ഐപിഎൽ 2027 സീസണിന് മുന്നോടിയായി ക്രിക്കറ്റ് ലോകത്തെ ഞെട്ടിക്കുന്ന വൻ അഴിച്ചുപണികൾക്കൊരുങ്ങി ഡൽഹി ക്യാപിറ്റൽസ്. ഇന്ത്യൻ ക്രിക്കറ്റ് ഇതിഹാസങ്ങളായ സൗരവ് ഗാംഗുലിയും യുവരാജ് സിംഗും ഡൽഹിയുടെ പരിശീലക നിരയിലേക്ക് ഒന്നിച്ചെത്തുന്നു എന്നതുൾപ്പെടെയുള്ള വിപ്ലവകരമായ മാറ്റങ്ങളുടെ വിവരങ്ങളാണ് ഇപ്പോൾ പുറത്തുവന്നിരിക്കുന്നത്.
ഇന്ത്യൻ ക്രിക്കറ്റിന് ആവേശകരമായ ഒരു കാലഘട്ടം സമ്മാനിച്ച മുൻ നായകൻ സൗരവ് ഗാംഗുലിയും സിക്സർ കിങ് യുവരാജ് സിംഗും ഡൽഹി ക്യാപിറ്റൽസിന്റെ കോച്ചിങ് സ്റ്റാഫിൽ ഒന്നിക്കുകയാണ്. ഡൽഹിയുടെ കോച്ചിങ് ടീമിന്റെ തലപ്പത്തേക്ക് (Lead Coach/Director) സൗരവ് ഗാംഗുലി എത്തുമ്പോൾ, അദ്ദേഹത്തിന് കീഴിൽ യുവരാജ് സിംഗും ഡൽഹിയുടെ കോച്ചിങ് സെറ്റപ്പിന്റെ ഭാഗമാകും.
യുവതാരങ്ങളെ വാർത്തെടുക്കുന്നതിലും തന്ത്രങ്ങൾ മെനയുന്നതിലും ഇവരുടെ സഖ്യം ഡൽഹിക്ക് വൻ മുൻതൂക്കം നൽകുമെന്നാണ് മാനേജ്മെന്റിന്റെ പ്രതീക്ഷ. ആരാധകരെ ഏറ്റവും കൂടുതൽ ആവേശത്തിലാക്കുന്ന വാർത്ത ഡൽഹിയുടെ മുൻ നായകനും വിക്കറ്റ് കീപ്പർ ബാറ്ററുമായ റിഷഭ് പന്ത് വീണ്ടും ഡൽഹി ക്യാപിറ്റൽസിലേക്ക് തിരിച്ചെത്തുന്നു എന്നതാണ്. പന്തിന്റെ മടങ്ങിവരവ് ടീമിന്റെ ബാറ്റിങ് നിരയ്ക്ക് വലിയ കരുത്താകും.
എന്നാൽ, പന്ത് തിരിച്ചെത്തിയാലും ഡൽഹിയുടെ പുതിയ ക്യാപ്റ്റൻ സ്ഥാനത്തേക്ക് ടീം പരിഗണിക്കുന്നത് മുൻ ലഖ്നൗ താരം കെ.എൽ രാഹുലിനെയാണ്. നിലവിൽ ഡൽഹിയുടെ നായകസ്ഥാനത്തേക്കുള്ള ലിസ്റ്റിൽ ഏറ്റവും മുന്നിലുള്ളത് രാഹുലാണ്. ഡൽഹിയുടെ ചൈനാമാൻ സ്പിന്നർ കുൽദീപ് യാദവ് വരും സീസണിൽ ടീം വിടുമെന്നാണ് ലഭിക്കുന്ന സൂചനകൾ. ലഖ്നൗ സൂപ്പർ ജയന്റ്സിന് (LSG) വേണ്ടിയാകും കുൽദീപ് ഇനി പന്തെറിയുക. ഹോം ടീമിലേക്ക് മാറുന്ന കുൽദീപിന്റെ ഈ നീക്കവും വരും സീസണിലെ വലിയ ട്രേഡുകളിൽ ഒന്നായി മാറും.
