ഐപിഎൽ 2026-ൽ റോയൽ ചലഞ്ചേഴ്സ് ബെംഗളൂരുവിന്റെ (RCB) അശ്വമേധം തുടരുന്നു. ചിന്നസ്വാമി സ്റ്റേഡിയത്തിൽ നടന്ന ഏറ്റവും പുതിയ പോരാട്ടത്തിലും ചെന്നൈ സൂപ്പർ കിംഗ്സിനെ (CSK) തകർത്ത് ആർസിബി തങ്ങളുടെ ആധിപത്യം ഉറപ്പിച്ചു. ലീഗ് ചരിത്രത്തിൽ ചെന്നൈ സൂപ്പർ കിംഗ്സിന് ആർസിബിക്കുമേൽ വ്യക്തമായ മുൻതൂക്കമുണ്ടെങ്കിലും (22-14), സമീപകാലത്ത് കഥ മാറുകയാണ്. തുടർച്ചയായ നാലാം മത്സരത്തിലും ചെന്നൈയെ മുട്ടുകുത്തിച്ച് വിരാട് കോഹ്ലിയും സംഘവും തങ്ങളുടെ കരുത്ത് തെളിയിച്ചു. ഏപ്രിൽ 5-ന് നടന്ന ആവേശപ്പോരാട്ടത്തിൽ 43 റൺസിനാണ് ആർസിബി വിജയിച്ചത്.
ചിന്നസ്വാമി സ്റ്റേഡിയത്തിൽ നടന്ന മത്സരത്തിൽ ആദ്യം ബാറ്റ് ചെയ്ത ആർസിബി നിശ്ചിത ഓവറിൽ 250 -3 എന്ന കൂറ്റൻ സ്കോർ പടുത്തുയർത്തി. മറുപടി ബാറ്റിംഗിനിറങ്ങിയ ചെന്നൈയ്ക്ക് ആർസിബിയുടെ കൃത്യതയാർന്ന ബൗളിംഗിന് മുന്നിൽ പിടിച്ചുനിൽക്കാനായില്ല. 43 റൺസിന്റെ വിജയത്തോടെ ആർസിബി പോയിന്റ് ടേബിളിൽ തങ്ങളുടെ സ്ഥാനം ഭദ്രമാക്കി. ടിം ഡേവിഡും ദേവദത്ത് പടിക്കലും ഉൾപ്പടെ താരങ്ങൾ എല്ലാം ബോളർമാർക്ക് നിരാശയുടെ സമയം സമ്മാനിച്ചപ്പോൾ 250 എന്ന സ്കോർ ചെന്നൈക്ക് റൺ മല തന്നെയായി.
ചെന്നൈക്കെതിരെ തോൽവി അറിയാത്ത കുതിപ്പാണ് ആർസിബി നടത്തുന്നത്. കഴിഞ്ഞ നാല് മത്സരങ്ങളിലെ ഫലം ഇങ്ങനെ:
43 റൺസ് വിജയം (ഏപ്രിൽ 5, 2026): ഏറ്റവും ഒടുവിൽ നടന്ന മത്സരത്തിൽ ചെന്നൈയെ നിഷ്പ്രഭമാക്കി ആർസിബി വിജയിച്ചു.
27 റൺസ് വിജയം: ബൗളർമാരുടെ മികച്ച പ്രകടനത്തിലൂടെ ചെന്നൈയെ തളച്ചു.
50 റൺസ് വിജയം: ഏകപക്ഷീയമായ പോരാട്ടത്തിൽ ചെന്നൈയെ തകർത്തെറിഞ്ഞ വമ്പൻ വിജയം.
2 റൺസ് വിജയം: അവസാന പന്തുവരെ ആവേശം നിറഞ്ഞ പോരാട്ടത്തിൽ ആർസിബി വിജയം തട്ടിയെടുത്തു.
ചരിത്രത്തിൽ ചെന്നൈ ബഹുദൂരം മുന്നിലാണെങ്കിലും, കഴിഞ്ഞ നാല് മത്സരങ്ങളിലും സിഎസ്കെയെ തോൽപ്പിക്കാനായത് ആർസിബിയുടെ മികവിനെയും ചെന്നൈക്ക് ഉണ്ടായ തളർച്ചയെയും കാണിക്കുന്നു. നിലവിലെ ചാമ്പ്യന്മാരായ ആർസിബി ഇത്തവണയും കിരീടം നിലനിർത്താനുള്ള പോരാട്ടത്തിലാണ്.
