വയനാട്: വയനാട്ടിലെ ദുരന്ത മേഖലയിലെ സന്ദര്‍ശനത്തിന് പിന്നാലെ ഫേസ്ബുക്ക് കുറിപ്പുമായി മോഹന്‍ലാല്‍. വയനാട്ടിലെ തകര്‍ച്ച ഉണങ്ങാന്‍ സമയമെടുക്കുന്ന, ആഴമുള്ള മുറിവാണെന്നാണ് ലഫ്. കേണല്‍ പദവി കൂടിയുള്ള മോഹന്‍ലാല്‍ കുറിച്ചത്. അടിയന്തിര സഹായമെന്ന നിലയില്‍ വിശ്വശാന്തി ഫൗണ്ടേഷന്‍ 3 കോടി രൂപ നല്‍കും. മുണ്ടക്കൈയിലെ എല്‍പി സ്കൂളിന്‍റെ പുനര്‍നിര്‍മ്മാണവും തങ്ങളുടെ കടമകളില്‍ ഒന്നാണെന്നും അദ്ദേഹം കൂട്ടിച്ചേര്‍ത്തു.
ഫേസ്ബുക്ക് പോസ്റ്റിന്റെ പൂര്‍ണരൂപം
വയനാട്ടിലെ നാശനഷ്ടങ്ങള്‍ ആഴത്തിലുള്ള മുറിവാണ്, അത് ഉണങ്ങാൻ സമയമെടുക്കും. നഷ്ടപ്പെട്ട ഓരോ വീടും അലങ്കോലപ്പെട്ട ഓരോ ജീവിതവും വ്യക്തിപരമായ ദുരന്തമാണ്.
ഡോർഫ്-കെറ്റൽ കെമിക്കൽസ് ഇന്ത്യ പ്രൈവറ്റ് ലിമിറ്റഡിൻ്റെ പിന്തുണയോടെ വിശ്വശാന്തി ഫൗണ്ടേഷൻ അടിയന്തര ദുരിതാശ്വാസത്തിനും പുനർനിർമ്മാണ ശ്രമങ്ങൾക്കുമായി 3 കോടി നല്‍കുമെന്ന് ഉറപ്പ് നല്‍കിയിട്ടുണ്ട്. മുണ്ടക്കൈയിലെ എൽപി സ്കൂളിൻ്റെ പുനർനിർമാണവും ഞങ്ങളുടെ പ്രതിബദ്ധതകളിലൊന്നാണ്. എൻ്റെ 122ടിഎ മദ്രാസ് ബറ്റാലിയനിലെ സൈനികരുടെയും രക്ഷാപ്രവർത്തകരുടെയും ധീരമായ പ്രയത്‌നങ്ങൾക്ക് സാക്ഷ്യം വഹിച്ചത് വലിയൊരു അനുഭവമായിരുന്നു. അവരുടെ നിസ്വാർത്ഥമായ സമർപ്പണവും സമൂഹത്തിൻ്റെ സഹിഷ്ണുതയും പ്രതീക്ഷ നൽകുന്നു. ഞങ്ങൾ ഒരുമിച്ച് പുനര്‍നിര്‍മ്മിക്കും, മുറിവുണക്കും, പൂര്‍വ്വാധികം ശക്തിയോടെ തിരിച്ചുവരും”, മോഹന്‍ലാല്‍ ഫേസ്ബുക്കില്‍ കുറിച്ചു.
Discussion about this post