കേരളത്തിലാകെ ഇന്ത്യൻ റെയിൽവെയുടെ വന്ദേഭാരത് എക്സ്പ്രസിന് വലിയ സ്വീകരണമാണ് കിട്ടുന്നത്. കഴിഞ്ഞ ആഴ്ചയായിരുന്നു കേരളത്തിലെ രണ്ടാമത്തെ വന്ദേഭാരത് പ്രധാനമന്ത്രി ഫ്ളാഗ് ഓഫ് ചെയ്ത് ഓടിത്തുടങ്ങിയത് . നിലവിൽ കാസർകോട്- തിരുവനന്തപുരം റൂട്ടിലാണ് വന്ദേഭാരത് സർവീസ് നടത്തുന്നത്. വേഗം ലക്ഷ്യ സ്ഥാനത്ത് എത്തേണ്ടവർക്ക് വന്ദേഭാരത് വലിയ ആശ്വാസമാണ്. സിനിമ-സാംസ്‌കാരിക രാഷ്ട്രീയ മേഖലയിലുള്ളവർ വന്ദേഭാരതിൽ യാത്ര ചെയ്യുന്ന വീഡിയോകളും ചിത്രങ്ങളും പലപ്പോളും സോഷ്യൽ മീഡിയയിൽ വൈറലാകാറുമുണ്ട്.
ഇപ്പോഴിതാ ചലച്ചിത്ര താരം കുഞ്ചാക്കോ ബോബൻ വന്ദേഭാരതിൽ യാത്ര ചെയ്യുന്ന വീഡിയോ സോഷ്യൽ മീഡിയയിൽ വൈറലാവുകയാണ്. കണ്ണൂരിൽ നിന്നും എറണാകുളത്തേക്കാണ് കുഞ്ചാക്കോ വന്ദേഭാരതിൽ യാത്ര ചെയ്തത്. വളരെ പെട്ടെന്ന് കൊച്ചിയിലേക്ക് എത്തേണ്ടത് കൊണ്ടാണ് താരം യാത്രയ്ക്കായി വന്ദേഭാരത് തിരഞ്ഞെടുത്തത്. കണ്ണൂരിൽവെച്ചു നടന്ന ഗസറ്റഡ് ഓഫീസർമാരുടെ കലോത്സവത്തിലും കോടിയേരി ബാലകൃഷ്ണന്റെ അനുസ്മരണത്തിലും പങ്കെടുക്കാനാണ് താരം എത്തിയത്. എന്നാൽ പുതിയ ചിത്രം ചാവേറിന്റെ പ്രമോഷനായി താരത്തിന് പെട്ടന്ന് കൊച്ചിയിലേക്ക് എത്തേണ്ടതായി വന്നു.
കുഞ്ചാക്കോ ബോബനെക്കൂടാതെ, അർജുൻ അശോകൻ, ആന്റണി വർഗ്ഗീസ് എന്നിവർ കേന്ദ്ര കഥാപാത്രങ്ങളായെത്തുന്ന ടിനു പാപ്പച്ചൻ സംവിധാനം ചെയ്യുന്ന സസ്‌പെൻസ് ത്രില്ലർ ചിത്രമാണ് ചാവേർ. കണ്ണൂരിലെ രാഷ്ട്രീയ കൊലപാതകങ്ങളും വന്യമായ മനസുള്ള ചില മനുഷ്യരും, അവരുടെ ജീവിത വഴികളിലെ ചോര ചിന്തുന്ന സംഭവങ്ങളുമാണ് ചിത്രത്തിന്റെ പ്രമേയം. സംഗീത, മനോജ് കെ.യു, സജിൻ ഗോപു, അനുരൂപ് തുടങ്ങിയവരാണ് മറ്റു താരങ്ങൾ. തിരക്കഥ ജോയ് മാത്യു. അരുൺ നാരായൺ പ്രൊഡക്ഷൻസ്, കാവ്യ ഫിലിം കമ്പനി എന്നീ ബാനറുകളിൽ അരുൺ നാരായൺ, വേണു കുന്നപ്പിള്ളി എന്നിവർ ചേർന്നാണ് നിർമ്മാണം. ജിന്റോ ജോർജ്‌ജാണ് ഛായാഗ്രഹണം നിർവ്വഹിച്ചിരിക്കുന്നത്. ചിത്രം ഒക്ടോബർ 5ന് തീയേറ്ററിലേക്ക് എത്തും.
Discussion about this post