തിരുവനന്തപുരം: നടിയും ടെലിവിഷൻ അവതാരകയുമായ സുബി സുരേഷിന്റെ മരണത്തിൻ അനുശോചനം അറിയിച്ച് നടൻ മോഹൻലാൽ. അഭിനയത്തിലും അവതരണത്തിലും ഇനിയും ഏറെ മുൻപോട്ട് പോകേണ്ടിയിരുന്ന കലാകാരിയാണ് സുബിയെന്നും, അപ്രതീക്ഷിത വേർപാട് വലിയ വേദനയായെന്നും അദ്ദേഹം പറഞ്ഞു.
നിറഞ്ഞ ചിരിയോടെ മലയാളി പ്രേക്ഷകരുടെ സ്നേഹം കവർന്ന പ്രിയപെട്ട കലാകാരി സുബി സുരേഷ് അകാലത്തിൽ നമ്മെ വിട്ടു പിരിഞ്ഞു. അഭിനയത്തിലും അവതരണത്തിലും ഇനിയും ഒരുപാട് ഉയർച്ചകളിലേക്ക് പോകേണ്ടിയിരുന്ന പ്രിയ സഹോദരിയുടെ വേർപാടിൽ വേദനയോടെ ആദരാഞ്ജലികൾ.- മോഹൻലാൽ ഫേസ്ബുക്കിൽ കുറിച്ചു.
സുബി സുരേഷിന്റെ വിയോഗം വലിയ ഞെട്ടൽ ഉളവാക്കിയതായി നടൻ ജയറാം പ്രതികരിച്ചു. സിനിമയിൽ ലഭിക്കുന്ന ഏത് കഥാപാത്രവും അനായാസം അവതരിപ്പിക്കാൻ കഴിയുന്ന നടിയാണ് സുബി. സ്റ്റേജിൽ നിന്നും സിനിമയിലേക്ക് എത്തിയവരാണ് ഞങ്ങൾ. അതുകൊണ്ടുതന്നെ വലിയ ആത്മബന്ധം നിലനിന്നിരുന്നു. മരണം വിശ്വസിക്കാൻ കഴിയുന്നില്ല. കലാരംഗത്ത് സുബിയുടെ വിയോഗം തീരാ നഷ്ടമാണെന്നും ജയറാം കൂട്ടിച്ചേർത്തു. ഒരിക്കലും മറക്കാത്ത ഓർമ്മയാണ് സുബിയെന്ന് ദിലീപും ഫേസ്ബുക്കിൽ കുറിച്ചു.
Discussion about this post