ഡല്ഹി : ട്വന്റി20 ലോകകപ്പ് ക്രിക്കറ്റ് അടുത്ത വര്ഷം മാര്ച്ച്, ഏപ്രില് മാസങ്ങളില് ഇന്ത്യയില് നടക്കും. കൊല്ക്കത്ത, ബെംഗളൂരു, ചെന്നൈ, ധര്മശാല, മൊഹാലി, മുംബൈ, നാഗ്പൂര്, ന്യൂഡല്ഹി എന്നിവിടങ്ങള് മല്സരങ്ങള്ക്കു വേദിയൊരുക്കുമെന്നു ബിസിസിഐ അറിയിച്ചു.
മാര്ച്ച് പതിനൊന്നു മുതല് ഏപ്രില് മൂന്നു വരെയാണു പോരാട്ടം. ഫൈനല് മല്സരം കൊല്ക്കത്ത ഈഡന് ഗാര്ഡന്സ് സ്റ്റേഡിയത്തില് നടക്കും. ടൂര്ണമെന്റ് മികച്ച രീതിയില് നടത്തുന്നതിനുള്ള ഒരുക്കങ്ങള് ബിസിസിഐ ആരംഭിച്ചതായി സെക്രട്ടറി അനുരാഗ് ഠാക്കുര് വ്യക്തമാക്കി.
മല്സരം സംഘടിപ്പിക്കുന്നതിനു മുന്നോടിയായി രാജ്യാന്തര ക്രിക്കറ്റ് സമിതി നിഷ്കര്ശിക്കുന്ന നിലവാരം സ്റ്റേഡിയങ്ങള് ഉറപ്പാക്കേണ്ടതുണ്ട്. വരുംമാസങ്ങളില് സ്റ്റേഡിയങ്ങളുടെ നിലവാര പരിശോധന നടക്കും. ലോകകപ്പിന്റെ നടത്തിപ്പിനായി പ്രസിഡന്റ് ജഗ്മോഹന് ഡാല്മിയ അധ്യക്ഷനായ എട്ടംഗ സമിതിക്കു ബിസിസിഐ രൂപം നല്കി.
അനുരാഗ് ഠാക്കുര്, ബിസിസിഐ ജോയിന്റ് സെക്രട്ടറി അമിതാഭ് ചൗധരി, ട്രഷറര് അനിരുദ്ധ് ചൗധരി, വൈസ് പ്രസിഡന്റ് ജി. ഗംഗാ രാജു, ഐപിഎല് െചയര്മാന് രാജീവ് ശുക്ള, മുംബൈ ക്രിക്കറ്റ് അസോസിയേഷന് വൈസ് പ്രസിഡന്റ് ആശിഷ് ശേലര്, ഒഡിഷ ക്രിക്കറ്റ് അസോസിയേഷന് സെക്രട്ടറി ആശിര്ബാദ് ബെഹറ എന്നിവരാണു സമിതിയിലെ മറ്റംഗങ്ങള്.
Discussion about this post