കാൽസ്യം പാലിൽ മാത്രമല്ല ഉള്ളത് ; ഈ ഭക്ഷണങ്ങൾ കഴിച്ച് എല്ലുകളുടെ ആരോഗ്യം നിലനിർത്താം

അസ്ഥികളുടെ ആരോഗ്യത്തിൽ പ്രധാന പങ്കുവഹിക്കുന്ന ഒരു ധാതുവാണ് കാൽസ്യം . ഹൃദയത്തിന്റെയും പേശികളുടെയും പ്രവർത്തനം ആരോഗ്യകരമായി നിലനിർത്താൻ കാൽസ്യം സഹായിക്കുന്നു. കാൽസ്യം അടങ്ങിയ ഭക്ഷണങ്ങൾ കഴിക്കുന്നത് എല്ലുകളുടെ വളർച്ചയ്ക്കും ശരീരത്തിന്റെ ബലം നിലനിർത്തുന്നതിനും പ്രധാനമാണ്. ആരോഗ്യകരമായ കോശങ്ങളുടെ പ്രവർത്തനത്തിനുള്ള ഒരു പ്രധാന പോഷകം കൂടിയാണ് കാൽസ്യം. രക്തസമ്മർദ്ദം, ഹോർമോണുകളുടെ അളവ് എന്നിവ നിയന്ത്രിക്കുന്നതിനും ശരീരത്തിന് കാൽസ്യം ആവശ്യമാണ്.

പാൽ കാൽസ്യത്തിന്റെ ഒരു മികച്ച ഉറവിടമാണെന്ന് നമുക്കറിയാം. എന്നാൽ പാലിൽ മാത്രമല്ല കാൽസ്യം ധാരാളമായി അടങ്ങിയിട്ടുള്ളത്. ഇനി പാൽ കഴിക്കാത്തവർ ആണെങ്കിൽ പോലും മറ്റു ചില ഭക്ഷണ വസ്തുക്കൾ പകരമായി കഴിക്കുന്നതിലൂടെ സ്വാഭാവികമായി ലഭിക്കുന്ന കാൽസ്യത്തിന്റെ അളവ് ശരീരത്തിൽ നിലനിർത്താം. അത്തരത്തിൽ മികച്ച കാൽസ്യം ലഭിക്കാനായി നിങ്ങൾ തിരഞ്ഞെടുക്കേണ്ട ഭക്ഷണങ്ങൾ എന്തൊക്കെയാണെന്ന് നോക്കാം.

കടുത്ത പച്ച നിറത്തിലുള്ള ഇലക്കറികൾ

ഇലക്കറികൾ കാൽസ്യത്തിന്റെ നല്ലൊരു ഉറവിടമാണ്. അതിനായി എപ്പോഴും കടുത്ത പച്ച നിറത്തിലുള്ള ഇലക്കറികൾ തിരഞ്ഞെടുക്കേണ്ടതാണ്. ചീര, മുരിങ്ങയില എന്നിവ പോലെയുള്ള ഇലക്കറികൾ കാൽസ്യത്തിന്റെ മികച്ച സ്രോതസ്സാണ്. ഇത്തരത്തിലുള്ള ഒരു കപ്പ് ഇലക്കറികളിൽ ഒരു കപ്പ് പാലിൽ ഉള്ളതിനേക്കാൾ കൂടുതൽ കാൽസ്യം അടങ്ങിയിട്ടുണ്ട്.

അത്തിപ്പഴം

ഉണക്കിയ അത്തിപ്പഴം ആരോഗ്യകരവും കാൽസ്യം അടങ്ങിയതുമായ ലഘുഭക്ഷണമാണ്. രണ്ട് അത്തിപ്പഴങ്ങളിൽ ഏകദേശം 27 മില്ലിഗ്രാം കാൽസ്യം അടങ്ങിയിട്ടുണ്ട്.

സോയാബീൻ

കാൽസ്യം ധാരാളമായി അടങ്ങിയിട്ടുള്ള മറ്റൊരു ഭക്ഷണമാണ് സോയാബീൻ. സസ്യാഹാരരീതി പിന്തുടരുന്നവർക്ക് കാൽസ്യത്തിനായി കഴിക്കാവുന്ന ഏറ്റവും മികച്ച മാർഗവും ആണ് ഇത്. സോയാബീൻ, സോയ മിൽക്ക്, സോയ ചങ്ക്സ്, ടോഫു എന്നിങ്ങനെയുള്ള സോയാബീന്റെ ഏതു പരുവത്തിലും കാൽസ്യം ധാരാളമായി അടങ്ങിയിട്ടുണ്ട്.

ഈന്തപ്പഴം

100 ഗ്രാം ഈന്തപ്പഴത്തില്‍ 64 മില്ലിഗ്രാം കാത്സ്യം അടങ്ങിയിട്ടുണ്ട്. അതിനാല്‍ എല്ലുകളുടെ ആരോഗ്യത്തിനായി ഈന്തപ്പഴം കഴിക്കുന്നത് ഗുണം ചെയ്യും. കൂടാതെ പോഷകങ്ങളാൽ സമ്പുഷ്ടവുമാണ് ഈന്തപ്പഴം.