തിരുവനന്തപുരം: ഇംഗ്ലീഷ് സാഹിത്യത്തിലെ ഗവേഷണത്തിന് ഡോക്ടറേറ്റ് ലഭിച്ച യുവജനകമ്മീഷൻ അദ്ധ്യക്ഷ ചിന്ത ജെറോമിന്റെ ഇംഗ്ലീഷ് പരിജ്ഞാനം എത്രത്തോളമുണ്ടെന്ന് വ്യക്തമാക്കി ശ്രീജിത് പണിക്കർ. സമൂഹമാദ്ധ്യമത്തിൽ ഇംഗ്ലീഷിൽ ചിന്ത നടത്തിയ പരാമർശം ചൂണ്ടിക്കാട്ടിയാണ് അദ്ദേഹം ഇക്കാര്യം വ്യക്തമാക്കിയിരിക്കുന്നത്. തനിക്ക് സ്വന്തമായി സർവ്വകലാശാല ഉണ്ടായിരുന്നുവെങ്കിൽ ഈ ഭാഷാ പ്രാവീണ്യത്തിന് താനൊരു ഡോക്ടറേറ്റ് നൽകിയേനെയെന്നും അദ്ദേഹം പരിഹസിച്ചു.
തെലുങ്ക് ചിത്രം ആർആർആറിന് ഓസ്കർ പുരസ്കാരം ലഭിച്ചതിനെ അഭിനന്ദിച്ചുകൊണ്ടായിരുന്നു ചിന്തയുടെ ഇംഗ്ലീഷിനുള്ള പോസ്റ്റ്. Chandra Bose, a song writer who brought international fame to RRR cinema, awarding Oscar Award to MM Keeravani who provided music is an international recognition for the Telugu cinema literature sector. Respect.എന്നായിരുന്നു ചിന്ത ഫേസ്ബുക്കിൽ കുറിച്ചത്. ഇതിനെ മലയാളത്തിൽ തർജ്ജമ ചെയ്തുകൊണ്ടാണ് ചിന്തയുടെ എഴുത്തിലെ അബദ്ധം അദ്ദേഹം ചൂണ്ടിക്കാണിക്കുന്നത്.
ആർആർആർ സിനിമയ്ക്ക് അന്താരാഷ്ട്ര പ്രശസ്തി നേടിക്കൊടുത്ത ചന്ദ്ര ബോസ് എന്ന ഒരു ഗാനരചയിതാവ്, സംഗീതം നൽകിയ എം എം കീരവാണിക്ക് ഓസ്കാർ അവാർഡ് സമ്മാനിക്കുന്നത് തെലുങ്ക് സിനിമാ സാഹിത്യ മേഖലയ്ക്ക് ഒരു അന്താരാഷ്ട്ര അംഗീകാരമാണ്. ആദരവ് എന്നിങ്ങനെയാണ് ഇതിന്റെ മലയാള പരിഭാഷയെന്നാണ് ശ്രീജിത്ത് പണിക്കർ പറയുന്നത്. ഇംഗ്ലീഷ് ഭാഷയിൽ പിഎച്ച്ഡി ഉണ്ടായിട്ടും പ്രശംസിച്ചുകൊണ്ട് രണ്ട് വരി എഴുതാൻ പോലും ചിന്തയ്ക്ക് കഴിയുന്നില്ല. ഇതോടെയാണ് ശ്രീജിത് പണിക്കരുടെ പരിഹാസം.
