ഇന്നലെ റായ്പൂരിൽ നടന്ന രണ്ടാം ടി20-യിൽ ന്യൂസിലൻഡിനെതിരെ ഇന്ത്യ നേടിയ ഐതിഹാസിക വിജയത്തെക്കുറിച്ചും ഇഷാൻ കിഷന്റെ വെടിക്കെട്ട് ബാറ്റിംഗിനെക്കുറിച്ച് ക്യാപ്റ്റൻ സൂര്യകുമാർ യാദവ് ചില കാര്യങ്ങൾ സംസാരിച്ചു. കിവീസ് ഉയർത്തിയ 209 റൺസ് എന്ന കൂറ്റൻ ലക്ഷ്യം പിന്തുടർന്ന ഇന്ത്യയ്ക്ക് തുടക്കത്തിൽ തന്നെ സഞ്ജു സാംസണെയും (6) അഭിഷേക് ശർമ്മയെയും (0) നഷ്ടമായി. ഇന്ത്യ 6 റൺസിന് 2 വിക്കറ്റ് എന്ന തകർച്ചയിലായ ഘട്ടത്തിലാണ് ഇഷാൻ കിഷൻ ക്രീസിലെത്തുന്നത്.
മത്സരശേഷം ഇഷാന്റെ ഇന്നിംഗ്സിനെക്കുറിച്ച് സൂര്യകുമാർ പറഞ്ഞ വാക്കുകൾ ആരാധകർ ഏറ്റെടുത്തു കഴിഞ്ഞു:
“ഇഷാൻ ഉച്ചയ്ക്ക് എന്താണ് കഴിച്ചതെന്ന് എനിക്കറിയില്ല. പക്ഷേ, 6 റൺസിന് 2 വിക്കറ്റ് എന്ന നിലയിൽ നിന്ന് ഇത്രയും ആക്രമണോത്സുകമായി ആരെങ്കിലും ബാറ്റ് ചെയ്യുന്നത് ഞാൻ ഇതിനുമുമ്പ് കണ്ടിട്ടില്ല. പവർപ്ലേ അവസാനിക്കുമ്പോൾ സ്കോർ 70-ന് അടുത്ത് എത്തിച്ചത് അവിശ്വസനീയമായിരുന്നു. ബാറ്റർമാർ ഭയമില്ലാതെ കളിക്കണമെന്നാണ് ഞങ്ങൾ ആഗ്രഹിക്കുന്നത്, അത് തന്നെയാണ് ഇഷാൻ ഇന്ന് ചെയ്തത്.”
പവർപ്ലേയിൽ ഇഷാൻ തന്നെ സ്ട്രൈക്ക് കൈവശം വെച്ചതിനെക്കുറിച്ച് തമാശരൂപേണ സൂര്യ ഇങ്ങനെയും കൂട്ടിച്ചേർത്തു: “പവർപ്ലേയിൽ അവൻ എനിക്ക് സ്ട്രൈക്ക് തരാത്തതിൽ എനിക്ക് ചെറിയ ദേഷ്യം തോന്നിയിരുന്നു, പക്ഷേ പിന്നീട് എനിക്ക് കളി പിടിക്കാൻ സമയമുണ്ടെന്ന് എനിക്കറിയാമായിരുന്നു”.
വെറും 21 പന്തിൽ ഫിഫ്റ്റി തികച്ച് ന്യൂസിലൻഡിനെതിരെ അതിവേഗ ഫിഫ്റ്റി നേടുന്ന ഇന്ത്യൻ താരമായി ഇഷാൻ മാറി. 11 ഫോറുകളും 4 സിക്സറുകളും അടങ്ങിയതായിരുന്നു ആ ഇന്നിംഗ്സ്. ശേഷം ക്യാപ്റ്റന്റെ ഇന്നിംഗ്സിലൂടെ സൂര്യ ഇന്ത്യയെ വിജയത്തിലെത്തിച്ചു. 468 ദിവസങ്ങൾക്ക് ശേഷമാണ് അദ്ദേഹം ടി20-യിൽ ഒരു ഫിഫ്റ്റി നേടുന്നത്.
