കോഴിക്കോട്: ലഹരിയ്ക്കടിമയായ മകനെ പോലീസിൽ ഏൽപ്പിച്ച് അമ്മ. കോഴിക്കോട് എലത്തൂരാണ് സംഭവം. എലത്തൂർ സ്വദേശി രാഹുലിനെയാണ് അമ്മയുടെ പരാതിയിൽ പോലീസ് അറസ്റ്റിലായത്. വീട്ടിൽ സ്ഥിരം പ്രശ്നം ഉണ്ടാക്കാൻ തുടങ്ങിയ പശ്ചാത്തലത്തിൽ ആയിരുന്നു അമ്മ പോലീസിൽ പരാതി നൽകിയത്.
ദീർഘകാലമായി രാഹുൽ ലഹരി ഉപയോഗിക്കുന്നുണ്ട്. ഇതിന് ശേഷം അടിയ്ക്കടി വീട്ടുകാരെ കൊലപ്പെടുത്തുമെന്ന് രാഹുൽ ഭീഷണിപ്പെടുത്താറുണ്ടെന്ന് അമ്മ പോലീസിൽ നൽകിയ പരാതിയിൽ പറയുന്നു. അമ്മയ്ക്കൊപ്പം മുത്തശ്ശിയും സഹോദരിയും കുഞ്ഞും വീട്ടിൽ ഉണ്ട്.
ലഹരി ഉപയോഗിക്കാൻ കാശില്ലാതെ വരുമ്പോൾ രാഹുൽ വീട്ടിലുള്ളവരോട് ആവശ്യപ്പെടും. ഇത് നൽകാതെ വരുമ്പോഴാണ് ഭീഷണി. അമ്മയെ കൊലപ്പെടുത്തുമെന്ന് ഇയാൾ നിരവധി തവണ ഭീഷണിപ്പെടുത്തിയിട്ടുണ്ട്. മുത്തശ്ശിയെയും സഹോദരിയുടെ കുഞ്ഞിനെയും കൊലപ്പെടുത്തുമെന്നും രാഹുൽ അടിയ്ക്കടി പറയാറുണ്ട്. ആത്മഹത്യാ ഭീഷണിയും പതിവായി മുഴക്കാറുണ്ടെന്ന് അമ്മ പറയുന്നു.
ഇന്നും സമാനമായ രീതിയിൽ രാഹുൽ പണം ചോദിച്ചിരുന്നു. എന്നാൽ നൽകാൻ കഴിയില്ലെന്ന് അമ്മ പറയുകയായിരുന്നു. ഇതോടെയാണ് ഭീഷണി ആരംഭിച്ചത്. തുടർന്ന് അമ്മ വിവരം പോലീസിനെ അറിയിക്കുകയായിരുന്നു. പോലീസ് എത്തിയപ്പോഴും രാഹുൽ ഭീഷണി മുഴക്കി. ഇതോടെ ബലം പ്രയോഗിച്ച് കസ്റ്റഡിയിൽ എടുക്കുകയായിരുന്നു.
ഇതിന് മുൻപ് പലതവണ മകൻ അക്രമാസക്തൻ ആയിട്ടുണ്ടെന്ന് അമ്മ പറഞ്ഞു. ലഹരി ഉപയോഗത്തെ തുടർന്ന് വിമുക്തി കേന്ദ്രത്തിൽ രാഹുലിനെ പ്രവേശിപ്പിച്ചിരുന്നു. എന്നാൽ ഈ ഉദ്യമം ഫലം കണ്ടില്ല. ലഹരി, പോക്സോ തുടങ്ങിയ കേസുകളിൽ പ്രതിയാണ് രാഹുൽ.
Discussion about this post