ഇംഗ്ലണ്ടും ഇന്ത്യയും തമ്മിലുള്ള നാലാം ടെസ്റ്റിൽ വിരാട് കോഹ്ലിയെയും ജോ റൂട്ടിനെയും മുൻ റോയൽ ചലഞ്ചേഴ്സ് ക്രിക്കറ്റ് താരം മുരളി കാർത്തിക്ക് താരതമ്യം ചെയ്തു. മാഞ്ചസ്റ്ററിലെ ഓൾഡ് ട്രാഫോർഡിൽ നടന്നുകൊണ്ടിരിക്കുന്ന മത്സരത്തിന്റെ മൂന്നാം ദിവസം റൂട്ട് മികച്ച സെഞ്ച്വറി നേടിയിരുന്നു.
എല്ലാ ഫോർമാറ്റുകളിലും നോക്കിയാൽ വിരാട് കോഹ്ലിയാണ് ഏറ്റവും മികച്ച ബാറ്റ്സ്മാൻ എന്ന് കാർത്തിക് പറഞ്ഞു. എന്നിരുന്നാലും, ടെസ്റ്റ് ക്രിക്കറ്റിന്റെ കാര്യത്തിൽ ജോ റൂട്ടിന് മുന്നിൽ മറ്റാരുമില്ലെന്ന് അദ്ദേഹം വിശ്വസിക്കുന്നു. ലോകമെമ്പാടുമുള്ള ഏത് സാഹചര്യത്തിലും ബാറ്റ് ചെയ്യാനുള്ള കഴിവിന് ഇംഗ്ലണ്ട് ബാറ്റ്സ്മാനെ അദ്ദേഹം പ്രശംസിച്ചു.
“എല്ലാ ഫോർമാറ്റ് ബാറ്റ്സ്മാന്മാരെക്കുറിച്ചും പറയുകയാണെങ്കിൽ, വിരാട് കോഹ്ലി എന്നൊരു പേരേയുള്ളൂ. എന്നാൽ ടെസ്റ്റ് ക്രിക്കറ്റിനെക്കുറിച്ച് മാത്രം പറയുകയാണെങ്കിൽ, ഈ ദശകത്തിൽ, ജോ റൂട്ടിനേക്കാൾ ആരും മുന്നിലാണെന്ന് ഞാൻ കരുതുന്നില്ല. അദ്ദേഹം ഏത് സാഹചര്യത്തിലും നന്നായി ബാറ്റ് ചെയ്യുന്നു. അദ്ദേഹം ഇന്ത്യയിൽ ആണെങ്കിലും വിദേശത്ത് ആണെങ്കിലും നന്നായി കളിക്കും. ടെസ്റ്റ് ഫോർമാറ്റിന് ചേർന്ന ശൈലിയാണ് അവന്റെ ” അദ്ദേഹം ക്രിക്ക്ബസിൽ പറഞ്ഞു.
ജോ റൂട്ട് 248 പന്തിൽ 14 ബൗണ്ടറികളോടെ 150 റൺസ് നേടി. ഇത് അദ്ദേഹത്തിന്റെ 38-ാമത്തെ ടെസ്റ്റ് സെഞ്ച്വറിയാണ്. ഇതോടെ, രാഹുൽ ദ്രാവിഡ്, ജാക്വസ് കാലിസ്, റിക്കി പോണ്ടിംഗ് എന്നിവരെ മറികടന്ന് ഫോർമാറ്റിൽ എക്കാലത്തെയും ഉയർന്ന രണ്ടാമത്തെ റൺ വേട്ടക്കാരനായി അദ്ദേഹം മാറി. റൂട്ടിന് ഇപ്പോൾ 157 മത്സരങ്ങളിൽ നിന്ന് 13409 റൺസ് ഉണ്ട്. പട്ടികയിൽ സച്ചിൻ ടെണ്ടുൽക്കറിന് മാത്രം പിന്നിലാണ് അദ്ദേഹം.
“അദ്ദേഹത്തിന് സച്ചിനെ മറികടക്കാൻ കഴിയും, പക്ഷേ അതിനായി കുറഞ്ഞത് മൂന്ന് മുതൽ മൂന്നര വർഷം വരെ കളിക്കേണ്ടിവരും. അത് അത്ര എളുപ്പമായിരിക്കില്ല. എന്നാൽ കഴിഞ്ഞ നാലോ അഞ്ചോ വർഷത്തിനിടെ ടെസ്റ്റ് ക്രിക്കറ്റിൽ മറ്റാരും അദ്ദേഹത്തെക്കാൾ കൂടുതൽ നേടിയിട്ടില്ലെന്ന് ഞാൻ കരുതുന്നു. 2500 റൺസ് നേടാൻ ഒരുപാട് ചെയ്യാനുണ്ട്. അദ്ദേഹത്തിന് 34 വയസുണ്ട്.” അദ്ദേഹം കൂട്ടിച്ചേർത്തു.
200 ടെസ്റ്റുകളിൽ നിന്നും 329 ഇന്നിംഗ്സുകളിൽ നിന്നും 53.78 ശരാശരിയിൽ 51 സെഞ്ച്വറികളുൾപ്പെടെ 15921 റൺസ് സച്ചിൻ നേടിയിട്ടുണ്ട്.
