ബെൽഫാസ്റ്റ്: അയർലൻഡിനെതിരായ ടി20 പരമ്പരയിലെ ആദ്യ കളിയിൽ ഇന്ത്യ അപ്രതീക്ഷിതമായി പരാജയപ്പെട്ടതിന് പിന്നാലെ പ്ലെയിങ് ഇലവനിൽ മാറ്റങ്ങൾ വരുത്തുന്നതിനെക്കുറിച്ച് പ്രതികരണവുമായി മുൻ ഇന്ത്യൻ ഓപ്പണറും ക്രിക്കറ്റ് അനലിസ്റ്റുമായ ആകാശ് ചോപ്ര. യുവ വിസ്മയം വൈഭവ് സൂര്യവംശിയെ ടീമിൽ ഉൾപ്പെടുത്താനായി മലയാളി താരം സഞ്ജു സാംസണെയോ ഇഷാൻ കിഷനെയോ അടുത്ത മത്സരത്തിൽ നിന്ന് ഒഴിവാക്കരുതെന്ന് ചോപ്ര അഭിപ്രായപ്പെട്ടു.
വെള്ളിയാഴ്ച നടന്ന മത്സരത്തിൽ അയർലൻഡിനോട് 34 റൺസിന്റെ അട്ടിമറി തോൽവിയാണ് ഇന്ത്യ വഴങ്ങിയത്. ജൂൺ 28 ഞായറാഴ്ച ഇതേ വേദിയിൽ വെച്ചാണ് പരമ്പരയിലെ അവസാനവും നിർണ്ണായകവുമായ രണ്ടാം മത്സരം നടക്കുന്നത്. ഒന്നാം മത്സരത്തിൽ അഭിഷേക് ശർമ്മ (20 പന്തിൽ 49) മാത്രമാണ് തിളങ്ങിയത്. സഞ്ജു സാംസൺ 4 പന്തിൽ 5 റൺസിനും ഇഷാൻ കിഷൻ 5 പന്തിൽ ഒരു റൺസിനും പുറത്തായിരുന്നു.
ഇതോടെ ഐപിഎല്ലിലെ ഓറഞ്ച് ക്യാപ് ജേതാവ് വൈഭവ് സൂര്യവംശിയെ അടുത്ത കളിയിൽ ഇറക്കണമെന്ന മുറവിളി ശക്തമായ പശ്ചാത്തലത്തിലാണ് ചോപ്ര തന്റെ യൂട്യൂബ് ചാനലിലൂടെ നിലപാട് വ്യക്തമാക്കിയത്. താൻ ഇപ്പോഴും പഴയ ഓപ്പണിങ് കൂട്ടുകെട്ടിനെ തന്നെ പിന്തുണയ്ക്കുമെന്നാണ് ആകാശ് ചോപ്ര പറയുന്നത്.
“അടുത്ത മത്സരത്തിൽ വൈഭവിനെ കളിപ്പിക്കണമോ എന്നത് കടുത്തൊരു ചോദ്യമാണ്. കാരണം ഇഷാനും സഞ്ജുവും റൺസ് നേടിയില്ല. എങ്കിലും രാഷ്ട്രീയമായി ഇത് തെറ്റായ പ്രസ്താവനയായി തോന്നാമെങ്കിൽ പോലും ഞാൻ അടുത്ത കളിയിലും വൈഭവിനെ ഇറക്കില്ല. സഞ്ജുവിനെയോ ഇഷാനെയോ മാറ്റാൻ ഞാൻ തയ്യാറാകില്ല. ഇതേ ടോപ്പ് ത്രീയുമായി ഇറങ്ങി അടുത്ത തവണ മികച്ചൊരു ഫലം ഞാൻ പ്രതീക്ഷിക്കും. ആദ്യം ബാറ്റ് ചെയ്യുകയാണെങ്കിൽ 250 റൺസ് വരെ അടിച്ചുകൂട്ടാൻ ശേഷിയുള്ളവരാണ് അവർ.”
ടീം തോൽക്കുമ്പോൾ പുറത്തിരിക്കുന്ന കളിക്കാരൻ കൂടുതൽ മികച്ചവനായി മാറുന്നത് സ്വാഭാവികമാണെന്നും എന്നാൽ വൈഭവ് വന്നാൽ കളി ജയിക്കുമെന്ന് യാതൊരു ഉറപ്പുമില്ലെന്നും ചോപ്ര ഓർമ്മിപ്പിച്ചു. എങ്കിലും ഇഷാൻ കിഷനേക്കാൾ കൂടുതൽ സമ്മർദ്ദം സഞ്ജുവിനാണെന്ന് അദ്ദേഹം നിരീക്ഷിച്ചു. “എനിക്ക് സഞ്ജുവിന്റെ കാര്യത്തിൽ ചെറിയ ആശങ്കയുണ്ട്. വൈഭവിന് ഇടം നൽകണമെങ്കിൽ സഞ്ജുവോ ഇഷാനോ പുറത്തുപോകണം. ഇഷാൻ തൊട്ടുമുൻപത്തെ ഏകദിന മത്സരത്തിൽ സെഞ്ച്വറി നേടിവരുന്ന താരമാണ്. അതുകൊണ്ട് അവന് മാനേജ്‌മെന്റ് കൂടുതൽ അവസരങ്ങൾ നൽകിയേക്കും. സഞ്ജുവിന്റെ ഭാഗ്യം എപ്പോഴും അങ്ങനെയാണ്. വണ്ടി ഓടിക്കുമ്പോൾ റിയർവ്യൂ മിററിലൂടെ നോക്കിയാൽ തൊട്ടുപിന്നിൽ ഒരു വണ്ടി അതിവേഗം പാഞ്ഞു വരുന്നത് കാണുന്ന അവസ്ഥയിലാണ് സഞ്ജു. വൈഭവ് നൽകുന്ന ആ സമ്മർദ്ദം സഞ്ജുവിനുണ്ട്. അടുത്ത കളിയിൽ താരം റൺസ് കണ്ടെത്തുമെന്ന് ഞാൻ പ്രത്യാശിക്കുന്നു.”
31-കാരനായ സഞ്ജു സാംസൺ ഇന്ത്യയ്ക്കായി 55 ടി20 ഇന്നിങ്സുകളിൽ നിന്ന് 1404 റൺസ് നേടിയിട്ടുണ്ട്. വെള്ളിയാഴ്ച പരാജയപ്പെട്ടെങ്കിലും ഇന്ത്യ ലോകകിരീടം ചൂടിയ 2026 ടി20 ലോകകപ്പിലെ അവസാന മൂന്ന് മത്സരങ്ങളിലും ടീമിന്റെ വിജയത്തിൽ നിർണ്ണായക പങ്കുവഹിച്ച താരമാണ് സഞ്ജു.
