ഐപിഎല്ലിൽ ഗുജറാത്ത് ടൈറ്റൻസിന്റെ റൺവേട്ടക്കാരനും നിലവിൽ ഇന്ത്യൻ ടെസ്റ്റ് ടീമിലെ മൂന്നാം നമ്പറുകാരനുമായ സായ് സുദർശൻ, ചെന്നൈ സൂപ്പർ കിങ്സ് ഇതിഹാസം എം.എസ്. ധോണിയുമായി നടത്തിയ ഒരു രസകരമായ കൂടിക്കാഴ്ചയുടെ ഓർമ്മകൾ പങ്കുവെക്കുന്നു. ഐപിഎൽ 2026 സീസണിലും ഗുജറാത്തിനായി മികച്ച പ്രകടനം പുറത്തെടുത്ത താരം, ചെന്നൈയിലെ ഒരു പ്രാദേശിക യൂട്യൂബ് ചാനലിന് നൽകിയ അഭിമുഖത്തിലാണ് ധോണി, വിരാട് കോഹ്ലി, ജസ്പ്രീത് ബുംറ എന്നിവരുമായുള്ള തന്റെ ഹൃദ്യമായ അനുഭവങ്ങൾ തുറന്നുപറഞ്ഞത്.
“ഒരിക്കൽ ഞാൻ എം.എസ്. ധോണിയെ കാണാൻ ചെന്നപ്പോൾ അദ്ദേഹം എന്നോട് ചോദിച്ചു; ‘നീ എന്തിനാണ് എന്നെ കാണാൻ വന്നത്? നീ ഇപ്പോൾ തന്നെ വളരെ നന്നായി കളിക്കുന്നുണ്ടല്ലോ’ എന്ന്. ചെന്നൈക്കെതിരെ സെഞ്ച്വറി അടിച്ചതിന്റെ വലിയ സന്തോഷത്തിലാണ് ഞാൻ അദ്ദേഹത്തെ കാണാൻ പോയത്. എന്നാൽ ധോണി തന്റെ പതിവ് ശൈലിയിൽ കളിയാക്കിക്കൊണ്ട് ചോദിച്ചു; ‘നീ ഇത്രയും നന്നായി കളിക്കുമ്പോൾ പിന്നെ എന്തിനാണ് എന്നോട് സംസാരിക്കുന്നത്?’ എന്ന്. ആ വാക്കുകൾ എനിക്ക് വലിയ സന്തോഷമാണ് നൽകിയത്.”
ധോണിക്ക് പുറമെ ഇന്ത്യൻ ക്രിക്കറ്റിലെ മറ്റ് രണ്ട് ഇതിഹാസങ്ങളായ ജസ്പ്രീത് ബുംറയും വിരാട് കോഹ്ലിയും നൽകിയ പ്രശംസകൾ തന്റെ കരിയറിലെ ഏറ്റവും വിലപ്പെട്ട നിമിഷങ്ങളാണെന്ന് 24-കാരനായ ഈ ചെന്നൈ സ്വദേശി ഓർക്കുന്നു. “കഴിഞ്ഞ വർഷത്തെ ഐപിഎൽ അവാർഡ് ചടങ്ങിൽ വെച്ച് ജസ്പ്രീത് ബുമ്ര എന്റെ തോളിൽ തട്ടി പറഞ്ഞു; ‘മികച്ച സീസൺ ആയിരുന്നു സുദർശൻ’ എന്ന്. ലോകത്തിലെ ഏറ്റവും മികച്ച ബൗളർ അങ്ങനെ പറയുമ്പോൾ കിട്ടുന്ന ഒരു സംതൃപ്തി ചെറുതല്ല. അതുപോലെ ഈ വർഷത്തെ ഐപിഎൽ ഫൈനലിന് ശേഷം വിരാട് കോഹ്ലി എന്റെ അടുത്ത് വന്ന് കെട്ടിപ്പിടിച്ച് പറഞ്ഞു; ‘വീണ്ടുമൊരു മികച്ച സീസൺ കൂടി, ഭംഗിയായി മുന്നോട്ട് പോകൂ’ എന്ന്. ഈ വാക്കുകളാണ് ഞാൻ ശരിയായ ദിശയിലാണ് സഞ്ചരിക്കുന്നത് എന്ന് എനിക്ക് മനസ്സിലാക്കി തരുന്നത്.”
ചെന്നൈ സ്വദേശിയാണെങ്കിലും 2022 മുതൽ 2026 വരെയുള്ള അഞ്ച് ഐപിഎൽ സീസണുകളിലും ഗുജറാത്ത് ടൈറ്റൻസിന് വേണ്ടിയാണ് സായ് കളിച്ചത്. എന്നാൽ ചെന്നൈ സൂപ്പർ കിങ്സിന് ( വേണ്ടി കളിക്കുക എന്നത് തന്റെ എക്കാലത്തെയും വലിയ സ്വപ്നമാണെന്ന് താരം വെളിപ്പെടുത്തി. “സിഎസ്കെക്ക് വേണ്ടി കളിക്കണമെന്ന് ഞാൻ ഒരുപാട് തവണ ആഗ്രഹിച്ചിട്ടുണ്ട്. സ്കൂളിലും കോളേജിലും പഠിക്കുന്ന കാലത്ത് സിഎസ്കെയുടെ മഞ്ഞ ബസ്സ് എന്നെ മറികടന്നു പോകുമ്പോൾ ഉണ്ടാകുന്ന സന്തോഷം പറഞ്ഞറിയിക്കാൻ കഴിയില്ല. ഞങ്ങൾ പലപ്പോഴും ആ ബസ്സിന് തൊട്ടുപുറകെ പോകുമായിരുന്നു.” – താരം പഴയ ഓർമ്മകൾ പങ്കുവെച്ചു.
നിലവിൽ ഇന്ത്യൻ ടെസ്റ്റ് ടീമിൽ മൂന്നാം നമ്പറിൽ സ്ഥാനമുറപ്പിച്ചു വരുന്ന സായ് സുദർശൻ, ഇന്ത്യക്കായി ഏകദിന-ട്വന്റി 20 ഫോർമാറ്റുകളിലും ഇതിനകം അരങ്ങേറ്റം കുറിച്ചിട്ടുണ്ട്.
