പത്തനംതിട്ട: ശബരിമല വിഷയത്തില്‍ സിപിഐഎം നേതാവ് എംഎ ബേബി നിലപാട് പറഞ്ഞിട്ട് കാര്യമില്ലെന്ന് ബിജെപി സംസ്ഥാനാധ്യക്ഷന്‍ കെ സുരേന്ദ്രന്‍. ശബരിമലയില്‍ സിപിഐഎം എടുത്ത നിലപാടിനോട് വിശ്വാസികള്‍ പൊറുക്കില്ല. നിലപാട് വ്യക്തമാക്കേണ്ടത് മുഖ്യമന്ത്രി പിണറായി വിജയനാണെന്നും കെ സുരേന്ദ്രന്‍ പ്രതികരിച്ചു.
‘മുഖ്യമന്ത്രി വിശ്വാസികളോട് മാപ്പുപറയണം. ശബരിമല വിഷയത്തിലെടുത്ത നിലപാട് തെറ്റിപ്പോയെന്ന് മുഖ്യമന്ത്രി പരസ്യമായി ഏറ്റുപറഞ്ഞ് വിശ്വാസികളോട് മാപ്പുപറയണം. എന്നിട്ടുവേണം സത്യവാങ്മൂലത്തിന്റെ കാര്യത്തില്‍ തീരുമാനം പറയാന്‍. ആയിരം ഗംഗയില്‍ മുങ്ങിക്കുളിച്ചാലും സിപിഐഎമ്മിനോട് പൊറുക്കാന്‍ വിശ്വാസിസമൂഹം തയ്യാറാവില്ല’, സുരേന്ദ്രന്‍ അഭിപ്രായപ്പെട്ടു.
സിപിഐഎമ്മില്‍ പാര്‍ശ്വവല്‍ക്കരിക്കപ്പെട്ട നേതാവാണ് എംഎ ബേബിയെന്നും സുരേന്ദ്രന്‍ അഭിപ്രായപ്പെട്ടു. റോഡ് സൈഡിലിരുന്ന് അഭിപ്രായം പറയുന്നതുപോലെയാണ് എംഎ ബേബിയുടെ നിലപാട്. അത് സിപിഐഎം തന്നെ തിരുത്തുമെന്നും സിപിഐഎമ്മില്‍ എംഎ ബേബി ഒരുപണിയുമില്ലാതെ ഇരിക്കുകയാണെന്നും അദ്ദേഹം കൂട്ടിച്ചേര്‍ത്തു.ശബരിമലയില്‍ കാണിച്ച ക്രൂരതയ്ക്ക് പിണറായി വിജയനും കമ്പനിക്കും മാപ്പില്ല. തെരഞ്ഞെടുപ്പ് അടുക്കുമ്പോള്‍ എന്തെങ്കിലും പറഞ്ഞതുകൊണ്ട് കാര്യമില്ല. വസ്തുതകളെ വസ്തുതകളായി കാണമെന്നും സുരേന്ദ്രന്‍ പറഞ്ഞു.
ശബരിമലയില്‍ സ്ത്രീപ്രവേശനത്തില്‍ പുതിയ സത്യവാങ്മൂലം നല്‍കാന്‍ തയ്യാറാണെന്ന് എംഎ ബേബി പറഞ്ഞെന്ന രീതിയില്‍ പുറത്തുവന്ന വാര്‍ത്തകളിലായിരുന്നു സുരേന്ദ്രന്റെ പ്രതികരണം. താന്‍ അത്തരത്തിലൊരു പ്രസ്താവന നടത്തിയിട്ടില്ലെന്ന് വ്യക്തമാക്കി ബേബി നേരത്തെ രംഗത്തെത്തിയിരുന്നു.
‘സുപ്രീംകോടതി അതിനെ കൈകാര്യം ചെയ്യാന്‍ പോകുന്നെന്ന് മുന്‍കൂട്ടിയൊന്നും പറയാന്‍ കഴിയില്ല. എല്ലാവര്‍ക്കും അഭിപ്രായം പറയാമെന്ന് സുപ്രീംകോടതി പറയുമോ എന്നും നമുക്ക് അറിയില്ല. അതുകൊണ്ട് ഇതുസംബന്ധിച്ച് സത്യവാങ്മൂലം കൊടുക്കുന്നതിനെ അനുകൂലിച്ച് ഞാന്‍ എന്തെങ്കിലും പറഞ്ഞു എന്ന തരത്തില്‍ പ്രചരണം നടക്കുന്നുണ്ടെങ്കില്‍ അത് എന്റെ കാഴ്ചപ്പാടോ പാര്‍ട്ടിയുടെ കാഴ്ചപ്പാടോ അല്ല. അതൊരു വളച്ചൊടിക്കലാണ്. ചിലരെന്നെ വിളിച്ചുചോദിച്ചപ്പോഴാണ് ഞാന്‍ അറിയുന്നത്. നിയമനിര്‍മ്മാണം നടത്തുമെന്നത് മൗഢ്യമാണ്. മറ്റെന്തെങ്കിലും പ്രതികരണം ഇപ്പോള്‍ നടത്തുന്നത് അകാലികവും അപ്രസക്തവും അനാവശ്യവുമാണ്’, എംഎ ബേബി പറഞ്ഞു.
വിധി നടപ്പാക്കുന്നത് സാമൂഹിക സംഘര്‍ഷത്തിന് വഴിവെച്ചൂകൂടാ എന്നാണ് സിപിഐഎം നിലപാടെന്നും അദ്ദേഹം വ്യക്തമാക്കിയിരുന്നു.
