കൊല്ക്കത്ത: ബിജെപി നേതാവിനെ അജ്ഞാതര് വെടിവച്ചു കൊന്നു. ബിജെപി പ്രാദേശിക നേതാവ് മനീഷ് ശുക്ലയെയാണ് ഞായറാഴ്ച രാത്രി അജ്ഞാതര് വെടിവച്ചു കൊലപ്പെടുത്തിയത്. പശ്ചിമ ബംഗാളിലെ നോര്ത്ത് 24 പര്ഗാനാസ് ജില്ലയിലെ ടിറ്റഗഡിന് സമീപം ലോക്കല് പൊലീസ് സ്റ്റേഷനില് നിന്ന് ഏതാനും മീറ്റര് അകലെയുള്ള ബിടി റോഡിലാണ് സംഭവം.
ശുക്ലയുടെ പുറകിലും തലയ്ക്കും പലതവണ വെടിവച്ചതായി പൊലീസ് വൃത്തങ്ങള് അറിയിച്ചു. ഉടന് തന്നെ ഇ.എം ബൈപാസിലെ ഒരു സ്വകാര്യ ആശുപത്രിയില് എത്തിച്ചെങ്കിലും ഡോക്ടര്മാര് മരിച്ചതായി സ്ഥിരീകരിക്കുകയായിരുന്നു.
അക്രമികള് മുഖംമൂടിയും ഹെല്മെറ്റും ധരിച്ച് മുഖം മൂടി മോട്ടോര് സൈക്കിളുകളിലാണ് എത്തിയതെന്ന് ദൃക്സാക്ഷികള് പറഞ്ഞു. ആക്രമണത്തിനിടെ ശുക്ലയെ രക്ഷിക്കാന് ശ്രമിച്ച മറ്റ് രണ്ട് ബിജെപി പ്രവര്ത്തകര്ക്കും വെടിയേറ്റു.
കൊലപാതകത്തില് പ്രതിഷേധിച്ച് തിങ്കളാഴ്ച (ഒക്ടോബര് 5) ബാരക്പൂര് പ്രദേശത്ത് ബി.ജെ.പിയുടെ പശ്ചിമ ബംഗാള് യൂണിറ്റ് രാവിലെ മുതല് വൊകുന്നേരം വരെ അടച്ചുപൂട്ടാന് ആവശ്യപ്പെട്ടിട്ടുണ്ട്. ജനറല് സെക്രട്ടറി സഞ്ജയ് സിംഗ്, എംപിമാരായ അര്ജുന് സിംഗ്, സൗമിത്ര ഖാന്, ജഗന്നാഥ് സര്ക്കാര്, ശങ്കു ദെബ് പാണ്ട എന്നിവരടങ്ങുന്ന ബിജെപിയുടെ കേന്ദ്ര സംഘം തിങ്കളാഴ്ച ശുക്ലയുടെ വസതി സന്ദര്ശിക്കുമെന്ന് ഐഎഎന്എസ് വൃത്തങ്ങള് ഉദ്ധരിച്ച് പറഞ്ഞു.
അതേസമയം സംഭവുമായി ബന്ധപ്പെട്ട് പശ്ചിമ ബംഗാള് ഗവര്ണര് ജഗദീപ് ധങ്കര് മുഖ്യമന്ത്രി മമത ബാനര്ജിയെയും സംസ്ഥാന പൊലീസ് മേധാവിയെയും വിളിച്ചുവരുത്തി. സംഭവത്തില് പൊലീസിന്റെ പങ്ക് സംബന്ധിച്ച് സിബിഐ അന്വേഷണം ആവശ്യപ്പെട്ടിട്ടുണ്ട്. മമത ബാനര്ജിയ്ക്ക് ഭീകരതയോടെ സംസ്ഥാനം ഭരിക്കാന് കഴിയില്ലെന്നും ബിജെപി ദേശീയ ജനറല് സെക്രട്ടറി കൈലാഷ് വിജയവര്ഗിയ പറഞ്ഞു.
Discussion about this post