ഐപിഎൽ ചരിത്രത്തിലെ ഏറ്റവും വലിയ അഴിച്ചുപണിയായി ഋഷഭ് പന്ത് ലഖ്‌നൗ സൂപ്പർ ജയന്റ്സ് വിട്ട് തന്റെ പഴയ തട്ടകമായ ഡൽഹി ക്യാപിറ്റൽസിലേക്ക് മടങ്ങിയതിന് പിന്നാലെ, സോഷ്യൽ മീഡിയയിൽ ലഖ്‌നൗ ഉടമ സഞ്ജീവ് ഗോയങ്കയ്‌ക്കെതിരെ ആരാധകരുടെ കടുത്ത ട്രോളുകൾ. 2025 മെഗാ ലേലത്തിൽ പന്തിനെ സ്വന്തമാക്കിയ ശേഷം സഞ്ജീവ് ഗോയങ്ക നടത്തിയ വലിയ അവകാശവാദങ്ങളുടെ പഴയ വീഡിയോയാണ് ഇപ്പോൾ സോഷ്യൽ മീഡിയയിൽ വീണ്ടും വൈറലാകുന്നത്.
ലഖ്‌നൗ സൂപ്പർ ജയന്റ്സിൽ നിന്നും 12 കോടിയുടെ വൻ ശമ്പള നഷ്ടം സഹിച്ചാണ് ഋഷഭ് പന്ത് ഡൽഹി ക്യാപിറ്റൽസിലേക്ക് ട്രേഡ് ചെയ്യപ്പെട്ടത്. ലഖ്‌നൗ നായകനായിരുന്ന രണ്ട് സീസണുകളിലും നേരിട്ട കനത്ത തിരിച്ചടികൾക്ക് പിന്നാലെയാണ് പന്തിന്റെ ഈ മടങ്ങിവരവ്. ഇതോടെ, 2025-ൽ പന്തിനെ ലേലത്തിൽ പിടിച്ചതിന് ശേഷം ലഖ്‌നൗ ഉടമ സഞ്ജീവ് ഗോയങ്ക മാധ്യമങ്ങൾക്ക് മുന്നിൽ നടത്തിയ വമ്പൻ പ്രഖ്യാപനങ്ങളുടെ വീഡിയോകൾ ആരാധകർ വീണ്ടും കുത്തിപ്പൊക്കുകയാണ്.
2025 ലെ ലേലത്തിൽ വലിയ തുകയ്ക്ക് പന്തിനെ ടീമിലെത്തിച്ചപ്പോൾ സഞ്ജീവ് ഗോയങ്ക ആത്മവിശ്വാസത്തോടെ പറഞ്ഞ വാക്കുകൾ ഇതായിരുന്നു: “എന്റെ അഭിപ്രായത്തിൽ ഋഷഭ് പന്ത് അടുത്ത 12 മുതൽ 15 വർഷം വരെ ലഖ്‌നൗവിന് വേണ്ടി കളിക്കും. അടുത്ത 15 വർഷത്തിനുള്ളിൽ അഞ്ചോ ആറോ ഐപിഎൽ കിരീടങ്ങൾ ഞങ്ങൾ എങ്ങനെ നേടും എന്നതിന്റെ യാത്രയാണിത്. ഇന്ന് ആളുകൾ മുംബൈ ഇന്ത്യൻസിനെയും ചെന്നൈ സൂപ്പർ കിങ്സിനെയും ഏറ്റവും വിജയകരമായ ഫ്രാഞ്ചൈസികളായി കാണുന്നു. എം.എസ് ധോണിയും രോഹിത് ശർമ്മയും മികച്ച നായകന്മാരാണ്, അതിൽ തർക്കമില്ല. എന്നാൽ എന്റെ വാക്കുകൾ കുറിച്ചുവെച്ചോളൂ, പത്ത് വർഷത്തിന് ശേഷം ലോകം മഹിയെയും രോഹിതിനെയും ഒപ്പം ഋഷഭിനെയും കുറിച്ച് സംസാരിക്കും.”
എന്നാൽ ഈ പ്രവചനങ്ങളെല്ലാം വെറും രണ്ട് വർഷം കൊണ്ട് തകിടം മറിഞ്ഞു. വെറും രണ്ട് സീസണുകൾ മാത്രം നീണ്ടുനിന്ന അസ്വാരസ്യങ്ങൾക്കൊടുവിലാണ് പന്ത് ടീമുമായി പിരിഞ്ഞത്. ക്യാപ്റ്റൻസി ഒഴിഞ്ഞ പന്ത് ലഖ്‌നൗ സൂപ്പർ ജയന്റ്സിന്റെ നായകനെന്ന നിലയിൽ പന്തിന്റെ കരിയർ കടുത്ത നിരാശ സമ്മാനിക്കുന്നതായിരുന്നു. നായക സ്ഥാനം ഏറ്റെടുത്ത ആദ്യ സീസണിൽ പോയിന്റ് പട്ടികയിൽ ഏഴാം സ്ഥാനത്താണ് ലഖ്‌നൗ ഫിനിഷ് ചെയ്തത്.
ശേഷം അടുത്ത സീസണിൽ ടീമിന്റെ പ്രകടനം വീണ്ടും മോശമാവുകയും പോയിന്റ് പട്ടികയിൽ ഏറ്റവും അവസാന സ്ഥാനത്തേക്ക് ലഖ്‌നൗ കൂപ്പുകുത്തുകയും ചെയ്തു. ടീമിന്റെ തുടർച്ചയായ പരാജയങ്ങൾക്ക് പിന്നാലെ മുൻ ഓസീസ് താരം ടോം മൂഡി അടക്കമുള്ള വിദഗ്ദ്ധർ ലഖ്‌നൗവിന്റെ നേതൃമാറ്റത്തെക്കുറിച്ച് സൂചനകൾ നൽകിയിരുന്നു. ഇതിന് പിന്നാലെ 2026 സീസണിന്റെ പകുതിയിൽ വെച്ച് പന്ത് നായകസ്ഥാനം ഒഴിയാൻ തീരുമാനിക്കുകയായിരുന്നു എന്നാണ് റിപ്പോർട്ടുകൾ.
