ഇന്ത്യൻ ക്രിക്കറ്റിന് വീണ്ടും ഒരു ‘ദ്രാവിഡ്’ യുഗം! മുൻ ഇന്ത്യൻ ക്യാപ്റ്റനും ഇതിഹാസ ബാറ്റ്സ്മാനുമായ രാഹുൽ ദ്രാവിഡിന്റെ ഇളയ മകൻ അൻവേ ദ്രാവിഡ്ഇന്ത്യൻ അണ്ടർ-19 (U19) ടീമിൽ ഇടം നേടി. അടുത്ത മാസം ശ്രീലങ്കയ്ക്കെതിരെ നടക്കാനിരിക്കുന്ന ഏകദിന പരമ്പരയ്ക്കുള്ള ടീമിലാണ് വിക്കറ്റ് കീപ്പർ ബാറ്റ്സ്മാനായ അൻവേയെ തിരഞ്ഞെടുത്തത്.
ശരത് ശ്രീധരൻ അധ്യക്ഷനായ ജൂനിയർ ക്രിക്കറ്റ് സെലക്ഷൻ കമ്മിറ്റിയാണ് അടുത്ത മാസം ശ്രീലങ്കയിൽ നടക്കുന്ന ഏകദിന പരമ്പരയ്ക്കുള്ള ഇന്ത്യൻ ജൂനിയർ ടീമിനെ പ്രഖ്യാപിച്ചത്. മൂന്ന് ഏകദിന മത്സരങ്ങളും രണ്ട് മൾട്ടി-ഡേ മത്സരങ്ങളും അടങ്ങുന്നതാണ് ഈ പര്യടനം. ജൂലൈ 4 മുതൽ ശ്രീലങ്കയിലെ ഹമ്പൻതോട്ടയിലാണ് മത്സരങ്ങൾ ആരംഭിക്കുന്നത്. ആഭ്യന്തര ക്രിക്കറ്റിലെ തകർപ്പൻ പ്രകടനമാണ് 17-കാരനായ അൻവേ ദ്രാവിഡിന് ആദ്യമായി ഇന്ത്യൻ കുപ്പായത്തിലേക്ക് വഴിതുറന്നത്.
വലങ്കയ്യൻ ബാറ്റ്സ്മാനായ അൻവേ ദ്രാവിഡിനെ 15 അംഗ ഏകദിന ടീമിലാണ് ഉൾപ്പെടുത്തിയിരിക്കുന്നത്. രജത് ബാഗേലിനൊപ്പം ടീമിലെ പ്രധാന വിക്കറ്റ് കീപ്പർമാരിൽ ഒരാളായിരിക്കും അൻവേ. മധ്യപ്രദേശിന്റെ യഷ്വർദ്ധൻ സിംഗ് ചൗഹാനാണ് ഇന്ത്യൻ ടീമിന്റെ നായകൻ. ലക്ഷ്യ റായ്ചന്ദാനിയെ വൈസ് ക്യാപ്റ്റനായും നിയമിച്ചിട്ടുണ്ട്. രാഹുൽ ദ്രാവിഡിന്റെ മൂത്ത മകൻ സമിത് ദ്രാവിഡ് കർണാടകയ്ക്ക് വേണ്ടി അണ്ടർ-19 ക്രിക്കറ്റ് കളിച്ചിട്ടുണ്ടെങ്കിലും, ദ്രാവിഡ് സഹോദരന്മാരിൽ ആദ്യമായി ഒരു ദേശീയ ടീമിലേക്ക് വിളിപ്പേര് ലഭിക്കുന്നത് ഇളയ മകനായ അൻവേയ്ക്കാണ്.
അടുത്തിടെ നടന്ന ആഭ്യന്തര ടൂർണമെന്റായ വിനൂ മങ്കാദ് ട്രോഫിയിൽ കർണാടക അണ്ടർ-19 ടീമിനെ ക്വാർട്ടർ ഫൈനൽ വരെ എത്തിച്ചത് ക്യാപ്റ്റനായ അൻവേയുടെ മികവിലായിരുന്നു. മിഡിൽ ഓർഡറിൽ ടീമിന്റെ വിശ്വസ്തനായ ആങ്കർ ബാറ്റ്സ്മാനായി തിളങ്ങിയ അൻവേ, 6 ഇന്നിങ്സുകളിൽ നിന്നായി 220 റൺസ് അടിച്ചുകൂട്ടി. ഇതിൽ ഹിമാചൽ പ്രദേശിനെതിരായ കടുത്ത സമ്മർദ്ദ ഘട്ടത്തിൽ പുറത്താകാതെ നേടിയ 82 റൺസ് ഏറെ ശ്രദ്ധിക്കപ്പെട്ടിരുന്നു. അതിന് മുൻപ് അണ്ടർ-16 വിജയ് മർച്ചന്റ് ട്രോഫിയിലും താരം സെഞ്ച്വറി നേടിയിട്ടുണ്ട്.
അടുത്ത രണ്ട് വർഷത്തിന് ശേഷം നടക്കാനിരിക്കുന്ന അണ്ടർ-19 ലോകകപ്പിനുള്ള പുതിയ സൈക്കിളിന്റെ തുടക്കമായാണ് സെലക്ടർമാർ ഈ ശ്രീലങ്കൻ പര്യടനത്തെ കാണുന്നത്.
