കോട്ടയം : മാസങ്ങൾക്ക് മുൻപ് നടന്ന ഒരു ക്ഷേത്ര ഉദ്ഘാടന ചടങ്ങിൽ വെച്ച് ജാതി വിവേചനം നേരിട്ടതായി ദേവസ്വം മന്ത്രി കെ. രാധാകൃഷ്ണൻ. കോട്ടയത്ത് നടന്ന ഭാരതീയ വേലൻ സൊസൈറ്റിയുടെ സംസ്ഥാന സമ്മേളനത്തിൽ സംസാരിക്കുമ്പോഴായിരുന്നു മന്ത്രിയുടെ വെളിപ്പെടുത്തൽ. ക്ഷേത്രത്തിൽ വച്ച് വിളക്കുകൾ പൂജാരിമാരാണ് കൊളുത്തിയതെന്നും തനിക്ക് വിളക്ക് കൊളുത്തുവാനായി അവർ എടുത്തു തന്നില്ല എന്നുമാണ് ദേവസ്വം മന്ത്രിയുടെ ആരോപണം.
“ഞാന്‍ ഒരു ക്ഷേത്രത്തില്‍ ഒരു പരിപാടിക്ക് പോയി. അവിടുത്തെ ഉദ്ഘാടനവുമായി ബന്ധപ്പെട്ട് പ്രധാന പൂജാരി വിളക്ക് കത്തിച്ച് കൊണ്ടു വന്നു. വിളക്ക് എന്റെ കൈയില്‍ തരാതെ അദ്ദേഹം തന്നെ കത്തിച്ചു. അത് ആചാരമായിരിക്കും എന്ന് കരുതി മാറി നിന്നു. അതിന് ശേഷം അവിടുത്തെ സഹപൂജാരിക്ക് വിളക്ക് കൈമാറി. അയാളും വിളക്ക് കത്തിച്ചു. അപ്പോഴും ഞാന്‍ കരുതിയത് എനിക്ക് തരുമെന്നാണ്. പക്ഷേ എന്റെ കയ്യിൽ വിളക്ക് തരുന്നതിന് പകരം അവർ വിളക്ക് നിലത്തുവെയ്ക്കുകയാണ് ചെയ്തത്. ഞാന്‍ എടുത്ത് കത്തിക്കട്ടെ എന്നാണ് അവര്‍ വിചാരിച്ചത്. ഞാന്‍ എടുക്കണോ? ഞാന്‍ കത്തിക്കണോ? ഞാന്‍ പറഞ്ഞു, പോയി പണി നോക്കാന്‍” – എന്നായിരുന്നു ദേവസ്വം മന്ത്രിയുടെ വെളിപ്പെടുത്തൽ.
അതേ വേദിയിൽ വച്ച് തന്നെ അവരെ തന്റെ പ്രതിഷേധം അറിയിച്ചുവെന്നും മന്ത്രി വ്യക്തമാക്കി “ഞാന്‍ തരുന്ന പൈസയ്ക്ക് നിങ്ങള്‍ക്ക് അയിത്തമില്ല, പക്ഷേ എനിക്ക് നിങ്ങൾ അയിത്തമാണ് കല്‍പ്പിക്കുന്നത്. ഏത് പാവുപ്പെട്ടവനും കൊടുക്കുന്ന പൈസയ്ക്ക് അവിടെ അയിത്തമില്ല.” എന്നും താൻ ആ വേദിയിൽ വച്ച് പറഞ്ഞതായി മന്ത്രി വെളിപ്പെടുത്തി.
Discussion about this post