സഞ്ജു സാംസണിന്റെ ഇന്ത്യൻ പ്രീമിയർ ലീഗ് ടീം മാറ്റവുമായി ബന്ധപ്പെട്ട അഭ്യൂഹങ്ങൾ ഇന്ത്യൻ പ്രീമിയർ ലീഗ് ലോകത്തെ പ്രധാന ചർച്ചകളിൽ ഒന്നായിരുന്നു. ചെന്നൈ സൂപ്പർ കിങ്‌സുമായി ബന്ധപ്പെട്ടാണ് താരത്തിന്റെ പേര് കൂടുതലായി കേട്ടത്. ഇപ്പോഴിതാ സഞ്ജു തന്നെ റോയൽ ചലഞ്ചേഴ്‌സ് ബെംഗളൂരുവിൽ (ആർസിബി) പ്രവർത്തിച്ചിരുന്ന മുൻ അനലിസ്റ്റ്, പ്രസന്ന പുറത്തുവിട്ട അപ്ഡേറ്റ് ആയിരുന്നു ഈ വാർത്തകൾക്ക് ബലമായത്. എക്സിലാണ് അദ്ദേഹം ആരാധകർ കാത്തിരുന്ന ഏറ്റവും പുതിയ സഞ്ജു സാംസൺ അപ്ഡേറ്റ് നൽകിയത്.
അടുത്ത സീസണിന് മുമ്പ് ഒരു ഇന്ത്യൻ ഓഫ് സ്പിന്നറും ഒരു വലംകൈ മിഡിൽ ഓർഡർ ബാറ്റ്‌സ്മാനും വിക്കറ്റ് കീപ്പർ ബാറ്ററായ സഞ്ജുവിന് വേണ്ടി ട്രേഡ് ചെയ്യപ്പെടുമെന്ന് അദ്ദേഹം പറഞ്ഞു. പേരുകളൊന്നും അദ്ദേഹം വെളിപ്പെടുത്തിയിട്ടില്ലെങ്കിലും, രാജസ്ഥാൻ റോയൽസിലേക്ക് (ആർആർ) രവിചന്ദ്രൻ അശ്വിനും ശിവം ദുബെയും പോകുമെന്നും പകരം സഞ്ജു ചെന്നൈയിൽ എത്തും എന്നുമാണ് റിപ്പോർട്ടുകൾ. തങ്ങൾ സഞ്ജുവിനെ നോട്ടമിടുന്നുണ്ടോ എന്ന ചോദ്യത്തിന് ചെന്നൈ സൂപ്പർ കിങ്സിന്റെ ഒരു ഒഫീഷ്യൽ ഇങ്ങനെ ആയിരുന്നു പറഞ്ഞത്. “സഞ്ജു സാംസണെ ഞങ്ങൾ പരിഗണിക്കുന്നുണ്ട്. അദ്ദേഹം ഒരു മിടുക്കനായ താരമാണ്. ഓപ്പണറായി ഇറങ്ങാനും വിക്കറ്റ് കീപ്പിങ് ഗ്ലൗസ് അണിയാനും സാധിക്കും. അദ്ദേഹം ലഭ്യമാണെങ്കിൽ, അദ്ദേഹത്തെ ഞങ്ങളുടെ ടീമിൽ ഉൾപ്പെടുത്താൻ ഞങ്ങൾ ശ്രമിക്കും. ട്രേഡ് പ്രക്രിയയെക്കുറിച്ച് ഞങ്ങൾ ഇതുവരെ ചർച്ച ചെയ്തിട്ടില്ല, പക്ഷേ കളിക്കാരനിൽ ഞങ്ങൾക്ക് താൽപ്പര്യമുണ്ട്,”
ഈ അടുത്ത് നടന്ന ഒരു സ്വകാര്യ ചടങ്ങിൽ സംസാരിച്ച സഞ്ജു ഇത് സംബന്ധിച്ച് ഉള്ള ചോദ്യത്തിന് സഞ്ജു പറഞ്ഞത് ഇങ്ങനെ “ഒന്നും പറയാനില്ല ഒന്നും പറയില്ല” അദ്ദേഹം പറഞ്ഞു. സഞ്ജു എന്തായാലും വാർത്ത നിഷേധിക്കുകയോ താൻ രാജസ്ഥാനിൽ തന്നെ തുടരും എന്ന് സ്ഥിതീകരിക്കാത്ത സാഹചര്യത്തിൽ വരും നാളുകളിലെ നീക്കങ്ങൾ ഏവരും ഉറ്റുനോക്കും.
സഞ്ജുവിനെ സംബന്ധിച്ച് വരാനിരിക്കുന്ന ഏഷ്യാ കപ്പിനുള്ള ഇന്ത്യൻ ടീമിൽ ഇടം പിടിക്കുകയും ശേഷം മികച്ച പ്രകടനം നടത്തി ടീമിൽ സ്ഥിരസ്ഥാനം ഉറപ്പിക്കുകയും ചെയ്യുക എന്നതാണ് മുന്നിലുള്ള വെല്ലുവിളി.
Discussion about this post