത് കൂട്ടിച്ചേർത്തു. എന്നിരുന്നാലും, ഹർഷിത് റാണയ്ക്ക് പകരം ഹാർദിക് പാണ്ഡ്യയെ ടീമിൽ ഉൾപ്പെടുത്തുമെന്ന് അദ്ദേഹം വിശ്വസിക്കുന്നു.
“ഇന്ന് കളിച്ച 11 പേർ ടി20 ലോകകപ്പിനുള്ളവരാണ്. ഹർഷിത് റാണയ്ക്ക് പകരം ഹാർദിക് പാണ്ഡ്യ 11-ൽ ഇടം നേടും. ലോകകപ്പിനുള്ള 11-ാം സ്ഥാനമായിരിക്കും അത്. മൂന്ന് സ്പിന്നർമാരെ കളിപ്പിക്കേണ്ടതിനാൽ ഈ കോമ്പിനേഷൻ കാരണം അർഷ്ദീപിന് വീണ്ടും അവസരം നഷ്ടമാകാം,” അദ്ദേഹം പറഞ്ഞു.
“ഡുബെ കളിച്ചിട്ടുള്ളപ്പോഴെല്ലാം ഇന്ത്യ വിജയിച്ചിട്ടുണ്ട് എന്നതുകൊണ്ട് അദ്ദേഹത്തെ പുറത്താക്കാൻ . മീഡിയം പേസ് ബൗളിംഗിലൂടെ പോലും അദ്ദേഹം വിക്കറ്റുകൾ വീഴ്ത്താറുണ്ട്. അതിനാൽ അദ്ദേഹം നിങ്ങളുടെ ആറാമത്തെ ഓപ്ഷനാണ്. അതിനാൽ ടീം ടി20 ലോകകപ്പിനായി ഏകദേശം സജ്ജമായിക്കഴിഞ്ഞു. ഇനി മാച്ച് പ്രാക്ടീസ് ചെയ്ത് താളത്തിലേക്ക് കടക്കുക മാത്രമാണ് വേണ്ടത്,” ശ്രീകാന്ത് കൂട്ടിച്ചേർത്തു.
Discussion about this post