വിറ്റ്നി വുൾഫ് ഹെർഡ്—ടിൻഡർ എന്ന വമ്പൻ ആപ്പിന്റെ സഹസ്ഥാപക. ആപ്പിന് ‘ടിൻഡർ’ എന്ന പേര് നൽകിയതും അതിന്റെ ഐക്കണിക് ആയ ‘ഫ്ലേം’ ലോഗോയ്ക്ക് പിന്നിൽ പ്രവർത്തിച്ചതും അവളായിരുന്നു. പക്ഷേ, വിജയത്തിന്റെ കൊടുമുടിയിൽ നിൽക്കുമ്പോൾ അവൾക്ക് നേരിടേണ്ടി വന്നത് സ്വന്തം സഹപ്രവർത്തകരിൽ നിന്നുള്ള ക്രൂരമായ അവഗണനയും മാനസിക പീഡനങ്ങളുമായിരുന്നു. താൻ പടുത്തുയർത്തിയ സാമ്രാജ്യത്തിൽ നിന്ന് പുറത്താക്കപ്പെട്ടപ്പോൾ അവൾ ശരിക്കും തകർന്നുപോയി. കോടതി കയറേണ്ടി വന്ന ആ പെൺകുട്ടിയെ ലോകം സോഷ്യൽ മീഡിയയിലൂടെ വേട്ടയാടി. ഫോൺ തുറന്നാൽ അസഭ്യവർഷങ്ങൾ മാത്രം. ഒരു മുറിക്കുള്ളിൽ കരഞ്ഞു തീർത്ത ആ രാത്രികളിൽ അവൾ ഒരു കാര്യം ഉറപ്പിച്ചു: “ഇനി ഒരാൾക്കും ഈ ഗതി വരരുത്.” തോറ്റു കൊടുക്കാൻ അവൾ തയ്യാറല്ലായിരുന്നു, പക്ഷേ എങ്ങനെ തിരിച്ചുവരും എന്നത് ഒരു വലിയ ചോദ്യചിഹ്നമായി അവശേഷിച്ചു.
എന്നാൽ, ആ തകർച്ചയിൽ നിന്ന് ഒരു പുതിയ വെളിച്ചം കണ്ടെത്താനാണ് വിറ്റ്നി തീരുമാനിച്ചത്. ഡിജിറ്റൽ ലോകത്ത് സ്ത്രീകൾ നേരിടുന്ന അധിക്ഷേപങ്ങൾക്ക് എതിരെ പ്രതികരിക്കാൻ അവൾക്ക് ആഗ്രഹമുണ്ടായിരുന്നു. സ്ത്രീകൾക്ക് മാത്രം പരസ്പരം പുകഴ്ത്താൻ കഴിയുന്ന ‘Merci’ എന്നൊരു സോഷ്യൽ നെറ്റ്വർക്കിംഗ് സൈറ്റായിരുന്നു അവളുടെ ആദ്യ ചിന്ത. എന്നാൽ ലോഞ്ചിന് തൊട്ടുമുമ്പ് വിറ്റ്നി ഒരു കാര്യം തിരിച്ചറിഞ്ഞു—യഥാർത്ഥ പ്രശ്നം പ്രണയത്തിന്റെ ലോകത്താണ്.അവിടെയാണ് പുരുഷന്മാർ സ്ത്രീകളെ വേട്ടയാടുന്നത്.
ആത്മഹത്യയെക്കുറിച്ച് പോലും ചിന്തിച്ച നിമിഷത്തിലാണ് വിറ്റ്നിയുടെ ഫോണിലേക്ക് ആ അപ്രതീക്ഷിത സന്ദേശം എത്തുന്നത്. റഷ്യൻ ശതകോടീശ്വരനായ ആൻഡ്രി ആൻഡ്രീവ് ആയിരുന്നു അത്. വിപണിയിൽ ചീത്തപ്പേരുള്ള ഒരു പെൺകുട്ടിയുമായി ആരും കൈകോർക്കാൻ മടിച്ചപ്പോൾ, ആൻഡ്രി അവളെ വിശ്വസിച്ചു.സ്ത്രീകൾക്ക് മുൻഗണന നൽകുന്ന ഒരു പുതിയ പ്ലാറ്റ്ഫോം തുടങ്ങാൻ അവളെ പ്രേരിപ്പിച്ചു. പക്ഷേ അവർക്ക് മുന്നിൽ ഒരു വലിയ കടമ്പയുണ്ടായിരുന്നു. പുരുഷന്മാർ ഭരിക്കുന്ന, സ്ത്രീകൾ വെറും കാഴ്ചവസ്തുക്കൾ മാത്രമായ ഡേറ്റിംഗ് വിപണിയിൽ എങ്ങനെ മാറ്റം കൊണ്ടുവരും? അവർക്ക് വേണ്ടത് വെറുമൊരു ആപ്പല്ലായിരുന്നു, മറിച്ച് ഒരു ആയുധമായിരുന്നു.
അങ്ങനെ 2014 ഡിസംബറിൽ ബംബിൾ പിറന്നു.”Ladies First” എന്നതായിരുന്നു ബംബിളിന്റെ പ്രധാന തത്വം. രണ്ട് വ്യക്തികൾ തമ്മിൽ പൊരുത്തപ്പെട്ടാൽ (Match), സംഭാഷണം തുടങ്ങാനുള്ള അധികാരം സ്ത്രീകൾക്ക് മാത്രമായിരിക്കും. ഇത് പുരുഷാധിപത്യം നിറഞ്ഞ ഡേറ്റിംഗ് ലോകത്തെ ഞെട്ടിച്ചു. പലരും ഈ ആശയത്തെ പരിഹസിച്ചു; “സ്ത്രീകൾ ഒരിക്കലും ആദ്യം സംസാരിക്കില്ല” എന്ന് അവർ വിധിയെഴുതി. പക്ഷേ, സ്ത്രീകൾ ആഗ്രഹിച്ചത് അനാവശ്യ സന്ദേശങ്ങളിൽ നിന്നുള്ള മോചനമായിരുന്നു. ബംബിൾ അവർക്ക് ആ സുരക്ഷിതത്വം നൽകി.
യാത്ര അത്ര എളുപ്പമായിരുന്നില്ല. ടിൻഡർ നിരന്തരം നിയമക്കുരുക്കുകളിലൂടെ ബംബിളിനെ തകർക്കാൻ ശ്രമിച്ചു. വലിയ കമ്പനികളുമായുള്ള നിയമയുദ്ധങ്ങളും വിപണിയിലെ മത്സരങ്ങളും വിറ്റ്നിക്ക് വലിയ വെല്ലുവിളിയായി. പക്ഷേ, അവൾ പതറിയില്ല. 2021 ഫെബ്രുവരിയിൽ ബംബിൾ ഓഹരി വിപണിയിൽ ലിസ്റ്റ് ചെയ്യപ്പെട്ടപ്പോൾ, സ്വന്തം പ്രയത്നത്തിലൂടെ ലോകത്തെ ഏറ്റവും പ്രായം കുറഞ്ഞ വനിതാ ശതകോടീശ്വരിയായി വിറ്റ്നി മാറി.
ഇന്ന് ബംബിൾ വെറുമൊരു പ്രണയവേദിയല്ല; സൗഹൃദങ്ങൾക്കായി ‘Bumble BFF’-ഉം കരിയർ വളർച്ചയ്ക്കായി ‘Bumble Bizz’-ഉം ഒക്കെയായി അതൊരു വലിയ ലോകമായി വളർന്നു. തന്നെ പുറത്താക്കിയവർക്കും അപമാനിച്ചവർക്കും മുന്നിൽ, അവരെക്കാൾ വലിയൊരു സാമ്രാജ്യം പടുത്തുയർത്തിക്കൊണ്ട് വിറ്റ്നി വിജയഭേരി മുഴക്കി.
