ഒഡീഷയിലെ റൂർക്കലയിൽ നിന്ന് അയോദ്ധ്യയിലേക്ക് ചരിത്രപ്രധാനമായ ശ്രീരാം സുവർണ്ണ ധനുസ്സ് യാത്രയ്ക്ക് തുടക്കമായി. റൂർക്കല സനാതന ജാഗരൺ മഞ്ചിന്റെ നേതൃത്വത്തിൽ ഹനുമാൻ വാതികയിൽ നടന്ന ചടങ്ങിൽ ആയിരക്കണക്കിന് ഭക്തർ സാക്ഷ്യം വഹിച്ചു. സനാതന ധർമ്മത്തിന്റെ ആദർശങ്ങളും ശ്രീരാമനോടുള്ള ഭക്തിയും ഉയർത്തിപ്പിടിക്കുന്നതാണ് ഈ യാത്ര.
ജയ് ജഗന്നാഥ്’, ‘ജയ് ശ്രീറാം’ വിളികളാൽ മുഖരിതമായ അന്തരീക്ഷത്തിൽ സാംബൽപുരി നൃത്തങ്ങളുടെയും ശ്രീരാമ വേഷധാരികളുടെയും അകമ്പടിയോടെയാണ് യാത്ര ഫ്ലാഗ് ഓഫ് ചെയ്തത്. അലങ്കരിച്ച പ്രത്യേക വാഹനത്തിൽ സ്ഥാപിച്ച ധനുസ്സ് ഒഡീഷയിലെ വിവിധ ജില്ലകളിലൂടെ പര്യടനം നടത്തും.
ജനുവരി 19-ന് പുരി ശ്രീ ജഗന്നാഥ ധാമിൽ എത്തുന്ന യാത്ര, രാമക്ഷേത്ര പ്രതിഷ്ഠാ വാർഷിക ദിനമായ ജനുവരി 22-ന് അയോദ്ധ്യയിൽ ഭക്തിസാന്ദ്രമായ ചടങ്ങുകളോടെ സമാപിക്കും. ഭാരതത്തിന്റെ ദേശീയ ബോധത്തെയും സാംസ്കാരിക അഖണ്ഡതയെയും കൂട്ടിയിണക്കുന്ന ഈ യാത്ര സുന്ദർഗഡ്, സംബൽപൂർ, കട്ടക്ക്, ഭുവനേശ്വർ തുടങ്ങി ഒഡീഷയിലെ പ്രമുഖ നഗരങ്ങളിലൂടെയെല്ലാം കടന്നുപോകും.
മുമ്പ് ലോകത്തിലെ ഏറ്റവും വലിയ വിളക്കും ലഡുവും നിർമ്മിച്ച് ശ്രദ്ധനേടിയ സനാതന ജാഗരൺ മഞ്ച്, ഇക്കുറി സുവർണ്ണ ധനുസ്സിലൂടെ ഭാരതീയ പൈതൃകത്തിന്റെ പെരുമ വീണ്ടും ആഗോളതലത്തിൽ ഉയർത്തുകയാണ്. തമിഴ്‌നാട്ടിലെ കാഞ്ചീപുരത്തുനിന്നുള്ള 40 പ്രഗത്ഭരായ കലാകാരന്മാർ എട്ട് മാസത്തെ കഠിനാധ്വാനത്തിലൂടെയാണ് ഈ ധനുസ്സ് നിർമ്മിച്ചത്.
പഞ്ചലോഹ നിർമ്മിതം: സ്വർണ്ണം, വെള്ളി, സിങ്ക്, ഇരുമ്പ്, അലുമിനിയം എന്നീ അഞ്ച് ലോഹങ്ങളുടെ സംഗമം.
അളവുകൾ: 8 അടി നീളവും 3 അടി ഉയരവുമുള്ള ധനുസ്സിന് 286 കിലോയാണ് ആകെ ഭാരം.
സ്വർണ്ണവും വെള്ളിയും: ഏകദേശം 986 ഗ്രാം സ്വർണ്ണവും 2.5 കിലോഗ്രാം വെള്ളിയും ഇതിൽ ഉപയോഗിച്ചിട്ടുണ്ട്.
നിർമ്മാണച്ചെലവ്: ഏകദേശം 1.10 കോടി രൂപയാണ് ഈ പുണ്യസൃഷ്ടിയുടെ നിർമ്മാണത്തിനായി ചെലവായത്.
