മലയാളി താരം സഞ്ജു സാംസണെ സംബന്ധിച്ച് ഏറെ നിരാശാജനകമായസമയത്തിലൂടെയാണ് അദ്ദേഹം കടന്നുപോകുന്നത്. ഗുവാഹത്തിയിൽ ഇന്നലെ കിവീസിനെതിരെ നടന്ന മത്സരത്തിലും പൂജ്യനായി മടങ്ങിയതോടെ താരത്തെ ലോകകപ്പ് ടീമിൽ നിന്നും പുറത്താക്കണം എന്ന ആവശ്യം ശക്തമാണ്. 2026-ലെ ടി20 ലോകകപ്പിന് മുന്നോടിയായുള്ള നിർണ്ണായക ഘട്ടത്തിൽ സഞ്ജുവിന്റെ ഫോമില്ലായ്മ വലിയ ചർച്ചകൾക്ക് വഴിവെച്ചിരിക്കുകയാണ്.
ന്യൂസിലാൻഡിനെതിരായ മൂന്നാം ടി20യിൽ നേരിട്ട ആദ്യ പന്തിൽ തന്നെ പുറത്തായതോടെ സഞ്ജു സാംസൺ ഒരു മോശം റെക്കോർഡിൽ രോഹിത് ശർമ്മയ്ക്കും വിരാട് കോഹ്‌ലിക്കും ഒപ്പമെത്തി.
ഡക്കുകളുടെ കണക്ക് (ടി20 അന്താരാഷ്ട്ര മത്സരങ്ങളിൽ)
രോഹിത് ശർമ്മ: 12 ഡക്കുകൾ (159 മത്സരങ്ങളിൽ നിന്ന്)
വിരാട് കോലി: 7 ഡക്കുകൾ (125 മത്സരങ്ങളിൽ നിന്ന്)
സഞ്ജു സാംസൺ: ഇന്നലത്തോടെ തന്റെ 7-ാം ഡക്ക് പൂർത്തിയാക്കി കോഹ്‌ലിയുടെ റെക്കോഡിന് ഒപ്പമെത്തി
രോഹിത്തും കോഹ്‌ലിയും നൂറിലധികം മത്സരങ്ങൾ കളിച്ചാണ് ഈ സംഖ്യയിൽ എത്തിയതെങ്കിൽ, സഞ്ജു വളരെ കുറഞ്ഞ ഇന്നിംഗ്‌സുകളിൽ നിന്ന് തന്നെ ഈ ‘നാണക്കേടിന്റെ’ റെക്കോർഡിൽ ഇടംപിടിച്ചു എന്നത് ആരാധകരെ ആശങ്കപ്പെടുത്തുന്നു. ന്യൂസിലാൻഡിനെതിരായ ഈ പരമ്പര സഞ്ജുവിനെ സംബന്ധിച്ച് വളരെ നിർണ്ണായകമായിരുന്നു. എന്നാൽ ആദ്യ മൂന്ന് മത്സരങ്ങളിലും താരം പരാജയപ്പെട്ടു. മൂന്ന് മത്സരങ്ങളിലുമായി 16 റൺസ് മാത്രമാണ് സഞ്ജുവിന് നേടാനായത്.
സഞ്ജുവിന് ബിസിസിഐ മതിയായ അവസരങ്ങൾ നൽകുന്നില്ല എന്ന പരാതിക്ക് ഇപ്പോൾ പ്രസക്തി കുറഞ്ഞിരിക്കുകയാണ്. “ഫോം താൽക്കാലികമാണ്, പക്ഷേ സ്ഥിരതയില്ലാത്തത് സഞ്ജുവിന്റെ സ്ഥിരം പ്രശ്നമാണ്” എന്ന തരത്തിലുള്ള വിമർശനങ്ങൾ സോഷ്യൽ മീഡിയയിൽ ഉയരുന്നുണ്ട്.
വിശാഖപട്ടണത്ത് നടക്കാനിരിക്കുന്ന അടുത്ത മത്സരത്തിൽ സഞ്ജുവിന് ഒരു അവസരം കൂടി ലഭിക്കുമോ അതോ ടീം പരീക്ഷണങ്ങളിലേക്ക് കടക്കുമോ എന്നാണ് ഇനി അറിയേണ്ടത്.
