അസിഡിറ്റിയും നെഞ്ചെരിച്ചിലും ശരീരത്തിന് ഏറെ ബുദ്ധിമുട്ടുണ്ടാക്കുന്ന ഒന്നാണ്. പലപ്പോഴും ഈ പ്രശ്നങ്ങൾ ഉണ്ടായി കഴിഞ്ഞതിനുശേഷം ആണ് അവ മാറ്റുന്നതിനെക്കുറിച്ച് നമ്മൾ ചിന്തിക്കാറുള്ളത്. എന്നാൽ ശരീരത്തിൽ അസിഡിറ്റി ഉണ്ടാകാതെ നോക്കുന്നതാണ് നല്ല മാർഗ്ഗം. അന്നനാളത്തിന്റെ അടിഭാഗത്തുള്ള സ്ഫിൻക്റ്റർ ശരിയായി പ്രവർത്തിക്കാതിരിക്കുമ്പോൾ ആമാശയത്തിലെ ദ്രാവകം അന്നനാളത്തിലേക്ക് പ്രവേശിക്കുന്നത് വഴിയാണ് അസിഡിറ്റിക്ക് കാരണമാകുന്ന ആസിഡ് റിഫ്ലക്സ് സംഭവിക്കുന്നത്.
നമ്മൾ കഴിക്കുന്ന ചില ഭക്ഷണങ്ങളാണ് പലപ്പോഴും ശരീരത്തിൽ ആസിഡ് റിഫ്ലക്സ് ഉണ്ടാകാൻ കാരണമാകുന്നത്. ഇവയെ തിരിച്ചറിഞ്ഞ് ഒഴിവാക്കിയാൽ ഒരു പരിധിവരെ അസിഡിറ്റി, നെഞ്ചരിച്ചിൽ, വയർ വീർക്കൽ തുടങ്ങിയ പ്രശ്നങ്ങൾ ഇല്ലാതാക്കാൻ സാധിക്കും. ഇത്തരത്തിൽ ആഹാരത്തിൽ വരുത്തുന്ന മാറ്റങ്ങൾ കൊണ്ട് അസിഡിറ്റി കൊണ്ടുള്ള പ്രശ്നങ്ങൾക്ക് മരുന്ന് കഴിക്കുന്നത് ഒഴിവാക്കാൻ പോലും സാധിച്ചേക്കാവുന്നതാണ്. ശരീരത്തിൽ ആസിഡ് റിഫ്ലക്സ് സംഭവിക്കാതിരിക്കാനായി നമ്മൾ ഭക്ഷണത്തിൽ നിന്നും ഒഴിവാക്കേണ്ടവ ഏതൊക്കെയാണെന്ന് നോക്കാം.
കാർബണേറ്റഡ് പാനീയങ്ങൾ ആസിഡ് റിഫ്ലക്സിന് കാരണമാകുന്ന ഒരു പ്രധാന ഘടകമാണ്. ഇവ വയറ്റിൽ കുമിളകൾ വികസിപ്പിക്കുകയും കൂടുതൽ സമ്മർദ്ദവും വേദനയും സൃഷ്ടിക്കുകയും ചെയ്യുന്നു. ഇതുവഴി ഇത്തരം പാനീയങ്ങൾ അസിഡിറ്റിക്കും നെഞ്ചിരിച്ചിലിനും കാരണമാകുന്നു. അതുപോലെതന്നെ അസിഡിറ്റി പ്രശ്നമുള്ളവർ കാപ്പിയും ചായയും ഒഴിവാക്കുകയോ അല്ലെങ്കിൽ വളരെ കുറഞ്ഞ അളവിൽ മാത്രം ഉപയോഗിക്കാനോ ശ്രദ്ധിക്കേണ്ടതാണ്. കഫീൻ അടങ്ങിയ പാനീയങ്ങൾ ആസിഡ് റിഫ്ലക്സിനെ വർദ്ധിപ്പിക്കുന്നതാണ്.
ശരീരത്തിൽ ആസിഡ് റിഫ്ലക്സ് ഉണ്ടാക്കുന്ന മറ്റൊരു ഭക്ഷണ വസ്തു ചോക്ലേറ്റ് ആണ്. അതുപോലെ കുരുമുളക് പരമാവധി ഒഴിവാക്കുന്നതും അസിഡിറ്റിക്ക് പ്രയോജനകരമാണ്. ആസിഡ് റിഫ്ലക്സ് ഉണ്ടാക്കുന്ന മറ്റൊരു പ്രധാന ഘടകം സിട്രസ് പഴങ്ങളാണ്. സിട്രസ് പഴങ്ങളായ ഓറഞ്ച് മുസംബി എന്നിവയോടൊപ്പം തന്നെ ഗ്രേപ്പ്ഫ്രൂട്ടും തക്കാളിയും പരമാവധി ഒഴിവാക്കുക. തക്കാളി കൂടുതലായി ചേർന്നിട്ടുള്ള ഭക്ഷണങ്ങൾ ശരീരത്തിൽ ആസിഡ് റിഫ്ലക്സ് വർദ്ധിപ്പിക്കുന്നതാണ്. ഈ ഭക്ഷണങ്ങൾ ആഹാരക്രമത്തിൽ നിന്നും ഒഴിവാക്കുന്നതോടൊപ്പം വറുത്ത ഭക്ഷണങ്ങളും മദ്യവും കൂടി ഒഴിവാക്കുകയും ഉറങ്ങുന്നതിന് രണ്ടു മണിക്കൂർ മുൻപെങ്കിലും ഭക്ഷണം കഴിക്കാൻ ശ്രദ്ധിക്കുകയും ചെയ്താൽ അസിഡിറ്റി പ്രശ്നങ്ങൾക്ക് മികച്ച രീതിയിൽ പരിഹാരമാകുന്നതാണ്.
Discussion about this post