ജസ്പ്രീത് ബുംറയുടെ അഭാവത്തിൽ മുഹമ്മദ് സിറാജ് ഒരു അസാമാന്യ പോരാളിയായി മാറുന്നുവെന്ന് മുൻ ഇന്ത്യൻ ഓൾറൗണ്ടർ ഇർഫാൻ പത്താൻ. അമേരിക്കയ്ക്കെതിരായ ലോകകപ്പ് മത്സരത്തിൽ മൂന്ന് വിക്കറ്റുകൾ വീഴ്ത്തി ഇന്ത്യയുടെ വിജയശില്പിയായ സിറാജിനെ തന്റെ യൂട്യൂബ് ചാനലിലൂടെയാണ് പത്താൻ പ്രശംസിച്ചത്. ബുംറ ഇല്ലാത്തപ്പോൾ സിറാജ് ഉത്തരവാദിത്തം ഏറ്റെടുക്കുന്ന രീതി ഏറെ ശ്രദ്ധേയമാണെന്ന് അദ്ദേഹം നിരീക്ഷിച്ചു.
മത്സരത്തിൽ പുതിയ പന്ത് സിറാജിന് തന്നെ നൽകണമെന്ന് താൻ നേരത്തെ കമന്ററിയിൽ പറഞ്ഞിരുന്നുവെന്ന് പത്താൻ വെളിപ്പെടുത്തി. “പുതിയ പന്തിൽ ഒരു സിക്സർ വഴങ്ങിയെങ്കിലും തൊട്ടടുത്ത പന്തുകളിൽ ലെങ്ത് ക്രമീകരിച്ച് വിക്കറ്റുകൾ വീഴ്ത്താൻ സിറാജിന് സാധിച്ചു. അപകടകാരിയായ ആൻഡ്രീസ് ഗൗസിനെ പുറത്താക്കിയതാണ് മത്സരത്തിൽ നിർണ്ണായകമായത്. ഗൗസ് മൂന്നോ നാലോ ഓവർ ക്രീസിൽ നിന്നിരുന്നെങ്കിൽ മത്സരം ഇന്ത്യയുടെ കൈകളിൽ നിന്ന് പോകുമായിരുന്നു,” ഇർഫാൻ പത്താൻ പറഞ്ഞു.
സിറാജ് പരീക്ഷണങ്ങൾക്ക് മുതിരാതെ തന്റെ സ്വാഭാവിക ശൈലിയിൽ പന്തെറിഞ്ഞതാണ് വിജയകാരണമെന്ന് പത്താൻ ചൂണ്ടിക്കാട്ടി. “അമിതമായ സ്ലോ ബോളുകളോ ബൗൺസറുകളോ അദ്ദേഹം പരീക്ഷിച്ചില്ല. സാധാരണ എറിയുന്നതുപോലെ കൃത്യമായ ലൈനിലും ലെങ്തിലും പന്തെറിഞ്ഞു വിക്കറ്റുകൾ നേടി. ലോകകപ്പ് സ്ക്വാഡിൽ നിന്ന് ആദ്യം പുറത്തായിട്ടും വിട്ടുകൊടുക്കാതെ പൊരുതി തിരിച്ചുവന്ന സിറാജ് ഒരു വലിയ ഹൃദയത്തിന് ഉടമയാണെന്നും” അദ്ദേഹം കൂട്ടിച്ചേർത്തു.
ബുംറ ഇല്ലാത്തപ്പോൾ എന്താണ് സിറാജിന്റെ പ്രകടനം:
1. 3/29 vs യുഎസ്എ (ടി20 ലോകകപ്പ്, 2026)
ഏറ്റവും പുതിയ ഉദാഹരണം. ബുംറ പനി ബാധിച്ച് പുറത്തായ മത്സരത്തിൽ പവർപ്ലേയിൽ തന്നെ സിറാജ് ഇന്ത്യയ്ക്ക് നിർണ്ണായക ബ്രേക്ക്ത്രൂകൾ നൽകി. പരീക്ഷണങ്ങൾക്ക് മുതിരാതെ കൃത്യമായ ലൈനിലും ലെങ്തിലും പന്തെറിഞ്ഞ സിറാജ് അമേരിക്കൻ ബാറ്റിംഗിന്റെ നട്ടെല്ലൊടിച്ചു.
2. ഗാബ ടെസ്റ്റ് വിജയം vs ഓസ്ട്രേലിയ (2021)
ക്രിക്കറ്റ് ചരിത്രത്തിലെ തന്നെ ഏറ്റവും വലിയ തിരിച്ചുവരവുകളിൽ ഒന്നായിരുന്നു ഇത്. ബുംറ, ഷമി, ഉമേഷ് യാദവ് എന്നിവർക്ക് പരിക്കേറ്റപ്പോൾ ബൗളിംഗ് നിരയെ നയിച്ചത് വെറും രണ്ട് ടെസ്റ്റ് മാത്രം പരിചയമുള്ള സിറാജായിരുന്നു. രണ്ടാം ഇന്നിംഗ്സിൽ 5 വിക്കറ്റ് വീഴ്ത്തി സിറാജ് ഓസ്ട്രേലിയയെ തകർത്തു. അന്ന് ഇന്ത്യ പരമ്പര നേടിയപ്പോൾ സിറാജ് എന്ന പോരാളിയെ ലോകം തിരിച്ചറിഞ്ഞു.
3. ഏഷ്യ കപ്പ് ഫൈനൽ vs ശ്രീലങ്ക (2023)
ബുംറ ടീമിലുണ്ടായിരുന്നെങ്കിലും ആ മത്സരത്തിൽ ബുംറയെ പോലും കാഴ്ചക്കാരനാക്കി സിറാജ് നിറഞ്ഞാടുകയായിരുന്നു. വെറും 21 റൺസിന് 6 വിക്കറ്റ് വീഴ്ത്തി ലങ്കയെ 50 റൺസിന് പുറത്താക്കിയ സിറാജ് ഒരു ഓവറിൽ തന്നെ 4 വിക്കറ്റുകൾ വീഴ്ത്തി റെക്കോർഡ് ഇട്ടു. ബുംറയ്ക്ക് വിശ്രമം അനുവദിച്ച പല മത്സരങ്ങളിലും സമാനമായ രീതിയിൽ സിറാജ് പവർപ്ലേയിൽ വിക്കറ്റുകൾ കൊയ്യാറുണ്ട്.
ഇംഗ്ലണ്ടിനെ സമാപിച്ച ടെസ്റ്റ് പരമ്പരയിൽ സിറാജ് എന്ന താരം തുടർച്ചയായി 5 ടെസ്റ്റ് മത്സരങ്ങളിൽ കളിക്കുകയും ആ പരമ്പരയിൽ ഇന്ത്യക്കായി ഏറ്റവും കൂടുതൽ വിക്കറ്റ് നേടുന്ന താരമായി മാറുകയും ചെയ്തു.
