കേരളീയർ ഓണം ആഘോഷിക്കുന്നത് പോലെയാണ് തമിഴ്നാട്ടുകാർ പൊങ്കൽ ആഘോഷിക്കുന്നത്. അടുത്തിടെ പൊങ്കൽ കഴിയുകയും ചെയ്തിരുന്നു. എന്നാൽ പൊങ്കൽ എന്ന ഈ വിശേഷാൽ ആഘോഷത്തിന് പിന്നിൽ പല ചിട്ടകളും ഉണ്ട്. ഭോഗി പൊങ്കൽ,തായ് പൊങ്കൽ, മാട്ട് പൊങ്കൽ,കാണും പൊങ്കൽ(പൂ പൊങ്കൽ) എന്നിങ്ങനെ നാലു ദിനം ആണ് പൊങ്കൽ ആഘോഷിക്കുന്നത്.കാർഷിക സംസ്കാരവും ആയി ബന്ധപ്പെട്ടതാണ് ഈ മഹോത്സവം. പൊങ്കൽ ദിനത്തിൽ അവർ വീടിൻ്റെ പുറത്ത് അടുപ്പ് കൂട്ടി കലത്തിൽ നമ്മുടെ പായസ സമാനം ആയ വിഭവം ഇന്ഫക്കുന്നു. നമ്മുടെ നാട്ടിൽ പൊങ്കാല ഇടുന്നതിനു തുല്യമാണ് ഇത്.
ജീവിത ഉയർച്ച,നല്ല വിളവ് എന്നെല്ലാം അർത്ഥമാക്കിയാണ് പൊങ്കൽ ആചരിക്കുന്നത്. ഒരു വ്യക്തിയുടെ ഉന്നമനത്തിന് കാരണമായ മഴ ( ഇന്ദ്രൻ) ,വെയിൽ ( സൂര്യൻ) കന്നു കാലികൾ ,ബന്ധു ജനങ്ങൾ ,എന്നിവരോട് ഉള്ള നന്ദി സൂചകം കൂടിയാണ് ഈ ആഘോഷം.
ഭോഗി പൊങ്കൽ ദിനത്തിൽ വീട് നിറം പൂശി സുന്ദരമാക്കി, പഴയ വസ്തുക്കൾ ഒഴിവാക്കി പുതിയവ വാങ്ങുന്നു. ഈ ദിനത്തിൽ അവർ ആരാധിക്കുന്നത് മഴയുടെ ദേവനായ ഇന്ദ്രനെ ആണ്.ഇനി വരുന്ന വർഷം കൃഷിക്ക് ആവശ്യം ആയ മഴ ലഭിക്കാൻ അവർ ഇന്ദ്ര ഭഗവാനെ പ്രാർത്ഥിക്കും.
സൂര്യ പൊങ്കൽ ദിനം ആണ് തായ് പൊങ്കൽ എന്നറിയപ്പെടുന്നത് .സൂര്യ ദേവനെ പ്രാർത്ഥിച്ച് അവർ അടുപ്പിൽ പാൽ കാച്ചി പൊങ്കൽ വിഭവം ഉണ്ടാക്കുന്നത് ഈ ദിവസമാണ്.നല്ല വിളവ് തരാൻ വേണ്ടി ഈ ദിനം സൂര്യ ഭഗവാനോട് പ്രാർത്ഥിക്കും.
മാട്ടു പൊങ്കൽ ദിനത്തിൽ കന്നു കാലികളെ കുളിപ്പിച്ച് ,വൃത്തിയാക്കി അലങ്കരിച്ച് നിർത്തി,പൂജിക്കുന്നു. വിശിഷ്ടമായ നിവേദ്യങ്ങൾ എല്ലാം അവർ അവയ്ക്ക് നൽകും.നാലാം ദിനം കാണും പൊങ്കൽ ദിനം കുടുംബാംഗങ്ങൾ ഒത്ത് ചേർന്ന് ആഘോഷിക്കാൻ വേണ്ടി ഉള്ളതാണ്. ഈ ദിനം വീട്ടിൽ ചാണകം മെഴുകി ഭംഗിയുള്ള കോലം വരച്ച് വയ്ക്കും. പഴവർഗങ്ങൾ പൂജിക്കുകയും കഴിക്കുകയും ചെയ്യും. കരിമ്പ്,പൊരി എന്നിവയും ഈ ആഘോഷത്തിൽ പ്രധാനപ്പെട്ടവയാണ്.
Discussion about this post