സിംബാബ്വെക്കെതിരായ മത്സരത്തിൽ സഞ്ജു സാംസൺ നടത്തിയ വെടിക്കെട്ട് തുടക്കത്തെയും എന്നാൽ അത് വലിയൊരു സ്കോറാക്കി മാറ്റാൻ കഴിയാത്തതിനെയും തന്റെ തനതായ ശൈലിയിൽ വിലയിരുത്തി മുൻ ഇന്ത്യൻ താരം കൃഷ്ണമാചാരി ശ്രീകാന്ത്. സഞ്ജുവിന്റെ ബാറ്റിംഗിനെ പ്രശംസിച്ചതിനൊപ്പം തന്നെ താരം ഒരു സെഞ്ച്വറി നേടേണ്ടിയിരുന്നുവെന്നും അദ്ദേഹം അഭിപ്രായപ്പെട്ടു.
15 പന്തിൽ 24 റൺസെടുത്ത സഞ്ജുവിന്റെ ഇന്നിംഗ്സിനെക്കുറിച്ച് തന്റെ യൂട്യൂബ് ചാനലായ ‘ചീക്കി ചീക’യിലൂടെ ശ്രീകാന്ത് നടത്തിയ പരാമർശങ്ങൾ ഇപ്പോൾ വൈറലാണ്. ടോസ് നേടി ബൗളിംഗ് തിരഞ്ഞെടുത്ത സിംബാബ്വെ നായകൻ സിക്കന്ദർ റാസയുടെ തീരുമാനത്തെ പരിഹസിച്ചുകൊണ്ടായിരുന്നു ശ്രീകാന്തിന്റെ തുടക്കം. “പിച്ചിൽ ‘ജ്യൂസ്’ ഉണ്ടെന്ന് കരുതിയാണ് സിംബാബ്വെ ബൗളിംഗ് എടുത്തത്. എന്നാൽ വെറും രണ്ട് ഓവർ കൊണ്ട് സഞ്ജു സാംസൺ അവരുടെ ബൗളിംഗിനെ ‘ഓറഞ്ച് ജ്യൂസ്’ ആക്കി മാറ്റി,” ശ്രീകാന്ത് തമാശരൂപേണ പറഞ്ഞു. ഇന്ത്യയുടെ ബാറ്റിംഗ് നിര സിംബാബ്വെക്ക് മേൽ നടത്തിയ ആധിപത്യത്തെ ഒരു വിരുന്നിനോടാണ് അദ്ദേഹം ഉപമിച്ചത്.
സഞ്ജുവിന്റെ പോരാട്ടവീര്യത്തെ പ്രശംസിക്കുമ്പോഴും താരം വലിയൊരു സ്കോർ നേടാത്തതിൽ ശ്രീകാന്ത് നിരാശ പ്രകടിപ്പിച്ചു. “സഞ്ജു ഈ വിക്കറ്റിൽ ഒരു സെഞ്ച്വറി നേടേണ്ടതായിരുന്നു. കുറഞ്ഞത് ഒരു ഫിഫ്റ്റിയെങ്കിലും അവൻ അടിക്കുമെന്ന് ഞാൻ ഉറച്ചു വിശ്വസിച്ചു. ദൈവത്തിന്റെ അനുഗ്രഹം കൂടെയുണ്ട് സഞ്ജു, നീ എന്താണ് ഈ ചെയ്യുന്നത്? ഒരുപക്ഷേ വലിയ മത്സരങ്ങൾക്കായി അവൻ റൺസ് മാറ്റിവെച്ചതാകാം,” ശ്രീകാന്ത് കൂട്ടിച്ചേർത്തു.
സഞ്ജു തുടക്കത്തിലേ ആക്രമിച്ച് കളിച്ചത് മറുഭാഗത്ത് അഭിഷേക് ശർമ്മയുടെ സമ്മർദ്ദം കുറയ്ക്കാൻ സഹായിച്ചുവെന്നും ശ്രീകാന്ത് നിരീക്ഷിച്ചു. സഞ്ജു റൺസ് അടിച്ചുകൂട്ടിയതോടെ അഭിഷേകിന് തന്റെ സ്വാഭാവിക ഗെയിം കളിക്കാനും പിന്നീട് 55 റൺസെടുത്ത് ഫോമിലേക്ക് തിരിച്ചെത്താനും സാധിച്ചു.
