ദക്ഷിണാഫ്രിക്കക്ക് എതിരായ ഒന്നാം ക്രിക്കറ്റ് ടെസ്റ്റ്റ്റിന്റെ ഒന്നാം ഇന്നിങ്സ് ഇന്ത്യ ഡിക്ലയർ ചെയ്തത് 7 വിക്കറ്റിന് 502 എന്ന നിലയിലാണ്. രോഹിത് ശർമയുടെ 176 റൺസും മായങ്ക് അഗർവാളിന്റെ ഡബിൾ സെഞ്ച്വറിയും ഇന്ത്യയെ മികച്ച നിലയിലെത്തിക്കുന്നതില് വലിയ പങ്ക് വഹിച്ചു.
മത്സരത്തിന്റെ ഒന്നാം ഇന്നിങ്സ് എവിടെ വെച്ച് അവസാനിപ്പിക്കണമെന്ന് ഇന്ത്യൻ നായകൻ വിരാട് കോഹ് ലിയും രവീന്ദ്ര ജഡേജയും തമ്മിൽ നടത്തിയ സംഭാഷണം എന്തെന്ന് സോഷ്യൽ മീഡിയ തലപുകഞ്ഞ് ആലോചിച്ചിരുന്നു. ഇന്ത്യ ബാറ്റ് ചെയ്യവേ 127ാം ഓവറിലായിരുന്നു സംഭവം.
കൈവിരലുകളുയർത്തി കോഹ് ലി ജഡേജയോട് ആംഗ്യം കാണിക്കുകയും അത് കൃത്യമായി മനസ്സിലാക്കി ജഡേജ തിരിച്ച് മറുപടി ആംഗ്യം കാണിക്കുയും ചെയ്യുന്നുണ്ട്. പക്ഷേ, ഇത് എന്താണെന്ന് ആരാധകർക്ക് അത്ര പെട്ടെന്ന് മനസ്സിലായില്ല. ഇന്ത്യൻ ക്രിക്കറ്റ് ടീം ഇൻസ്റ്റഗ്രാം പേജിലും ഇതിന്രെ വീഡിയോ പോസ്റ്റ് ചെയ്തിരുന്നു.
ഏതായാലും 136ാം ഓവറിൽ ഇന്നിങ്സ് ഡിക്ലയർ ചെയ്യാൻ ഇന്ത്യ തീരുമാനിച്ചപ്പോഴാണ് കാര്യം പിടികിട്ടിയത്. 9 ഓവർ കഴിഞ്ഞ് ഇന്നിങ്സ് ഡിക്ലയർ ചെയ്യാനായിരുന്നു കോഹ് ലി ജഡേജയോട് പറഞ്ഞത്. ജഡേജ 30 റൺസും അശ്വിൻ 1 റണ്ണെടുത്തും പുറത്താവാതെ നിൽക്കുമ്പോഴാണ് ഇന്ത്യ ഒന്നാം ഇന്നിങ്സ് ഡിക്ലയർ ചെയ്തത്.
Discussion about this post