ഇന്ത്യൻ ട്വന്റി-20 ടീമിന്റെ നായകസ്ഥാനത്തുനിന്നും നാടകീയമായി മാറ്റപ്പെട്ടതിന് പിന്നാലെ, തന്റെ പകരക്കാരനായി എത്തിയ ശ്രേയസ് അയ്യർക്ക് പൂർണ്ണ പിന്തുണ പ്രഖ്യാപിച്ച് സൂര്യകുമാർ യാദവ്. മുംബൈ ക്രിക്കറ്റിന് ഒന്നടങ്കം അഭിമാനം നൽകുന്ന നിമിഷമാണിതെന്നും ശ്രേയസ് നായകനാകുന്നതിൽ താൻ അതീവ സന്തുഷ്ടനാണെന്നും സൂര്യകുമാർ വ്യക്തമാക്കി.
ബിസിസിഐ വലിയൊരു അഴിച്ചുപണിയിലൂടെ സൂര്യകുമാർ യാദവിനെ മാറ്റി ശ്രേയസ് അയ്യരെ പുതിയ ടി20 നായകനായി പ്രഖ്യാപിച്ചതിന് പിന്നാലെ വലിയ രീതിയിലുള്ള ചർച്ചകളാണ് ക്രിക്കറ്റ് ലോകത്ത് ഉയർന്നത്. എന്നാൽ ഈ വിവാദങ്ങൾക്കെല്ലാം വിരാമമിട്ടുകൊണ്ടാണ് മുൻ നായകൻ സൂര്യകുമാർ യാദവ് തന്നെ നേരിട്ട് രംഗത്തെത്തിയത്.
ശനിയാഴ്ച നടന്ന ടി20 മുംബൈ ലീഗ് മത്സരത്തിന് മുന്നോടിയായി ഇരുവരും പരസ്പരം കെട്ടിപ്പിടിച്ച് സ്നേഹം പങ്കുവെക്കുന്ന മനോഹരമായ കാഴ്ചയ്ക്കും മൈതാനം സാക്ഷ്യം വഹിച്ചു. ട്രയംഫ് നൈറ്റ്സ് എംഎൻഇ ടീമിന്റെ ക്യാപ്റ്റനായി സൂര്യകുമാറും സോബോ മുംബൈ ഫാൽക്കൺസിന്റെ ഇംപാക്ട് സബ്സ്റ്റിറ്റ്യൂട്ടായി ശ്രേയസ് അയ്യരും നേർക്കുനേർ വന്ന മത്സരമായിരുന്നു ഇത്.
മത്സരത്തിലെ ടോസ് സമയത്ത് ക്യാപ്റ്റൻസി മാറ്റത്തെക്കുറിച്ചുള്ള ചോദ്യങ്ങളെയെല്ലാം തള്ളിക്കളഞ്ഞുകൊണ്ട് സൂര്യകുമാർ തന്റെ മുംബൈ ടീമംഗം കൂടിയായ ശ്രേയസിനെ വാനോളം പുകഴ്ത്തി: “ഒരുപാട് കാര്യങ്ങൾ സംഭവിക്കുന്നുണ്ട്, എങ്കിലും ഇന്ത്യൻ ടി20 ടീമിനെ നയിക്കാൻ ശ്രേയസിന് അവസരം ലഭിച്ചതിൽ ഞാൻ വലിയ രീതിയിൽ സന്തുഷ്ടനാണ്. ഞങ്ങൾ ബോംബെക്ക് വേണ്ടി ഒരുമിച്ച് ഒരുപാട് ക്രിക്കറ്റ് കളിച്ചിട്ടുണ്ട്. എന്നെ സംബന്ധിച്ച് ഏറ്റവും പ്രധാനപ്പെട്ട കാര്യം, ഇന്ത്യയുടെ ടി20 ടീമിനെ നയിക്കാൻ തുടർച്ചയായി മൂന്ന് മുംബൈ ക്യാപ്റ്റന്മാർക്ക് അവസരം ലഭിക്കുന്നു എന്നതാണ്. ഇത് മുംബൈ ക്രിക്കറ്റിന് വലിയൊരു അഭിമാന നിമിഷമാണ്, നാമെല്ലാവരും ഇത് ആഘോഷിക്കണം.”
രോഹിത് ശർമ്മ, സൂര്യകുമാർ യാദവ് എന്നിവർക്ക് ശേഷം ശ്രേയസ് അയ്യർ കൂടി എത്തുന്നതോടെയാണ് തുടർച്ചയായി മൂന്ന് മുംബൈ താരങ്ങൾ ഇന്ത്യയെ നയിക്കുന്നു എന്ന റെക്കോർഡ് പിറക്കുന്നത്.
