വാട്സാപ്പിന്‍റെ പുതിയ ഫീച്ചറായ വാട്സാപ്പ് ചാനലിൽ തന്റെ ഏറ്റവും പുതിയ ചിത്രം മലയ്ക്കോട്ടൈ വാലിബന്റെ വിശേഷങ്ങളുമായി മലയാളികളുടെ പ്രിയപ്പെട്ട താരം മോഹൻലാൽ. മോഹൻലാലും സംവിധായകൻ ലിജോ ജോസ് പെല്ലിശ്ശേരിയും ഒന്നിക്കുന്ന ഈ ചിത്രത്തിന്റെ അപ്ഡേറ്റുകള്ക്കായി ചിത്രം പ്രഖ്യാപിച്ച കാലം മുതൽ തന്നെ ആരാധകർ ആവേശത്തോടെ കാത്തിരിപ്പിലാണ്.
തന്റെ ഫോളോവെഴ്സിനായി പങ്കുവച്ച സന്ദേശത്തിൽ മോഹൻലാൽ ഇങ്ങനെ പറയുന്നു; “നമ്മൾ മലയ്ക്കോട്ടൈ വാലിബനെക്കുറിച്ചു സംസാരിച്ചിട്ട് കുറച്ചു കാലമായിക്കാണുമല്ലോ. എങ്കിൽപ്പിന്നെ അത് നാളെ വൈകുന്നേരം (സെപ്‌റ്റംബർ 18) 5 മണിക്ക് ആയാലോ? എന്തായാലും നിങ്ങൾക്കായി ചില വാർത്തകൾ ഉണ്ടാവും, കാത്തിരിക്കൂ.”
എന്നാൽ എന്താവും അതെന്ന സൂചന നൽകാത്ത ഈ പ്രഖ്യാപനം പ്രേക്ഷകരുടെ ആകാംക്ഷ വല്ലാതെ വർധിപ്പിച്ചിരിക്കുകയാണ്.
അത് സിനിമയുടെ അണിയറപ്രവർത്തകരുമായുള്ള ഒരു ചോദ്യോത്തര സെഷനോ, തത്സമയ അഭിമുഖമോ, അല്ലെങ്കിൽ സിനിമയുടെ റിലീസ് തീയതിയുടെ പ്രഖ്യാപനമോ ആവാം എന്ന് ഊഹിക്കുകയാണ് അവർ. പി എസ് റഫീഖ് തിരക്കഥയെഴുതിയ ഈ ചിത്രത്തിൽ, മോഹൻലാൽ സ്വാതന്ത്ര്യത്തിനും മുമ്പുള്ള ഒരു ഗുസ്തിക്കാരന്റെ വേഷത്തിലാണ് എത്തുന്നത്.മെറ്റ വാട്സാപ്പിൽ അവതരിപ്പിച്ച വാട്സാപ്പ് ചാനൽ എന്ന ഈ പുതിയ ഫീച്ചറിലൂടെ ഇഷ്ട താരങ്ങള്‍ പങ്കുവെക്കുന്ന സന്ദേശങ്ങള്‍, അറിയിപ്പുകള്‍ എന്നിവ അവരെ ഫോളോ ചെയ്യുന്ന ആളുകളുടെ വാട്സാപ്പില്‍ നേരിട്ട് ലഭിക്കും.
