സ്‌പെയിനിലെ അഭയാര്‍ഥികള്‍ക്ക് റിയല്‍ മാഡ്രിഡ് പത്തു ലക്ഷം യൂറോ വാഗ്ദാനം ചെയ്തു. ഇന്റര്‍നാഷണല്‍ ഒളിമ്പിക് കമ്മിറ്റി 20 ലക്ഷം അമേരിക്കന്‍ ഡോളര്‍ സഹായവാഗ്ദാനം നല്‍കിയതിനു തൊട്ടുപിന്നാലെയാണ് സ്‌പെയിനിലെ അഭയാര്‍ഥികളുടെ പുനരധിവാസ പദ്ധതികള്‍ക്ക് സ്പാനിഷ് ഫുട്‌ബോള്‍ വമ്പന്‍മാരായ റിയല്‍ മാഡ്രിഡ് പത്തു ലക്ഷം യൂറോ വാഗ്ദാനം ചെയ്തത്.
സ്‌പെയിനിലെ അഭയാര്‍ഥികളെ സഹായിക്കാന്‍ തങ്ങള്‍ പ്രതിജ്ഞാബദ്ധരാണെന്ന് ക്ലബ്ബ് അധികൃതര്‍ അറിയിച്ചു. യുദ്ധത്തില്‍ നിന്നും മരണമുഖത്തു നിന്നും സ്വന്തം മണ്ണ് ഉപേക്ഷിച്ച് അതിജീവനത്തിനായി അഭയാര്‍ഥിത്വം തേടിയവരെ സഹായിക്കേണ്ടത് മാനുഷിക മൂല്യങ്ങളില്‍ അധിഷ്ഠിതമാണെന്ന് റിയല്‍ വക്താവ് അഭിപ്രായപ്പെട്ടു.
കഴിഞ്ഞ സീസണില്‍ ക്ലബ്ബിന്റെ മൊത്തം വരുമാനം 660.6 ദശലക്ഷം യൂറോ എന്ന നാഴികക്കല്ല് പിന്നിട്ടതായി റിയല്‍ മാഡ്രിഡ് പ്രഖ്യാപിച്ചിരുന്നു. അഭയാര്‍ഥികളിലെ കുട്ടികള്‍ക്ക് സ്‌പോര്‍ട്‌സ് കിറ്റുകളും മറ്റു അടിസ്ഥാന സൗകര്യങ്ങളും വിതരണം ചെയ്യുമെന്നും ക്ലബ്ബ് അറിയിച്ചു.
Discussion about this post