ഷാർജ: ഐപിഎല്ലിൽ കളിച്ച നാലിൽ മൂന്ന് മത്സരങ്ങളിലും അർദ്ധ സെഞ്ചുറി നേടി അരങ്ങേറ്റം ഗംഭീരമാക്കിയ ആർസിബി താരം ദേവ്ദത്ത് പടിക്കലിന് അഭിനന്ദന പ്രവാഹം. അന്താരാഷ്ട്ര താരങ്ങളും കമന്റേറ്റർമാരും പ്രശംസ കൊണ്ട് മൂടുകയാണ് താരത്തെ. ആർസിബി ക്യാപ്റ്റൻ കൂടിയായ ഇന്ത്യൻ നായകൻ വിരാട് കോഹ്ലിയും ദേവ്ദത്തിന്റെ ബാറ്റിംഗിനെ കുറിച്ച് മികച്ച അഭിപ്രായമാണ് പ്രകടിപ്പിക്കുന്നത്.
ഇതിനിടെയാണ് മുൻ ഇന്ത്യൻ താരവും ലോക റെക്കോർഡ് ഉടമയുമായ യുവരാജ് സിംഗ് പടിക്കലിന് ആശംസകളുമായി എത്തിയത്. ദേവ്ദത്ത് മികച്ച ബാറ്റ്സ്മാനാണെന്നും യുവതാരത്തിനൊപ്പം ബാറ്റു ചെയ്യാൻ ആഗ്രഹമുണ്ടെന്നും യുവി ട്വീറ്റ് ചെയ്തു. ഏറ്റവും കൂടുതൽ ദൂരത്തേക്ക് സിക്സ് അടിക്കുന്നത് ആരാണെന്ന് നോക്കാമെന്നും യുവരാജ് ട്വീറ്റിലൂടെ സ്നേഹപൂർവ്വം വെല്ലുവിളിച്ചു.
ഇതിന് സ്നേഹവും വിനയവും കലർന്ന മറുപടിയാണ് മലയാളി താരം നൽകിയിരിക്കുന്നത്. യുവരാജുമായി മത്സരിക്കാനില്ലെന്നും ഫ്ളിക്ക് ഷോട്ട് യുവി പാജിയിൽ നിന്നാണ് പഠിച്ചതെന്നും ദേവ്ദത്ത് ട്വീറ്റ് ചെയ്തു. യുവരാജിനൊപ്പം ബാറ്റു ചെയ്യാൻ ആഗ്രഹമുണ്ടെന്നും ദേവ്ദത്ത് ട്വിറ്ററിൽ പറഞ്ഞു.
Not competing with you paji. 😛 Learnt the flick from you. Always wanted to bat with you. Let’s go!🤩 https://t.co/dpGkmpLBfJ
— Devdutt Padikkal (@devdpd07) October 3, 2020
ഐപിഎല്ലിൽ റോയൽ ചലഞ്ചേഴ്സ് ബാംഗ്ലൂരിനായി ഇതുവരെ നാല് മത്സരങ്ങൾ കളിച്ച ദേവ്ദത്ത് മൂന്നിലും അർധ സെഞ്ചുറി കണ്ടെത്തി. രാജസ്ഥാൻ റോയൽസിനെതിരായ കഴിഞ്ഞ മത്സരത്തിൽ ക്യാപ്റ്റൻ വിരാട് കോലിയോടൊപ്പം 99 റൺസിന്റെ കൂട്ടുകെട്ട് പടുത്തുയർത്തി. ഈ ഐ.പി.എല്ലിൽ ഏറ്റവും കൂടുതൽ റൺസ് നേടിയവരുടെ പട്ടികയിൽ നാലാം സ്ഥാനത്താണ് താരം.
Discussion about this post