2026-ലെ ചെന്നൈ സൂപ്പർ കിംഗ്സിന്റെ അവസാന ഹോം മത്സരത്തിന് ചെപ്പോക്ക് സ്റ്റേഡിയം ഒരുങ്ങുമ്പോൾ, ക്രിക്കറ്റ് ലോകം മുഴുവൻ ഉറ്റുനോക്കുന്നത് ഒരേയൊരു മുഖത്തേക്കാണ്—മഹേന്ദ്ര സിംഗ് ധോണി. ഇന്ന് സൺറൈസേഴ്സ് ഹൈദരാബാദിനെതിരെ ധോണി കളത്തിലിറങ്ങുമോ എന്ന ആകാംക്ഷയിലാണ് ആരാധകർ.
ഈ സീസണിൽ ഇതുവരെ ഒരു മത്സരം പോലും കളിക്കാതിരുന്ന എം.എസ്. ധോണി ഇന്ന് കളത്തിലിറങ്ങുമെന്ന സൂചനകളാണ് പുറത്തുവരുന്നത്. പരിക്കുകാരണം വിട്ടുനിന്ന ധോണി, തന്റെ അവസാന മത്സരം ചെന്നൈയിൽ കളിക്കുമെന്ന പഴയ വാഗ്ദാനം പാലിക്കാനുള്ള ഒരുക്കത്തിലാണോ എന്നാണ് ഏവരും ഉറ്റുനോക്കുന്നത്.
2021-ൽ ചെന്നൈയുടെ ഐപിഎൽ കിരീടധാരണ ചടങ്ങിൽ വെച്ച് ധോണി ഒരു കാര്യം പറഞ്ഞിരുന്നു “എന്റെ അവസാന ടി20 മത്സരം ചെന്നൈയിൽ ആയിരിക്കുമെന്ന് ഞാൻ പ്രതീക്ഷിക്കുന്നു. അത് അടുത്ത വർഷമാകാം, അല്ലെങ്കിൽ അഞ്ച് വർഷം കഴിഞ്ഞാകാം.” കൃത്യം അഞ്ച് വർഷം തികയുന്ന ഈ വേളയിൽ, ചെപ്പോക്കിലെ ഈ സീസണിലെ അവസാന മത്സരത്തിന് ധോണി എത്തുന്നത് ഒരു വിടവാങ്ങൽ മത്സരത്തിന്റെ സൂചനയായാണ് ആരാധകർ കാണുന്നത്.
ധോണിയുടെ മുൻ സഹതാരമായ ആർ. അശ്വിൻ നൽകുന്ന സൂചനകൾ ആരാധകർക്ക് വലിയ പ്രതീക്ഷ നൽകുന്നുണ്ട്. കഴിഞ്ഞ രണ്ട് മൂന്ന് മത്സരങ്ങളായി ധോണി പൂർണ്ണ കായികക്ഷമതയോടെ കളിക്കാൻ തയ്യാറാണെന്നും, ഹൈദരാബാദിനെതിരെ അദ്ദേഹം കളത്തിലിറങ്ങാൻ വലിയ സാധ്യതയുണ്ടെന്നും അശ്വിൻ തന്റെ യൂട്യൂബ് ചാനലിലൂടെ പറഞ്ഞു. ധോണിക്ക് പരിക്കാണെന്ന് റിപ്പോർട്ടുകൾ ഉണ്ടെങ്കിലും, ടീമിന്റെ ഭാവി കണക്കിലെടുത്ത് യുവതാരങ്ങൾക്ക് അവസരം നൽകാനാണ് അദ്ദേഹം മാറിനിന്നതെന്ന വാദവുമുണ്ട്. ടീം കോമ്പിനേഷനിൽ മാറ്റം വരുത്താൻ ആഗ്രഹിക്കാത്തതിനാലാണ് അദ്ദേഹം പ്ലേയിംഗ് ഇലവനിൽ നിന്ന് വിട്ടുനിന്നത്. എന്നാൽ ചെപ്പോക്കിലെ ഈ അവസാന അങ്കത്തിൽ ആരാധകരെ നിരാശരാക്കാൻ ‘തല’ തയ്യാറാകില്ലെന്നാണ് കരുതപ്പെടുന്നത്.
ഇന്ന് രാത്രി ചെന്നൈയും ഹൈദരാബാദും ഏറ്റുമുട്ടുമ്പോൾ, അത് ധോണിയുടെ ഐപിഎൽ കരിയറിലെ അവസാന മത്സരമാകുമോ എന്ന ആകാംക്ഷയിലാണ് കായിക ലോകം.
