ഐപിഎൽ 206 ട്രേഡിംഗ് വിൻഡോ പ്രാബല്യത്തിൽ വരുമ്പോൾ രാജസ്ഥാൻ റോയൽസ് വിടുമെന്ന് സഞ്ജു സാംസൺ പറഞ്ഞതായി റിപ്പോർട്ട് ഇന്നലെ വന്നിരുന്നു. 2013 ൽ അരങ്ങേറ്റം കുറിച്ചതു മുതൽ സാംസൺ, റോയൽസിന്റെ ഭാഗമായിരുന്നു, പക്ഷേ കഴിഞ്ഞ സീസണിൽ ക്ലബും താരവും തമ്മിലുള്ള ബന്ധത്തിൽ ഉലച്ചിൽ ഉണ്ടായി. അതിന്റെ ഭാഗമായിട്ട് തന്നെയാണ് സഞ്ജു ടീം വിടാൻ ഒരുങ്ങുന്നത്. ഇന്ത്യൻ വിക്കറ്റ് കീപ്പർ ബാറ്റ്സ്മാനെ സ്വന്തമാക്കാൻ താൽപ്പര്യമുള്ള ഫ്രാഞ്ചൈസികളിൽ ചെന്നൈ സൂപ്പർ കിംഗ്സും (സിഎസ്കെ) കൊൽക്കത്ത നൈറ്റ് റൈഡേഴ്സും (കെകെആർ) ഉൾപ്പെടുന്നു.
ക്രിക്ക്ബസിന്റെ റിപ്പോർട്ട് പ്രകാരം, രാജസ്ഥാൻ റോയൽസിൽ നിന്ന് തന്നെ റിലീസ് ചെയ്യാൻ സഞ്ജു സാംസൺ ഔദ്യോഗികമായി അഭ്യർത്ഥിച്ചിട്ടുണ്ട്. 11 സീസണുകളായി സാംസൺ ഫ്രാഞ്ചൈസിക്ക് വേണ്ടി കളിച്ചിട്ടുണ്ട്, 2022 മുതൽ അവരുടെ ക്യാപ്റ്റനാണ്. സഞ്ജുവിനെ ഒരു കാരണവശാലും ടീം ഒഴിവാക്കില്ല എന്ന തരത്തിലുള്ള റിപ്പോർട്ട് ആയിരുന്നു കഴിഞ്ഞ ദിവസങ്ങളിൽ വന്നത്. പക്ഷെ റോയൽസിൽ തുടരേണ്ടതില്ലെന്ന് സഞ്ജുവിന്റെ കുടുംബം പരസ്യമായി പറഞ്ഞതായി പുതിയ റിപ്പോർട്ടിൽ പറയുന്നു. ഒന്നെങ്കിൽ തന്നെ റിലീസ് ചെയ്യണം എന്നോ പുതിയ സീസണിന് മുമ്പ് ട്രേഡ് ചെയ്യുകയോ ചെയ്യണം എന്ന് സഞ്ജു ആഗ്രഹിക്കുന്നു.
പക്ഷെ സഞ്ജുവിന്റെ ടീം വിടുന്നത് സംബന്ധിച്ചുള്ള നിർണായക തീരുമാനം എടുക്കനായുള്ള അധികാരം രാജസ്ഥാൻ റോയൽസിനാണ് ഉള്ളത്. ടീം ഇത് സംബന്ധിച്ച് ഇതുവരെ പ്രതികരണം ഒന്നും നടത്തിയിട്ടില്ല. ടീം ഉടമയും പരിശീലകൻ രാഹുൽ ദ്രാവിഡുമായിട്ടുള്ള ചർച്ചകൾക്ക് ശേഷമായിരിക്കും ഈ വിഷയത്തിൽ തീരുമാനം എടുക്കുക. ഐപിഎൽ കരാർ പ്രകാരം ഇത്തരം സാഹചര്യത്തിൽ കരാർ സംബന്ധിച്ചുള്ള അവസാന വാക്ക് ടീമിന്റെയാണ്.
സഞ്ജുവിന് താത്പര്യമില്ലാതെ നിൽക്കുന്ന സാഹചര്യത്തിൽ രാജസ്ഥാൻ ഈ വിഷയത്തിൽ എടുക്കുന്ന തീരുമാനം നിർണായകമാകും.
Discussion about this post