കടുത്ത തീരുമാനങ്ങളെടുക്കുന്ന ഭരണാധികാരി, അധർമ്മത്തിന് മുന്നിൽ വിട്ടുവീഴ്ചയില്ലാത്ത മുഖ്യമന്ത്രി.. ഉത്തർപ്രദേശ് മുഖ്യമന്ത്രി യോഗി ആദിത്യനാഥിനെക്കുറിച്ച് രാജ്യം കേട്ടിട്ടുള്ള വിശേഷണങ്ങൾ പലതാണ്. എന്നാൽ ആ കാർക്കശ്യത്തിനപ്പുറം സ്നേഹനിധിയായ ഒരു മുത്തശ്ശൻ്റെ ഹൃദയമുണ്ടെന്ന് തെളിയിക്കുന്ന ദൃശ്യങ്ങളാണ് ഇപ്പോൾ സോഷ്യൽ മീഡിയയിൽ തരംഗമാകുന്നത്.
മകരസംക്രാന്തിയോടനുബന്ധിച്ച് ഗോരഖ്നാഥ് ക്ഷേത്രത്തിൽ നടന്ന ‘ഖിച്ച്ഡി’ മേളയ്ക്കിടെയാണ് ഏവരുടെയും മനം കവരുന്ന ആ നിമിഷം അരങ്ങേറിയത്. താൻ ഏറെ സ്നേഹിക്കുന്ന ഗോരഖ്പൂരിലെ ജനങ്ങൾക്കിടയിലേക്ക് എത്തിയതായിരുന്നു മുഖ്യമന്ത്രി. ഇതിനിടെയാണ് ഒരു ചെറിയ കുട്ടി അദ്ദേഹത്തിന് മുന്നിലേക്ക് എത്തിയത്.
‘എന്താണ് വേണ്ടത്?’ കുരുന്നിന്റെ മറുപടിയിൽ യോഗി ചിരിച്ചുപോയി
ജനക്കൂട്ടത്തിനിടയിൽ നിന്ന് തന്നെ കാണാനെത്തിയ ബാലനെ കണ്ടതും യോഗി ആദിത്യനാഥ് അവനിലേക്ക് കുനിഞ്ഞു. സ്നേഹത്തോടെ തലയിൽ തലോടിക്കൊണ്ട് “നിനക്ക് എന്താണ് വേണ്ടത്?” എന്ന് അദ്ദേഹം ചോദിച്ചു. സാധാരണഗതിയിൽ വലിയ നേതാക്കളെ കാണുമ്പോൾ കുട്ടികൾ മടിക്കാറുണ്ടെങ്കിലും, ഇവിടെ ആ കുരുന്ന് തെല്ലും പരിഭ്രമിച്ചില്ല. മുഖ്യമന്ത്രിയുടെ കാതുകളിൽ അവൻ തന്റെ വലിയ ആവശ്യം മന്ത്രിച്ചു: “ചിപ്സ്”!
പ്രതീക്ഷിക്കാത്ത ആ മറുപടി കേട്ടതും മുഖ്യമന്ത്രിയുടെ മുഖത്ത് വിരിഞ്ഞത് മനോഹരമായ ഒരു പുഞ്ചിരിയായിരുന്നു. ചുറ്റുമുള്ളവരും ആ കുരുന്നിന്റെ നിഷ്കളങ്കമായ ആവശ്യത്തിൽ പങ്കുചേർന്നു. തന്റെ തിരക്കേറിയ ഔദ്യോഗിക ജീവിതത്തിനിടയിലും സാധാരണക്കാരുടെ, പ്രത്യേകിച്ച് കുഞ്ഞുങ്ങളുടെ ഇഷ്ടങ്ങൾക്കായി സമയം കണ്ടെത്തുന്ന യോഗിയുടെ രീതിയെ പ്രകീർത്തിക്കുകയാണ് സോഷ്യൽ മീഡിയ.
ഉത്തർപ്രദേശിന്റെ ക്രമസമാധാന നില കാത്തുസൂക്ഷിക്കാൻ ‘ബുൾഡോസർ’ നയം സ്വീകരിക്കുന്ന യോഗി ആദിത്യനാഥ്, കുട്ടികൾക്കും പശുക്കൾക്കും മുന്നിലെത്തുമ്പോൾ തികഞ്ഞൊരു മൃദുലഹൃദയനാകുന്നു എന്നത് കൗതുകകരമാണ്. ഹിന്ദുത്വത്തിന്റെ കരുത്തും സനാതന സംസ്കാരത്തിന്റെ വിനയവും ഒരുപോലെ തന്നിൽ സമ്മേളിച്ചിരിക്കുന്നുവെന്ന് അദ്ദേഹം വീണ്ടും തെളിയിച്ചുവെന്ന് സോഷ്യൽമീഡിയയിൽ ഒരാൾ കുറിച്ചു.
Discussion about this post